Ngan haong urang Tày, urang Nùng, drei kubau lac athur hu makna biak praong dalam bruk padang mbang ngui, kayua lac bruk pala drak di mikva di dom mblang taneh glaong rilo tal oh pandar hu jamraik mac moc. Nan ye, thau dhar phol kubau tuk lahaiy bruk ngak nong lac adat iek praong prein yava di janih athur ini brei ka anek manuac hu dom bialn pala biak njuak, hu rilo padai brah.

 Amuk Hoàng Thị Nhuận, urang dalam Kapul Văn nghệ bhap bini Việt Nam, urang hu rilo danak dak roh duah ka ilamo Tày-Nùng brei thau: camriep abih lac dom adat cambat pambuak haong yang mebang, adat kakuh muk kei, kakuh Yang ngak nong, yang khik iek athur raong. Dom pandap ieu yang hu caga meng rilo harei dahlau, njauk harei 6 bilan 6 (saka ia bulan) abih palei madeih meng saboh aval piah caga ka bruk ieu yang. Bruk dahlau di abih, po sang njauk ngak nan lac ramik var raong kubau ka nyu hacih, cakak biar hồng tauk tagok dom gheng var kubau, tauk tagok takaiy kubau haong makna lac pateok dom bhut khamot saong likau ka abih janih hu patuah jamo.

Amuk Nông Thị Hạnh,  palei Lũng Hoài, xã Mã Ba brei thau: Yaom lac bhum Lục Khu (huyện Hà Quảng, Cao Bằng) luac thun thu lagu, oh hu hamu piah ngak padai min drei kubau jeng kak kajap haongbangsa Nùng pak ini saong Tet “Khoăn vài” tuk halei jeng lac bruk praong di mikva.

 “Tal harei 6 bingun, bilan 6 ye sang halei jeng ngak ahar, yau ye ahar tapei nung, ahar dợm, sang halei hu ada ye ngak ralaow ada, hu manuk ye ngak manuk. Kol dahlak jeng daok khik adat meng kan mai. Mikva dalam palei mbang tet praong yau harei ia bulan bak baoh bilan 7, oh klak hu kayua nan lac adat cambat di bangsa drei”.

Pandap piah ieu yang tuk Tet “khoăn vài” hu ralaow ada, ahar lưng gù ngak yau takaiy kubau, pachut haong vàng mã, alak saong dom janih baoh kayau dalam bein sang. Dah page harei 6 bingun bilan 6 (saka ia bulan) po sang rami ramik pandap ieu yang saong cang tal tuk tame mon Thìn ye pok pandap tagok bàn thờ haong hatai caong dom Po Yang daong ka tapon kubau hu khang kadang, salamat, piah vụ hadei daong gilac ka rahra li-ua hamu. Hadei di tuk ngak salah bruk ieu yang, po sang dui kubau, tuan mbaik li-ua tabiak kraong, craoh piah manei ka kubau, rao dom pandap li-ua ka nyu hacih.  

Adat “khoăn vài” yaok bhum hu dom adat cambat karei di gauk min jeng hu sa makna lac ieu suan kubau mai hadei di bilan pala drak glaih glar. Amuk Hà Thị Ỷ, daok di palei Nà Nhừ, xã Dân Chủ, huyện Hòa An ndem lac:

"Meng kan hu mehit dom ong taha ndem lac mbang tet harei 6 bingun bilan 6 lac mbang tet “khoăn vài”. Urang Tày di palei dahlak ttok ngak ahar, pacut blaoh mbang, oh ngak salau lisei ieu yang kayua di pak mbang tet harei 5 bingun bilan 5 praong jang. Li-ua blaoh, pataom gauk mbang huak maong yau rao hacih pandap ngak nong, hadei di nan drei kubau hu padeih padei".

Meng hatai thau dhar phol Yang ngak nong hu daong ka hajan siam hangin lagaih saong brei mboh hatai thau dhar phol drei kubau hu daong ka urang ngak nong n gak salah bilan pala. Tet “khoăn vài” hu jeng harei roya oh kurang hu di bangsa Tày, Nùng. Ini jeng lac tukvak piah pambuak pakajap talei anit ranam gauk di dom urang dalam sang, dalam puk palei, rik daong khik ramik ilamo siam gheih dalam tuk rilo ilamo meng kan daok dak harei dak lahik nao yau urak ini./.