Jeik lac pandap pambuak pagam haong raidiuk di urang Jrai, Bahnar

Dalam baoh sang praong, laneing di amuk Siu H’Bro (palei Kte lớn A, xã Ia Yeng, huyện Phú Thiện, tỉnh Gia Lai), dom baoh jeik hu dak jeng talei tapak gauk di sa binah sang. Amuk H’Bro khan lac: Harei dahlau, sang halei jeng hu jeik. Tapa rilo rai, tal harei ini sang amuk hu 11 baoh jeik klak meng kan. Saman dahlau, piah blei hu jeik, ong, amuk dahlak brei salih meng biak rilo drei kubao.

Jeik di urang Jrai hu rilo janih saong thaik thaok karei di gauk, yaok janih jeng hu makna saong angan ieu karei di gauk. Urang thau cambaih, tok pasang iek dom bingu hala hu sarak di gah langiu lac thau angan di yaok janih. Karei jang jeik thường, jeik meng kan praong jang saong hu sambo di lar am cuh. Gah langiu bhian hu sarak ndong tagok, hu bingu la biak mekre, rilo labik tanyak saong hu binguk athur biak gheih. Dalam nan, njauk ndem tal dom janih jeik yau ye: Slam Hla, Wanh, Htôk Long Hong, Rbia, Rbia Pôm, Jú, Jơ Bô... Bruk njauk biai nan lac, dom janih jeik ini hu pandar tuk dalam sang hu bruk praong, saong tok hu pandar dalam sang, oh hu ba tabiak gah langiu. Alak pa-auk dalam dom janih jeik ini jeng pahe, bingi jang dut saong alak hu pa-auk dalam jeik thường. Pandar blaoh, po sang khik piah tani tanat saong kak sre cambuai jeik meng tuk atau kadung ni lông piah pacang takuh, anek côn trùng laik tame.

Tuk hu sa baoh jeik bahrau, po sang nan njauk ngak adat ieu yang Pôk Miang piah raok jeik tame sang. Urang taha di palei lac urang dang akaok bruk ieu yang nan. Po sang brei caga pandap ieu yang lac 1 drei pabui, 1 jeik alak. Bruk ngak adat ini lac caong ka po yang khik iek ka jeik hu khang kajap, plaih laik pacah, lahik saong daong pa-auk alak hu bingi, pahe jang.

   Ong Nay Bang- akaok palei Kte lớn A brei thau: Di palei Kte lớn A hu labaih 30% baoh sang hu jeik klak meng kan, dom janih jeik ini hu khik piah meng rilo rai saong oh pablei tabiak langiu. Dalam dom mbang pataom bhap ginum biai, karja bhian kakei bhap bini khik piah dom janih jeik meng kan. Kayua yau nan ye, bhap bini thau paglaong hatai sahneng khik piah biak tani tanat.  

   Sang ong Đinh Ênh daok di palei Brò (xã An Trung, huyện Kông Chro), hu rilo jeik meng kan. Ong Ênh khan lac: Langiu di dom paok jeik hu amaik ame caik veik, drei hu caik rilo tukvak, prein yava, jien padai nao duah pataom dom baoh jeik di urang Bahnar. Urak ini, drei hu 80 baoh jeik meng kan biak hu yaom glaong.

  Urak ini karja palei di Gia Lai bhian pathau khan, jak ba bhap bini khik piah chiêng, jeik meng kan, dom pandap hu yaom glaong piah rik daong khik caga ilamo bangsa di puk palei./.

Urang lang: Thu Thao – 02/07