Amuk Lý Thị Lý dalam blah khan ao meng kan di bangsa Khmer haong dom anek taco tagok baha Candaransi di Quận 3, ban raya HCM meng biak aval. Ia mbaok hadah hadai, amuk Lý chreih chrai brei thau, thun ini sang amuk taduan raok Tết pataom gauk hadei di 3 thun jit ruak COVID-19, anek taco nao ngak mbang atah, oh mai sang hu:“Taduan raok Chôl Chnăm Thmây, sang dahlak hulin hu ngak salao lisei da-a muk kei, ngak pei nung, ngak ahar bhum ba tagok baha, da-a ong bhik mai sang cầu siêu ka ong muk, ong kaok ong kei, likau siam mekre salamat ka dom menuac dalam sang. Tết thun ini bui sambai lo kayua hadei di jit COVID-19, sang dahlak daok hu prein yava khang kajap. Thun bahrau dahlak caong hu diukrai dalam haniem phul, likau ka abih menuac dalam sang saong abih menuac sia dalam negar hu diuk dalam bui sambai, haniem phul, saong hu rilo prein yava, yaok menuac urang hu rik daong rilo bruk siam mekre, kein laba ka rahra, ka puk paga, palei negar”

Tết Chôl  Chnăm Thmây thun ini dalam 3 harei, lac harei 14,15 saong 16 bilan 4 saka ia harei, saong dom harei ini, urang Khmer bhian pataom gauk di baha. Pak di baha, dom Chư tăng peih ngak dom adat raok Tết. Taduan raok thun bahrau di baha Candaransi,  sinh viên Danh Út Việt, palei daok di Kiên Giang, daok bac thun ka 3 sang bac Đại học Nông Lâm TPHCM khan lac, bruk caong khin di adei, lac thun ini amaik ame, adei sa-ai, gauk gar daok di palei tuk halei jeng hu siam mekre, salamat, khang kajap prein yava:“Dalam dom harei thun bahrau ini adei caong ka sang drei hu haniem phul, tadhau ayuh ka mikva puk paga hu prein yava khang kadang, siam mekre salamat. Tadhau ayuh dom dam dara urang daok ranaih umo thun, hu jak jeng dalam bruk ngak. Adei jeng caong ka rup drei hu bac tamat dalam thun ini saong jak jeng dalam bruk hit hadei ini”

Tui Hòa thượng Danh Lung, Phaok akaok mban Trị sự Giáo hội phật giáo VN ban raya HCM, urang iek glang khik ramik baha Candaransi, piah ka Tết  Chôl Chnăm Thmây rah tabiak dalam praong prang, tani tanat, njauk haong ilamu meng kan di urang Khmer, dom chư tăng hu ngak salah abih bruk caga ka  tết dahlau jaik 1 bilan. Taphia nan, piah ka chư tăng saong dom phật tử hu taduan raok Tết dalam bui sambai, mBan trị sự baha Candaransi pambuak haong UBND Quận 3 peih ngak rilo bruk ilamu, daoh tamia, dom kadha me-in  thể thao, abih di nyu lac pakacah ghe ngo angaok ribaong Nhiêu Lộc - Thị Nghè ... tapa nan, pambuak pakajak jang talei jum pataom abih bangsa daok di ban raya HCM. Tết Chôl Chnăm Thmây thun ini, Hòa thượng Danh Lung, Phaok akaok mban Trị sự Giáo hội phật giáo VN ban raya HCM, urang iek glang khik ramik baha Candaransi caong ka taong abih bangsa jeng jum pataom gauk:“Raok 1 thun bahrau, yam tapa umo thun bahrau, hu makna ka kol drei tagok umo thun taha. Piah patagok hu umo thun taha, kol drei oh caik ka ruak kik rup pabhap, ruak kik hatai sahneng. Kol drei njauk padang ka drei jalan diukrai siam, meyut meyau, ndom puac siam haong menuac sia daok jaik taphia drei saong pasang iek hu bruk ngak di drei. Kadha praong abih bo dahlak caong khin payua tal phật tử lac kol drei kham merat patagok hu bruk jum pataom, daong gauk. Yaom lac kol drei lac bangsa hagait, jeng brei jum pataom gauk, ngak hu yau nan, tết Chôl Chnăm Thmây meng hu makna".

Dom salih bahrau biak siam dalam raidiuk di yaok baoh sang saong bruk ba tangin tame daong prein di abih bhap bini hu daong pabak jang bui sambai dalam harei pataom saong dom ragu tamia Roam-vông di urang Khmer daok di ban raya HCM hu chreih chrai jang dalam tuk Tết Chôl Chnăm Thmây thun ini./.