Bản Kéo, xa Pá Khoang, ban Dien Bien Phu, tinh Dien Bien hu taong abih 100% urang bangsa Khơ Mú, gam haong labaih 90 baoh sang dan haong 500 pabah mbang. Urak ini dalam palei daok khik bruk ngak pak gak di urang bangsa.

Tui urang bangsa Khơ Mú, pak agak ieu lac sa bruk ngak hu meng lawik dhua, nyu ja oba meng jaman dalau tal jaman ini tui jalan “ama jao ka anak".

Meng jaman dalau, rai diuk di urang abngsa Khơ Mú gam haong langik tasik. Mai meng phun kreim, huei, laa, hala haraik… tame tangin urang bangsa Khơ Mú ngak jeng ralo janih ndap nda ka dalam rai diuk ye: sọt, cangua, canaih, pot, la-i, yaot, pung jaip, dan karei karei… Dalam baoh sang urang Khơ Mú, thei jeng thau pak gak.

Piah hu dom janih ndap nda pak gak gheih siam karo kajap njauk hatai urang pak gak thau pilih gai huei. Yaom lac hu mbiah cagait min tapi njauk thau pilih ruah gai huei talei la-a oh taha, oh mada, oh kurang hujung kurang rup kurang thun bilan njauk nyu njauk tame dom harei abih dalam bilan, harei dalam maklam kayua “kreim akaok bilan rup raok hu ia mbuan si amaok mbang”. Huei ye mek talei huei taha, srao tagok glaong, hu sambo kanyik hitam atau hijau ka ganap mbuan si uak jeng ye klah di amaok cao. Urang Khơ Mú bhian blah kreim meng hujung trun daok huei la-a ye meng gok tagok jung.

Cara pak di uarng Khơ Mú jeng hu ralo janih kadha. Urang jang pak pilih ndap nda bo daok dang tui njauk janih di nyu. Pagap ye cangue haong dom pandap karei karei...ye pak sa, pak dua, pak o pak mata yau Yuan lac lóng mốt, lóng đôi, đan ô vuông. Daok pak talam kahlao huak sei ye pak cagal, pak tui binguk baok tram piah mbuan pak bingu di nyu

Tapi min urak ini, bruk pak gak tui ilamu yau mukei bangsa Khơ Mú dak harei dak mboh jua, dam dara oh hu daok ralo urang takre tui yau amaik ame ong muk drei; harei ini ralo takre pandar dom janih ndap nda hu sagait, ndap nda ralo saik saok, oh cang pak gak abih ralo masa dan prein yawa.

Ong Quàng Văn Hặc daok di bản Kéo, xa Pá Khoang, ban Dien Bien Phu khan lac: Pak gak di urang Khơ Mú ieu lac bruk ngak hu meng lawik. Dahlau diah drei bac magru nyu di ong mei amaik ame di drei, tal ini labaih 60 thun blaoh. Piah daong khik ilamu pak gak di bangsa drei, palei bản Kéo padang hu klup pak gak tui ilamu bangsa gam haong labaih 20 urang, ralo abih dalam nan urang taha dalam palei. Urang taha bhian daok pak piah pandar dalam sang jeng ye pato padar anek taco di drei.

Bangsa Khơ Mú daok di bản Kéo khi bruk pak gak tui ilamu di drei mboh siam mboh gheih mboh njauk khik ramik yaih yaom, brei pato padar, brei pacei pachreih hatai ranam ialmu khik caga ndap nda kaya kan bruk ngak tui ilamu bangsa klah brei nyu jua nyu lahik tui masa thun bilan. Gam tui di nan njauk ayaih, njauk khan pasiam pagheih ilamu ndap nda bangsa bhum baok palei pala taneh ia di drei brei patagok ekonomi radiuk dak harei dak tagok siam makre di palei./.