Urang Thái bhian pataom gauk piah mbang nduik 

  Tui adat cambat tanarakun, urang Thái Tây Bắc bhian huak lisei nduik, gam song njam rabung, boh karaoh hu tuk tasak dalam gaok. Kayua yau nan ye, dalam sang urang Thái, sang halei jeng hu gaok nduik, nao gam hong boh gaok ban - Ninh đồng (sit kreh, raak pabah saong mbat), dreih yau sa boh nồi hơi pabak hơi ia piah ngak tasak brah nduik atau pandap mbang dalam gaok ndiuk. Langiu di nan, gaok nduik, gaok ban dok hu mong yau sa janih pandap quý oh kurang hu bo dom amaik ame urang Thái kuhria caga ka anek likei tuk prong, nao tok diuk, tabiak daok karei. Ong Tòng Văn Hịa, dok di palei Mòng, xã Hua La, ban  Sơn La, tỉnh Sơn La, urang thau cambaih ka adat cambat tanarakun di  urang Thái brei thau:

“Ngan song urang  Thái, ngak sang lac brei hu boh gaok ban, gaok ndiuk. Tuk anek likei tok duik, tabiak dok karei, amaik ame halei jeng blei ka anek boh gaok ban, gaok ndiuk yau sa drap ar ba nao ka diuk. Song gaok nduik camereip hu tanek pak di sang bahrau di anek likei, anek metau kumei, cong khin ging pui di sang tuk halei jeng meriah bhong pui, trei sir, ginup meda, haniem phol. Boh gaok ndiuk oh lac pandar piah tanek ndiuk, tanek lisei, bo dok lagaih piah tuk njam, rabung, boh karaoh halei mbang lagaih song nduik jeng hu pandar tal. Nan ye, yaok sang urang Thái jeng oh kurang hu gaok ban, gaok ndiuk”.

Dahlau deih, gaok nduik hu ngak meng kayau prong tamo, janih kayau nyuak dẽo, oh talah, oh kavong, cao gilaong huan gah dalam, gaok lipih, jangaih meng gah dalam tal gah langiu. Gaok gul, mbat sit jang cambuai. Min, urak ni, kayua kayau takik hu song abih rilo tukvak piah ngak salah sa boh gaok kayau,  mikva hu ngak gaok nduik meng kreim laa  salih ka gaok kayau, nyu mbuan ngak saong lagaih pandar, yaom jeng lap jang. Min, oh lac urang halei jeng thau pak gaok, kayua brei hu tangin gheih, tani tanat meng bruk palih ruah tal kaoh kreim, pambu pandiak tal bruk pak, ngak jeng boh gaok. Ong Tòng Văn Hịa, jeng lac urang hu bhian pak gaok kreim  brei thau:  Piah pak gaok kreim brei palih phun kreim la-a (ieu lac Mạy Mây) atah, tapak, phun kreim taha, oh njauk maok mbang, oh njauk jaoh jhung. Kreim hu ba mai kaoh jeng mbaik sit, kuah jangaih, pak jeng  2 tal: tal langiu gai kreim sit, pak biak tani tanat, ngak ka nyu kajap, mekre, tal dalam gai kreim praong jang, khang jang tal langiu min jeng brei kuah ka nyu jangaih, piah tuk nduik tasak, dẻo oh gam tame gaok. Daok tal kreih hu tauk sa tal kadung dứa hacih atau tal tanyah piah khik pandiak. Nan ye, piah pak sa boh gaok jeng abih meng 2 tal 3 harei.  Gam song gaok nduik, brei hu vỉ tauk gaok hu pak meng kreim liman lapih, hu caik tame gah dalam, ala mbat gaok  piah tuk buh brah tame, asar brah oh laik trun hu bo hơi ia  dok par tagok hu, ngak tasak. Muk Tòng Thị Biên, Po nhà hàng pablei dom pandap mbang bangsa Thái di palei Mòng, xã Hua La, ban  Sơn La brei thau:

“Hulin peih nhà hàng pablei dom pandap mbang bangsa, kayua yau nan ye, boh gaok ban, gaok ndiuk oh kurang hu piah tanek nduik ka tuai, tahanek lisei huak yaok harei di sang”.

Urak ni, gaok nduik pak meng kreim hu mikva ba nao pablei di dom drak pasa bhum glong atau parang pablei di dom labik pablei yot, pandap kreim laa,  khan bai bangsa. Yaom piah ngak yaok gaok nduik pak meng kreim lac meng 150.000-200.000 đồng, dalam tuk gaok nduik meng kayau yaom meng 300.000-500.000đ tui gaok prong atau sit./.

Urang lang: Hanipha- 2/11