Bảo Lạc lac huyện bhum glaong di tỉnh Cao Bằng, daok di tapen kraong Gâm, kraong Neo biak mekre. Darak di ban sit Bảo Lạc nan lac thaok binguk pataom veik sit ka raidiuk di bhap bini dom bangsa labik ini, ngak jeng ilamu gheih mekre.

Lac darak praong di bhum gah Pai di tỉnh Cao Bằng, darak Bảo Lạc hu pren dui pachreih tuia damuai. Darak hu peih pablei salih dalam 5 harei sa mbang. Pandap pablei lac njam glai, dom drei manuk, pabui kayua mikva ba mai ini pablei. Darak daok hu dom drei ikan that daok mbau gluh kayua mikva birau chap mek meng kraong tagok, dom akok rabung, baoh ấu, bei hluk, yaot tangei, bloi, dom kalok ia hani ia danko katam kanyik caik dalam bai biak pachreih meta.

              Tui Mban khik iek darak, bruk pablei salih di drak Bao Lac rilo jang dua mbang dut saong dom darak karei. Langiu bruk mikva pablei dom pandap pandar yaok harei ye darak ini daok lac labik pataom biak rilo pandap di urang pablei salih piah pajeng nao labik karei pablei yau ye: tangei, pachut thu, ha thủ ô, limo, kubao, pabui, manuk…

          Nao darak lac tuk piah ka dom urang kumei bangsa cuk ngui dom blah khan ao bahrau ginup sambo mau. Hadah tanyak dalam blah khan xòe bingu, dom urang kumei bangsa Mông pan payong cang ayut di drei. Dalam dom urang nao darak, dom kumei dara bangsa  Lô Lô, Sán Chỉ angui cuh khan ao bhong, juk, katam kanjik rik tame ngak ka darak ini mekre jang. Dom urang kumei bangsa Nùng, urang Tày kak kaok siuk mỏ quạ samar cambuai da-a urang blei pandap panda, khan ao, tanyiak khan bai, merai.

               Mai darak dom thun jaik ini, tuai damuai mboh hu bruk salih birau dak harei dak  ralo dalam raidiuk  urang bangsa takik di huyện Bảo Lạc, min darak Bảo Lạc oh lahik nao dom ilamu siam gheih di nyu lac darak bhum glaong./.