Dam dara bhum Tadaok daoh Then 

Umo 78 thun, Nghệ nhân ưu tú Lưu Đình Bạo, palei Quan Nưa, xã Dương Quang, ban sit Bắc Kạn, tỉnh Bắc Kạn hu 38 thun kak kajap haong then. Lac sa “Gru Then” hu angan dalam bhum, ong lac: Then lingiu di adat cambat gah tâm linh, daok lac ilamu, lac suan yava di bhap bini daok pak ini: “Then hu pok angan yau ini dahlak mboh bui sambai lô, bruk di dahlak hu pok angan yau nan ngak ka dahlak mboh hu prein yava jang piah patoa veik ka anek taco saong rilo rairah hadei. Dahlak oh patoa hu, anek di dahlak oh patoa hu ye harei hadei nyu lahik nao".

Nghệ nhân Mã TrungTrực ndih tapui tabiak saong praong tagaok di labik hồ Ba Bể, tỉnh Bắc Kạn.  Lac sa nghệ nhân hu angan haong sap daoh lai la-an gam saong tangin paik capi biak bingi pang meng dom mbaik capi di sa-ai ngak, sa-ai daok hu padang dom kalup kapul daoh then capi tính, gam piah khik then, gam pamere tuai mai ravang iek hồ Ba Bể. Baoh sang tual di sa-ai jeng lac labik peih dom tal pato paik capi, pato daoh ka dom dam dara, uraniah saong dom menuac takre then tính dalam bhum, 2 diuk pasang sa-ai jeng lac gru pato. Anak bruk mehit lac Adat ngak Then hu UNESCO pok angan, nghệ nhân Mã Trung Trực brei thau: "Dahlak lac menuac khik ramik ilamu daoh then capi tính saong pato daoh  then capi tính, dahlak mboh bui sambai kayua rai ranaih urak ini biak sangka tal bruk ini. Nan jeng lac bruk pachreih ba dahlak pato veik rilo jang dom hagait drei thau ka rai ranaih harei ini".

Lạng Sơn jeng lac 1 dalam dom pasak di Then. Dalam tỉnh hu jaik 100 kalup kapul daoh then di Kapul khik ramik ragu daoh bhap bini dom bangsa tỉnh Lạng Sơn. Bruk kham merat piah adat ngak Then di urang Tày, Nùng, Thái hu pok brei angan lac Inem krung ilamu phi vật thể lambaok di menuac sia dunya lac kan, khik ramik saong patagok hu yaom glaong di  inem krung lac bruk trak jang. Ong Phan Văn Hòa, Phó giám đốc Sở Ilamu, Thể thao saong Du lịch tỉnh Lạng Sơn lac:"Hu iek praong yau ini piah ka kol dahlak patui bruk khik ramik, patagok daoh then dalam tỉnh. Nan lac tacei pato dom pasak ilamu thể thao saong truyền thông, Jabat ilamu brei thau dom huyện, ban piah ka urang tacei pato tal kalup kapul di xã, ban sit, puk plaei patagok dom lagu daoh then dalam tỉnh".

Sa rai kak kajap haong Then, NSND Triệu Thủy Tiên – dahlau daih pan akaok kapul Nghệ thuật tỉnh Lạng Sơn, urak ini lac Phó Chủ tịch Hội  khik ramik ragu daoh bhap bini Lạng Sơn jeng daok kham merat piah ngak brei Then pambak praong dalam raidiuk.Amuk hu biak ralo mbang ba Then trun Hà Nội parang me-in: “Ba then trun phố lac caong khin di rilo menuac, abih di nyu lac dom urang takre daoh then yau kol dahlak. Ba then trun phố jeng lac tuk piah yaih khan dom yaom glaong di daoh then. Bruk pachreih tui di khán giả ban ine, di dom tuai damuai negar lingiu daok di ban ine mai maong iek, kol dahlak mboh urang biak takre. Meda ndom lac, yaom glaong di daoh then daok hu pambak tabiak”.

Meng hatai takre, dom nghệ nhân, nghệ sĩ daok kham merat ba daoh Then nao jaik jang haong bhap bini harei ini, daong ngak brei Then Việt Bắc pambak praong, tagok glaong./.

Urang lang: Musa Phương - 12/1