Urang Cam hu panuac pandit lac: “Chăm sa-ai - Raglai adei”. Makna lac urang Cam lac sa-ai kamei kacua, daok urang Raglai lac adei kamei taluac dalam sang. Tui adat cambat di gah mẫu hệ, anek kumei taluac dalam sang hu quyền mbang varis di amaik ame caik veik, saong brei iek glang, duh lisei ia ka amaik ame tuk taha. Yau nan ye, meng kan mai, urang Raglai dang tabiak khik piah khan ao di patao bia saong dom janih pandap paling yang angaok bimon di bhap bani Cam. Tui nan, tal harei Katê yaok thun, bruk gul pataom di urang Raglai saong urang Cam dak khang kajap jang, caik veik rilo siam mekre dalam hatai manuac sia tuk hu mbaok tame kate.

Lac urang hu angan je dalam palei nan ye ong Lộ Minh Trung hu mban adat cambat palei Chăm Hữu Đức, xã Phước Hữu, huyện Ninh Phước, tỉnh Ninh Thuận brei ba dom lễ vật nao taom gaok urang Raglai. Ong nao tapa jalan jaik 30 km tal palei urang Raglai daok di xã bhum ceik Phước Hà, huyện Thuận Nam daa mikva, pagul harei siam ba khan ao di po klaong trun ceik hu mbaok mbang Katê haong urang Cam. Ong Lộ Minh Trung, palei Chăm Hữu Đức, xã Phước Hữu, huyen Ninh Phước, tinh Ninh Thuận brei thau. “Nao tagok angaok ini mikva taduan raok biak abih hatai, ngak jeng bruk gul pataom, pambuak gauk khang kajap yaok thun. Gaok gauk chreih bui nan ye dahlak mboh biak drut droi dalam hatung hatai, hatung hatai bangsa, adei sa-ai dalam halau gha. Kayua yau nan ye, harei Katê nao tagok angaok ini dahlak mboh biak drut droi”. 

  Ong Chamaléa Thép labaih 20 thun hu but pajaih brei khik piah khan ao saong pandap panda paling yang angaok bimon. Sa thun sa mbang, tal harei Katê ye but pajaih di ong Thép ba khan ao trun ceik jao ka urang Cam piah ngak adat. Ông Chamaléa Thép, Thôn Giá, xã Phước Hà, huyen Thuận Nam, tinh Ninh Thuận, khan lac:  “Lavik lavik meng hu Ka tê. Ame lahik, meng caik veik ka dahlak khik piah, oh caik lahik khan ao. Dahlak metai ye jao veik ka but pajaih. Thun halei jeng uan raok Katê.”

Angaok jalan nao, tuk nao gal tapa bimon Pôrôme, kapul urang Raglai dang veik padeih padei, ngak sa adat pathau brei Po patao thau lac khan ao di Patao daok angaok jalan ba trun palei Cam Hữu Đức saong caong Po pathau daong brei kapul nyaom nao hu siam mekre, samu tuk piah gam haong urang Cam ngak adat raok khan ao peih ngak dom adat di harei Katê. Ong Chamaléa Ơi, Xã Phước Hà, huyen Thuận Nam, tinh Ninh Thuận brei thau: “Urang Raglai hu nao tal bimon Pôrôme. Urak ini si nao tal bimon Pônưgar. Urak ini gam padeih, gam paling Pôrôme likau ka jalan nao, jalan mai.” 

Tuk kapul ngak adat Kate di urang Raglai mai tal palei Hữu Đức. Urang Cam labik ini thei jeng bui sambai ngan haong hala dok, ginang ceng, saranai saong brei urang lambaok dom halau janeng, dom urang taha, urang hu angan je saong dam dara likei kumei angui cuk khan ao bahrau piah tabiak raok daa.

  Lambaok ka halau janeng, peih ngak adat taduan mek khan ao saong taduan raok kapul urang Raglai dalam praong prang yau taduan raok gauk gar nao atah sang lavik harei bahrau mai veik. Tui dom urang taha khan veik, meng kan bruk iew Yang harei Katê angaok bimon nan kayua urang Raglai dang tabiak ngak, urang Cam tok daong bruk, daong dom pandap karei. Gru harei Hán Dậu, daok di palei Chăm Hữu Đức, xã Phước Hữu, huyen Ninh Phước, brei thau: "Katê thun ini mikva Raglai mai, urang cam biak uan saong bui sambai ralo. Mikva Raglai mai, pak ini raok, 2 gah biak bui sambai. Mong yau Katê gul pataom.”

Melam akaok mereip daok pak palei Cam, urang Raglai ba dom janih pandap di drei yau drei munek, blaoh ploi, baoh lahong, baoh kadhaoh saong hala paneng ngak pandap alin brei ka urang Cam. Urang ba gauk mbang menyum, bak hatai anit ranam gauk. Saong dalam melam pataom adei sa-ai Cam saong Raglai. Urang alin brei ka gauk dom kadha daoh take,, sap yava daniey ceik glei meng sap Mã-la saong sap kèn bầu Katek. Dak lavik melam, men alak dak njaom tame sap Mãla yau suan yava di meng kan hu mai veik haong harei ini. Sap di Mã la saong đàn Rakle lai tame gauk yau ndung bak hatai anit ranam di urang Cam saong urang Raglai. Sa-ai BàRá Thừa, daok di palei Giá, xã Phước Hà, huyen Thuận Nam, tinh Ninh Thuận, brei thau: "Tapa ini, kapul urang Raglai daok veik ini sa melam piah ngak adat Katê. Kapul urang Raglai ba alat ragamn meng kan yauu Mã la, kèn bầu piah ngak brei chreih chrai jang dalam harei Katê”

Meng page mesup, tuk sap menuk kanjhot, urang Cam saong urang Raglai ba gauk tagok bimon piah ngak adat. Dom ilamo di Katê hu rah tabiak di angaok bimon kalan hu mbaok ngak adat di urang Cam saong urang Raglai. Katê jeng hu rah tabiak dalam sa harei saong gam sa tukvak ngan haong dom adat cambat dreih gauk yau adat peih pabah mbang bimon, adat menei ka rup patau, adat cuk khan ao ka rup patau, adat paling pandap ka yang saong adaoh tamia. PGS. TS Trương Văn Món, sang bac Đại học KHXH saong Nhân văn bal raya HCM brei thau: “Urak ini, urang jeng daok khik adat. Taong abih dom bimon jeng ngak adat dalam sa tukvak. Tuk nan, urang iew lac tuk ginreih. Tui dalikan, urang Cam saong urang Raglai lac adei sa-ai ye dalam tuk ginreih nan njauk hu mbaok urang Cam saong urang Raglai. Uan jang tra, tapa nan daok hu gam urang Yuan ye jeng brei mboh talei gul pataom  biak siam.   

  Katê oh njauk lac piah ngak adat soang pok paglaong dom ilamo meng kan bo daok lac tuk gul pataom hatung hatai di urang Cam saong urang Raglai. Tapa nan, mboh hu dom yaom glaong ilamo di 2 bangsa tuk halei jeng kak kajap dalam dakrai sajarah cakrok patagok di dom bangsa Việt Nam./.