Dalam 2 harei, harei 11 saong harei 12/2, di ban sit Gia Nghĩa, Ub bhap bini tỉnh Đắk Nông peih Hội xuân Liêng Nung thun 2017. Hội xuân hu brei mboh veik rilo adat cambat di mik va bangsa M'Nông, Mạ yau: adat raok ayhut,  adat Iun Jông (dok ieu lac adat pambuak talei rohim) adat paling yang apui, rija likau hajan siam hangin lagaih… song hatai cong hu siam mekre, salamat dalam thun bahrau, bala drak njauk. Dom adat cambat ini brei mboh jalan diukrai iek prong langik tasik, yang mebhang song paprong bruk anit ranam gauk. Taha K Bi di  buôn Bu Sóp, xã Đắk Nia, ban sit Gia Nghĩa lac

 “Khol drei njauk taom gaok gauk piah bac megru song ba gauk khik ramik, abih di nyu nan lac ngan saong dom bangsa dok kurang ilamu, oh thau hu, piah bac megru  gauk song khik ramik adat cambat tanarakun siam merke abih di drei. Meng nan, đảng song karja njauk sangka khik ramik ka anek taco harei hadei.

Mai tal Hội xuân tuai damuai dok hum bang dom janih pandap di mik va dom bangsa takik yau lisei lam, ikan padoc , rilaow pabui am, ia bai thụt, hala bép, caduk havei glai….

Amuk Tôn Thị Ngọc Hạnh, Phó akaok  UBbhap bini tỉnh Đắk Nông brei thau, Hội xuân Liêng Nung lac sa dalam dom bruk ngak tui Đề án khik ramik, patagok dom yaom glaong ilamu - Lễ hội - Hoa văn - Cồng chiêng song alat ragam bangsa di tỉnh.  Ni jeng lac tuk piah ka labaih 40 bangsa adei saai dalam ban sit Gia Nghĩa hu taom gaok, ndom biai song tuai damuai, tapa nan yaih khan ilamu saong anek menuac Đắk Nông.

 “Hội xuân Liêng Nung 2017 ngan saong kadha “Tinh hoa hội tụ” nyu brei mboh ilamu siam mekre meng kan di dom bangsa, abih di nyu nan lac bangsa di labik. Ngan song bhum Nam Tây Nguyên, dom bangsa di labik, lac bangsa Mạ, Ê Đê, M’Nông, yaok thun khol hulin jeng hu peih ngak yau hội xuân piah kak kajap talei rohim, peih tabiak labik ka mik va main sambai saong hu taom gaok dom ilamu karei.

Hội xuân Liêng Nung di Đăk Nông oh lac patom hu rilo ilamu gheih mekre, bo abih di nyu nan lac dok paglong hu hatai anit ranam gauk, jum pataom gauk dalam rai duik di dom bangsa adei saai./.