\Meng harei 15/12/2025 tal 14/3/2026, Kong an ban ine Ha Noi duah mboh 3 mbang ngak duas hu 58 urang negar langiu pambuak tal dom bruk chot pagat blah mek drap ar jien padai, peih bruk me-in mbia di angaok mang saong tame negar suan hukum. Tapa pasang duah hu mboh, dom kol duas bhian kayua urang pan akaok di negar langiu tacei ba meng atah, pambuak haong dom urang di Viet Nam piah pah labik ngak bruk, rilo meng lac di dom sang chung cu, labik sang daok glaong pakat hu rilo menuac urang negar langiu diuk rai piah plaih mblo bruk di nyu. Khol nyu caga srap gap majam komputer, simbox, smart phone duh ka bruk ngak suan hukum.

Hadei di tuk ruah dom labik, dom kol duas kol bleik ramik caga sa “urang pasang iek” lac urang negar langiu tapak dui ba di Viet Nam, gam haong di nan ba urang tame meng visa jirah rivang piah ngak bruk chot pagat atau peih bruk me-in mbia. Njauk caik hatai lac, kapul ini bhian oh taong tame urang Viet Nam blaoh pamaong tal urang daok di langiu negar piah plaih bruk taong bhat hinh su dalam negar.

Sa bruk bahrau hu duah mboh di harei 18/3 di dom jabat di ban Trung Kính (phuong Yên Hòa). Kapul ngak bruk di jabat hu cap mek kareik 51 urang, dalam nan hu 43 urang daok di langiu negar (negar Cina, Korea dan Philipin) gam saong 8 urang nagar Viet Nam. Kaya pataom khik hu riko komputerm kaya sim saong kaya papar Wi-Fikhang catang.

Tui panuac calei khan, dom urang pandar rilo bruk padauk yau pah urang Viet Nam dang angan padang kongti, mbaoh tangin pah jabat dalam jalan sit, pandar “urang kak jien je” piah plaih mblo mbaok. Tukvak ngak bruk rilo meng lac meng 20 tuk harei diah tal 9h harei hadei piah njauk haong tuk di My saong chau Au – labik bo kol ini taong tame urang, gam haong nan ngak jeng kanduh pacang lac “sang oh hu manuac urang” dalam vaktu harei.

Brei ka bruk pachot paluo bleik blang, kol bleik padang tabiak website ngak ja ngak lau bruk buh jien tame ka jien padai yau ye website zozotrade.com, yaih khan tapa mang xa hoi piah pachreih urang tame. Tuk hu urang, kol nyu pandar dom ung dung pandar yau ye WhatsApp, Telegram pambuak haong dom janih ndap nda lang sap saong glo akaok tri tue nhan tao piah pambuak haong urang, mek hatai je saong dui plue ba tame tui kadha hu caga dahlau di nyu.

Tuk akaok di nyu, urang meda mboh laba sit piah palue mek hu hatai je di urang. Tuk jien buh tame tagok glaong, meyah khin mek jien nan, kol nyu brei ba tabiak rilo makna piah dui suai atau pandar pabak jien tame. Tal tuk urang oh daok jien piah buh tame, dom urang nan cakak klaoh abih bruk pambuak ndom meyai atau payua harak saong blah mek taong abih jien padai drap ar. Di dalam labaih sa bilan, kapul kol ini palue pachot pagat labaih 300 urang, blah mek jien labaih 300.000 USD.

Dang di anak bruk nan, jabat kong an hu peih ngak rilo bruk caga, duah mboh saong taong bhat dom bruk ngak suan hukum saong tapa negar. Gam haong nan pachreih kakei rahra, abih di nyu nan lac dom urang brei pah baoh sang, brei paglaong bruk caga, dil samu duah mboh saong pabak khau tin ka dom bruk medil ka jabat chuc nang piah taong bhat tui adat hukum./.