Harei 26.2, Kong an xa Đạ Huoai, tinh Lam Dong brei thau, labik bahrau khan kakei caga tal rahra ka bruk palih ruah urang nao ngak bruk suan hukum di nagar Campuchia haong dom panuac yaih khan dui pachreih.

Tui Kong an xa Đạ Huoai, tukvak tapa, labik hu taduan meng Kong an tinh Lam Dong saong jao 3 urang njauk gah Campuchia tiaok mai ka baoh sang pasang iek, pato pakai.

Dom bruk ini jeng njauk urang plue meng khau tin palih ruah di angaok mang xa hoi ngan haong panuac ieu da-a yau ye “bruk njuel, jien bilan glaong”, oh khin cang hu ilamo bac magru, harak gal hagait.

Gam saong bruk ini, dom kol bleik pagun sanya bayar jien nao mai, ngak harak gal, gaok mai daong ba tabiak negar langiu suan hukum ka urang tut angan.

Min, hadei di tuk tapa tal nagar Campuchia, dom urang mabuh njauk pachot pagat njauk ba tame ngak bruk di dom kapul peih bruk chot pagat yau ye me-in mbie online, pablei salih jien oh biak, pablei kaya online di angaok mang.

Urang njauk pachot pagat njauk kateik geik ngak bruk meng 12-16 tuk yaok harei, patakik nao mai. Rilo bruk daok njauk kateik pandar taong phone mai ka baoh sang pandar bayar jien pabuh piah hu mai sang.

Tapa bruk ngak tantu cambaih laih, dom kol bleik salih bhian ba tagok khau tin palih ruah angaok Facebook, Zalo, Telegram, TikTok… piah pachot pagat dom urang hatai mbuan je tame.

Dom asal kadha yaih khan bhian ba tabiak yaom jien mek tame meng 25-40 trieu dong/bilan, oh khin hu harak ilamo, hu daong mbang huak ndih daok, pato bruk oh mek jien.

Min, biak nao lac tuk nao tal tabik, urang njauk kateik geik bad rei tame dom bruk chot pagat; meyah oh mek hu tanut ye njauk gham, taong paoh, taong bhat jien.

Kong an xa Đạ Huoai pachreih kakei rahra caik hatai caga tani tanat anak dom panuac ieu da-a nao ngak bruk di Campuchia atau negar langiu oh thau tantu gok gha di nyu.

Rahra brei duah thau tani tanat pilih ruah khau tin, gah ngak mbang pablei salih saong labik ngak bruk; oh je tame dom panuac sanya oh njauk lagaih.

Tuk mboh dom kol yaoh khan ngak, dui palue harak ba tabiak negar suan hukum, brei dil samu khan tal jabat kong an piah hu ngak tantu, langyah njauk tui adat hukum./.