Bảo hiểm xã hội (BHXH) ban Hà Nội brei thau, bahrau ini, amuk T. (umo 78 thun) daok di quận Cầu Giấy (Hà Nội) taduan hu phone ieu mai meng sa urang mek angan lac urang jakar ngak di Gilang pariak karja quận Cầu Giấy.

Urang ini brei thau, amuk T. lac sa dalam takik menuac patuah taduan hu pok pandap lac 20 triệu đồng jien mbaok, kayua blei BH y tế lavik thun. Piah taduan hu pok jien nan, amuk T. brei bayar 1,1 triệu đồng jien sahui, hadei di nan, amuk hu alin brei veik 2 pa-op ia tasau yaom 900.000 đồng. Jien sahui 1,1 triệu đồng hu yar ka menuac ba 2 pa-op ia tasau mai ka amuk.

Tuk amuk T. tangi sua lac jien thưởng hu taduan mek yau habar, menuac bleik pachot ndom lac hu Yam ndok saong kế toán di jabat ba mai brei tal sang. Hadei di nan, amuk T. nao tal Gilang pariak karja quận Cầu Giấy likau taom gaok tapak menuac ieu phone ka amuk, min nyu oh tabiak mbaok haong makna lac “daok padeih adat”. Mboh medil, amuk T. nao tal BHXH quận Cầu Giấy piah duah thau saong hu urang jakar di pak ini brei thau bruk di muk T. lac oh biak.

Tapa bruk ini, amuk Nguyễn Thanh Kim Huệ - Phaok Yam ndok jabat BHXH quận Cầu Giấy brei thau, hadei di tuk taduan hu panuac khan di bhap bini, jabat ini samar pathau khan bruk nan tagok BHXH ban Hà Nội. Gam haong nan, kakei bhap bini paglaong hatai sangka anak dom bruk bleik, pachot, pagat dak harei dak srau kadau. Gah BHXH oh ieu phone ka bhap bini pambuak tal bruk bayar jien atau brei pandap.

Tapa bruk nan, gah BHXH kakei bhap bini paglaong hatai sangka ank dom bruk bleik pachot tapa ieu phone, tin nhắn, mạng xã hội,…, bhap bini tok duah thau dom khau tin tapak di BHXH.

Tuk hu khau tin halei oh cambaih meng dom menuac oh krein, oh randap pambuak tal bruk BHXH, BHYT, BH lahik bruk ngak, mikva nao tal labik BHXH daok jaik abih piah hu daong brei, atau Tổng đài sangka tuai damuai di BHXH Việt Nam 1900.9068.

Ndom ka bruk bleik pachot tapa mạng, Kong an ban Hà Nội brei thau, tukvak jaik ini, angaok facebook hu tài khoản ja mek angan “Học viện An ninh bhap bini”, daong dom urang njauk lah pachot pagat tapa mạng. Pambak tame bruk dom urang njauk lah pachot caong mek hu veik pok jien lahik blaoh, kol nan mek rup thaot di Học viện An ninh bhap bini brei ka urang jia tame, khan lac daong dom menuac njauk lah pachot mek veik jien.

Tapa nan, kol bleik nyu ieu urang buh jien sahui piah daong bruk atau tacei suak mek jien tual angaok hệ thống. Tuk hu menuac payua jien, kol nyu ndom lac tài khoản gilang pariak khut saong oh brei suak mek jien.

Gah Kong an hu panuac kakei bhap bini paglaong hatai sangka, khan brei gauk gar, ayut sahabat thau ka bruk bleik pachot pagat nan. Tuk mboh medil lac hu bruk pachot pagat, bhap bini samar khan brei gah Kong an thau piah hu langyah tui adat hukum. Jhui pang tui, oh ngak tui panuac tacei di dom blah mạng xã hội piah plaih njauk pagat di kol bleik pachot./.