Bruk blei saleik, pachot meblah mek drap ar tapa mạng 

Bruk bo rilo menuac njauk lah pachot di abih lac kol nyu mek angan lac công an, tòa án ieu phone khan brei thau lac urang nan hu gam tal vụ án atau “taong phạt la-an” bruk peih radaih suan jalan, ieu payua jien tame tài khoản di kol nyu ba tabiak piah duh ka bruk langyah. Tuk bhap bini huac saong payua jien tame tài khoản bloh, kol nyu ieu payua veik yaom jien nan tame rilo tài khoản karei blaoh meblah mek. Hu rilo bruk kol nyu meblah mek biak rilo jien, meng dom tỷ tal yaok pluh tỷ đồng.

Mek angan lac gah mạng viễn thông, kol bleik saleik nyu ieu phone khan lac laik phone di urang daok pandar nan hu njauk thưởng drap ar hu yaom biak praong, piah taduan mek hu drap ar nan, urang brei buh jien phí. Kol nyu ieu blei thẻ cào nạp tame dom tài khoản bo kol nyu pabak brei. Hadei di tuk bhap bini buh jien tame blaoh, kol nyu pacang cakak jalan ieu phone saong meblah mek yaom jien nan.

Sa jalan pachot karei jeng hu kol nyu pandar rilo dalam tukvak tapa lac mek angan lac gah điện lực, gah pabak ia hacih, khan brei thau lac daok kurang hóa đơn điện, ia saong ieu payua jien tame tài khoản di kol nyu ba tabiak, meyah oh payua ye njauk cakak điện, ia. Tuk urang jia tui, bloh payua jien tame tui panuac ieu di kol nyu, ye yaom jien ini njauk kol nyu meblah mek.

Mek angan lac urang jakar gilang pariak, kol pachot nyu ieu phone khan lac hu menuac payua jien tame tài khoản brei min kayua suan nan ye oh ka payua hu atau khan lac phần mềm payua jien di drei nyu khut… nan ye ieu drei brei thau mã số thẻ saong mã OTP piah pasang iek. Kol nyu mek dom thông tin bo drei bahrau pabak brei piah tame tài khoản saong suak mek jien di drei.

Pilih ruah urang pambuak bruk. Sa jalan pachot tra, lac kol nyu pagam pambak tame hatai mbuan jia saong caong duah jien samar di drei, pachot lac caong pilih ruah urang pambuak bruk langyah đơn hàng brei ka dom sàn pablei salih điện tử haong nduac quảng cáo, ieu drei pabak thông tin cá nhân, kết bạn Zalo piah ndom biai, tacei jalan. Tuk camereip, kol nyu payua jien hoa hồng ginup abih, min tuk nan lac yaom jien takik, sit. Hadei di tuk ngak brei drei jia tame, kol nyu lac “drei hu Cty brei tagok hạng" ieu drei payua jien tame rilo jang… blaoh meblah mek.

Gah chức năng hu panuac ieu bhap bini paglaong hatai sangka saong khan brei jabat Công an labik daok jaik di abih thau tuk gaok dom bruk yau nan./.

Urang lang: M. Phương – 06/08