Jaik di ini, dom mbang ieu phone pagait jien ngan haong makna lac “anek daok cấp cứu” jeng hu mboh meng TP.HCM tabiak tal Đà Nẵng, Hà Nội. Bahrau abih, pambak tame khau tin meng hadei di harei 31/3/2023, dom sang mạng meda kareik sa gah dom thuê bao oh dreih haong dom khau tin haong cơ sở dữ liệu negar ka rahra, kol tội phạm nyu rilo mbang nhắn tin gam haong jalan link hu virus, ieu phone tal urang pandar piah kateik greik, meblah mek khau tin di manuac urang.

Nan lac ka oh ndom tal dom bruk bleik saleih pagait pachot bhian gaok, urak ini jeng rahtabiak gilac veik, yau ye ngak ja tin nhắn di gilang pariak, mã OTP; ngak ja urang ngak gah sang mạng ieu kakei salih paok cước blaoh meblah mek drap ar, jien di dalam gilang paraik, ngak ja cảnh sát jalan mbak ieu kakei kak jien taong phat hadei; ngak ja jabat cảnh sát pasang iek ieu kakei kak jien piah klaak tapa dom bruk ngak suan; pagait lac njauk thuong, taong tame hatai takre, ye ieu kakei rahra payua manieng paok jien dahlau piah caik takai…

Yaom lac hu biak rilo jabat chức năng hu tabiak panuac kakei, min jeng hu dom urang ka oh bhian gaok dom kol tội phạm ini, daok mbuan jia tame ba tal khat lahik jien padai.

Kayua yau nan ye, gam gam khan brei thau veik lac bruk oh tuk halei labaih. Yaok urang njauk ngak catang tui jalan lac “Jhui samar jia saong tuk halei jeng brei duah thau cambaih laih”. Tuk taduan hu dom panuac ieu kakei di dom kapul, manuac urang, gam dom urang hu thau krien tapa phone, tapa internet, jhui peih ngak dom bruk tui panuac ieu kakei di dom urang nan chip, bo brei duah thau cambaih laih ka dom jalan ngak njauk adat hukum.

Dom bruk hagait tamuh tabiak pambuak tal laik chứng minh thư, căn cước công dân, harak thư điện tử, mật khẩu, mã OTP tài khoản gilang paraik, atau dom bruk ieu payua jien, kol drei oh ndem mayai nao mai, oh ngak tui panuac ieu kakei di dom urang nan bo drei oh krein tapa phone par tangin. Abih tih dom kapul nyaom, doanh nghiệp, kapul chức năng jeng hu jalan ngak, adat ngak tapak di pak labik giao dịch, labik taduan daong langyah ka rahra.

Mayah drei oh ngak cambaih hu bruk nan, dom kadha taduan hu tapa phone par tangin, njauk ieu gauk gar daong duah thau piah gam ngak cambaih laih saong langyah bruk nan, drei oh njauk eng drei langyah sa drei. Laik phone tapa jalan pandiak di dom kapul, sang mạng, doanh nghiệp, jabat chức năng, rajaei bhum palei jeng hu tauk cambaih laih, drei meda ieu phone piah ngak cambaih laih khau tin.

Tuk mboh medil lac daok ndem mayai haong dom kol pagait, njauk ghi âm veik mbang ieu, khik veik laik phone saong payua tal jabat công an labik jaik di abih, atau pathau khan tal laik 113, Blah brei thau salamat khau tin Việt Nam.

Yaom lac kol drei daok bui sambai chreih chrai tal halei, kol drei jeng mboh lac, dalam saman anek menuac taom gaok haong menuac sia dunya tok tapa phone par tangin, bruk online ngan haong hatai mbuan jia tame, tok pamaong tame dom bruk siam mekre mboh di anak meta, lac bruk mbuan ba tal rilo khat lahik. Kayua yau nan ye, yaok urang njauk caik hatai pacang caga, brei thau medil tuk hu phone ieu tame./.