Bahrau ini, di harei 25/8, sa nyaom 5 urang pang tui kol beik saleik angaok Facebook, nao tabiak negar langiu suan adat hukum. Tui panuac khan di dom urang njauk bala nan, nyaom urang ini hu 5 urang, meng dom tỉnh gah Barak, hu sa po tài khoản Facebook angan lac “Bin Bo” meyaih khan saong tacei pato nao tapa Đài Loan (Trung Quốc)  suan adat hukum piah duah bruk ngak haong yaom 6.500 USD sa urang saong tuk tabiak truh negar meng ba-yar jien.

Jala pandiak harei 25/8 meng blaoh, dom urang ini hu sa sruh radaih 4 baoh pajeng nao tal sa baoh sang glaong 3 tal di Campuchia. Tui tacei pato, dom urang ini tame padeih takai, hadei di nan hu gilai mai raok nao. Yau nan min, bahrau tame tal duk bilik padeih padei ye njauk labaih 10 urang blak tame pandar phao, ndao, to thaong, gai jre kateik greik kak tangin takai blaoh taong paoh saong blah mek abih drap ar: jien, phone pan tangin... Hadei di nan, dom urang njauk bala ini njauk neh rabha tabiak saong ba nao kareik di rilo duk bilik; gam gam njauk taong paoh saong quay video veik piah payua mai ka gauk gar di Việt Nam piah ndok jien laoh, yaok sang brei payua meng 300 - 500 triệu đồng. Sang oh ka payua jien, kol nyu taong paoh gam gam, mek to klauk tame pha dom urang njauk jak ba piah kateik greik dom sang payua jien ka kol nyu.

Kayua sang H.V.M oh ka samu payua 500 triệu đồng nan ye M njauk dom urang nan taong metai. Gauk gar di dom urang njauk bala daok veik huac, nan ye hu payua nao jaik 500 triệu đồng, min kol nyu oh palao manuac. Cang tuk melam mai saong tuk kol nyu oh caik hatai, 4 urang daok veik njauk peih talaih talei kak, blaoh klaak nduac, caluai tapa kraong mai veik Việt Nam duah urang jakar daong.  

Sa-ai N.V.T, umo 41 thun, sang daok di tỉnh Hải Dương, 1 dalam 4 urang njauk bala mai veik brei thau, tal urak ini, taong abih 4 urang jeng oh ka abih huac: “Khaol nyu taong paoh, blaoh mek to kaoh baoh kayau klauk tame 2 pha saong pandar pandap khang jan tame ka-ing blaoh cuh kadung ni-long tanjaoh tagok rup. Kol nyu pacap iew phone ka gauk gar dalam sang payua 300 triệu ka kaol nyu. Kakei manuac sia thei hu hatai saneng nao tapa Cam, ye juai pang tui dom panuac jak ba angaok mạng xã hội, nan lac bruk blei saleik, yau bruk bahrau blaoh di drei, meng labik metai veik mai! Harei nan njauk pacang veik meta, drei saneng lac metai paje… mahit lac kol nyu si ba pablei drei ka sa nyaom karei”.

Meng bruk ini, tapa duah thau, urang jakar hu duah tabiak jalan talei ba manuac urang nao tapa negar langiu suan adat hukum. Harei 30/8, Gah An ninh điều tra Công an tỉnh An Giang hu tabiak Sarak khởi tố bị can saong tabiak Lệnh mek kareik 5 urang, lac: Trần Thiết Thoại, umo 41 thun; Huỳnh Thị Út, 43 thun; Nguyễn Thanh Hoàng, 56 thun; Nguyễn Thanh Toàn, 31 thun; daok di huyện An Phú, tỉnh An Giang saong Trương Văn Chung, 28 thun, daok di huyện Yên Thành, tỉnh Nghệ An ka bruk “ba menuac tapa negar langiu suan adat hukum”. Urak ini gah chức năng 2 negar daok pasang iek, mek kreik dom urang pambuak pagam tal, saong daok duah thau, ba tabiak truy tố tui adat hukum. Thượng tá Phạm Hoàng Tùng, Phaok Akaok jabat An ninh điều tra Công an tỉnh An Giang, brei thau:  “Hadei di tuk bruk ini rah tabiak, dom gah nghiệp vụ di Công an tỉnh saong di Mentri Công an pambuak bruk saong dom gah chức năng di tapen negar saong Công an Campuchia… samar duah thau pagui mek hu 5 urang ba dom nạn nhân tapa Campuchia suan adat hukum. Gam haong nan, pambuak bruk haong dom gah chức năng Campuchia cap kreik rilo urang hu mbaok tame bruk cap mek menuac, ndok jien, pametai manuac.”.

Di labik tapen negar dalam huyện An Phú, tỉnh An Giang, bruk klak nduac ini oh lac bruk akaok meti. Dom bruk ini, sa mbang tra yau panuac kakei bhap bani njauk paglaong jang hatai sangka, oh pang tui dom panuac jak ba angaok dom blah mạng xã hội lac “Bruk ngak njuan, jien bilan glaong”, caong salih bahrau rai diuk di palei urang… piah plaih di lahik jien, njauk taong paoh, gaok mai lac metai, lahik./.