Mintri Kong an barau brei caga thau ka gah kon bleik salih bhian mek binguk urang piah payua panuac, ieu phon gam kateik cap urang payua jien bleik mek jien ndap nda kaya ngui di urang.

Tui jabat karja brei thau, piah bleih salih hu, dom urang kon bleik salih pataom khao tin, yau ye binguk gambar, lek taka phon di rah ra meng di intenet jeng ye di dalam gilang rah ra xa hoi.

Kon nyu bhian ieik tame dom urang hu jien ndo, urang hu angan dalam rai diuk, dalam nan jeng hu dom urang pan akaok UB Bhap bini tinh, dom so, gah karja di dom tinh, ban di dalam nagar.

Tui di nan kon nyu mek dom rup binguk, mbaok manuac di urang rami ramik hasit sarak blaoh buh tame dalam binguk kanyah chak, pahuac urang, atau pakanyah yau ye brei leih maluan, bad om janih jina pachak.

Blaoh di nan, kon nyu mek sim hareih harom buh panuac tame payua tal lek phon urang piah pateik geik, gham tam song ieu urang payua jien (tui jien ndien tu USDT atau tui gilang jien mbank).

Mayah oh ngak tui kon bleik salih, kon nyu mada buh binguk rup yau ndom mayai meng blaoh tagok harak mang xa hoi brei pakanyah, pamalau, pakanyah, ndom mayai kanyah tal angan urang siam.

Bruk peih binguk rup manuac urang, peih khao tin urang angaok mang xa hoi di bhap bini piah pakanyah patachauk urang, bruk kon bleik salih bhian ngak piah bleik salih urang.

Tui Mintri polih kong an, dalam panuac payua mai ka urang, kon bleik salih bhian pachot urang pambuak tapa dom jalan email di kon nyu peih, kon nyu khik, piah sanang brei ka kon bleik salih mbuan si payua dom binguk rup gam nyu rami ramik blaoh piah pachauk pakanyah urang jeng ye mbuan sanay si yah klak inum.

Kayua yau nan ye, Cuc An ninh intenet song jabat caga taong bleik salih pandar jamriak kong nghe glaong di Mintri Kong an padar pakakei bhap bini rah ra tuk brei pandar intenet, njauk caik hatai brei patakik khan yaih khao tin di rup drei, sang drei mbuan si nao tal brei ka kon bleik salih mek pandar piah bleik mbang nao tal mabuh tame chung hukum nagar; njauk caik hatai oh brei payua jien tui hatai gham tam di kon bleik salik.

Bhap bini rahra caga caik hatai juai yaih brei khao tin rup drei, sang danaok gauk ralo di drei, mbuan ka kon bleik salih mabuh suan hukum. Mada mayah mboh dreih yau dom baoh ndom mayai di angaok brei ka bruk di kon bleik, kon blah kaya ngui ndap nda jien ndo, mikwa rahra njauk biak samar drah capat brei thau tal jabat kong an di labik jaik di abih piah daong, piah brei patacei kakei.

Gam tui di nan bhap bini juai payua jien tui hatai pachot paluo gam kateik di kon bleik salik. Mayah mboh dreih yau bleik salih njauk capat samar khan brei ka kongan labik jaik di abih piah hu daong./.