Gah chức năng dong paklaih hu ka urang njauk lah pasot tapa ngak bruk suan hukum di Campuchia

Tapa pasang iek, duah thau, Jabat Công an mboh lac, dom urang njauk lah pasot tapa  Campuchia ngak bruk, rilo meng lac dalam umo  meng 18 tal 35 thun , tapa jalan duah bruk ngak  di mangaok mạng xã hội, atau meng ayut sahabat, urang krein jak ba, yaih khan tapa Campuchia ngak bruk hanjual, jien bilan glong.

Hadei di tuk tapa Campuchia, urang hu ba tame ngak bruk  di dom labik bleik saleik yau: ma in mbia tapa online, ngak mbang jien ảo... mangaok mạng; njauk kateik greik ngak bruk meng 12 tal 16 mon sa harei, oh brei tabiak truh labik, njauk pablei tapa ka dom po pandar urang ngak karei, atau pacap ieu phone mai sang, ka gauk gar di Việt Nam piah ndok jien laoh meng  3.000 USD tal 30.000 USD. Rilo urang nduac dauk ye njauk dom urang pandar urang ngak tong paoh, puac lac, pablei tapa ka labik karei.

Urang pal akaok bruk kateik greik urang ngak song ndok jien laoh, blah mek drap ar jeng lac urang Trung Quốc, hu bruk dong pren di urang Việt, urak ni, dok ngak bruk di Campuchia.

Dalam 6 bilan tapa, gah chức năng Việt Nam hu pambuak bruk song gah chức năng Campuchia dong paklaih hu ka 250 urang njauk lah pasot tapa ngak bruk suan hukum di Campuchia.

Urak ni, bruk bhap bini Việt Nam tabiak negar langiu suan hukum tapa Campuchia ngak bruk di dom labik main mbia online, njauk kateik greik ngak bruk, blah mek drap ar dok rah tabiak srau kadau. Kayua yau nan ye, Cục Cảnh sát hình sự, Mintri Công an hu panuac kakei bhap bini njauk paglong hatai sahneng anak dom panuac da-a, ieu tapa  Campuchia ngak bruk hanjual, jien bilan glong, oh abih jien nao mai... di dom menuac urang mangaok mạng xã hội.

Dahlau di tuk taduan panuac nao ngak, abih di nyu nan lac ngak bruk di negar langui, mik va brei duah thau biak cambaih ka labik bo drei kuhria nao ngak bruk, duah thau cambaih ka urang yaih khan song gam haong drei nao ngak bruk di pak nan yau habar, njauk tangi sua song pabak khaw tin ka amaik ame, adei sa-ai dalam sang, ka gauk gar thau ka labik drei kuhria nao ngak bruk song khaw  tin di urang nao haong drei, dahlau di tuk nao negar langiu.

Tuk  mboh lac dom menuac urang nan, jalan dui ba, môi giới, kapul nyaom ba menuac tapa  Campuchia ngak bruk, yau daok bleik saleik, pasot, pablei salih menuac, mik va brei khan ka gauk gar, boh sang song samar pathau khan ka jabat  Công an thau piah samar pacang, cakak, pasang iek, langyah./.

Urang lang: Hani Pha – 12/07