Dalam raidiuk yaok harei, piah langyah dom kan kandah di anak meta brei ka jien padai, rilo urang nao duah tal yut cuai, adei sa-ai, gah mayao mayit gilang pariak atau dom kongti gah jien padai piah mesraiy jien. Tui di nan, urang mesraiy jien brei thau bayar jien drei mesraiy, jien laba (meyah hu) saong jien laba suai bayar (meyah hu) ka gah brei mesraiy jien tui bruk mbaoh tangin saong tui adat di hukum. Yaom mada lac yau nan mintapi, hu rilo bruk yau ini, paok jien sraiy oh ka bayar blaoh urang mesraiy jien matai. Gru hukum Trần Xuân Tiền, Akaok jabat Gru hukum Đồng đội brei thau, tuk ini paok jien sraiy hu langyah yau ini:

Kadha 615 Hukum Dân sự thun 2015 hu brei adat ka bruk langyah drap ar kayua urang plang lahik caik gilac:

- Dom urang mbang kaya ngui di urang matai lahik hu bruk langyah dom kaya ngui drap ar urang matai lahik, langiu di dom bruk mbaoh tangin karei.

- Bruk blaoh kaya ngui drap ar oh ka hu parabha ye bruk langyah drap ar kayua urang plang urang matai lahik caik gilac hu urang pasang iek drap ar ngak tui bruk mbaoh tangin di dom urang mbang tui drap ar kayua urang plang urang matai lahik caik.

- Bruk blaoh kaya ngui drap ar hu parabha ye yaok urang mbang tui kaya ngui drap ar hu bruk langyah kaya ngui drap ar kayua urang plang lahik caik gilac samu min oh tapa paok drap ar kaya ngui blaoh drei hu taduan, langiu di bruk hu tut mbaoh tangin karei.

- Bruk blaoh urang mbang tui kaya ngui drap ar oh njauk urang mbang tui kaya ngui drap ar tui harak hiai caik mai ye jeng brei ngak bruk langyah drap ar kayua urang plang urang matai lahik caik yau urang mbang tui drap ar dalam harak hiai caik mai.

Yau nan, dalam bruk urang mesraiy jien plang matai ye dom urang mbang tui drap ar kaya ngui di urang mesraiy jien brei ngak bruk bayar jien sraiy ka urang plang urang matai dalam drap ar bo urang plang lahik caik veik saong drap ar drei hu mbang tui, langiu di bruk hu mbaoh tangin karei. Min tapi, jeng hu dom bruk dom urang mbang tui kaya ngui drap ar thau ka paok jien sraiy blaoh oh khin bayar paok jien ini meng bruk oh mbaoh tangin mbang tui kaya ngui drap ar. Dalam bruk ini, di khoản 1 Kadha 620 Hukum Dân sự thun 2015 hu adat yau ini: "Urang mbang tui drap ar meda hu oh mbaoh tangin ka bruk tok mek drap ar, langiu di bruk oh mbaoh tangin piah plaih nyaik bruk langyah drap ar di drei ngan haong urang karei. "Adat ini piah brei oh hu bruk plaih nyaik bruk bayar jien sraiy.

Ngak tui dom adat di hukum nan, meyah urang mesraiy jien plang matai ye urang mbang tui kaya ngui drap ar di urang mesraiy jien hu bruk bayar paok jien ini tui paok drap ar, bruk di drei tui dom adat di hukum. 

Bruk urang mbang tui oh khin bayar jien, gah brei mesraiy meda hu yak pathau di Toà án kadi bhap bini pakat huyen, labik daok di urang njauk yak pathau. Urang njauk yak pathau hu abih tih dom urang mbang tui kaya ngui drap ar dalam bruk urang plang urang matai lahik oh vak harak hiai, daok bruk urang plang lahik hu vak harak hiai ka sa atau rilo urang piah mbang tui harak hiai ye dom urang mbang tui drap ar tui harak hiai lac urang njauk yak dalam harak yak pathau.

Gru hukum Trần Xuân Tiền, Akaok jabat Hukum Đồng đội brei thau, bruk bayar sraiy tok hu brei padeih klaoh tuk daok di sa dalam dom bruk di Kadha 372 Hukum Dân sự 2015. Cambaic laic yau ni:

- Ka sa, gah mesraiy bayar klaoh jien ka gah brei mesraiy.

- Ka dua, dom gah hu mbaoh tangin padeih klaoh bruk bayar sraiy ka gah brei mesraiy.

- Ka klau, urang brei mesraiy klak tapa bruk cap mek urang masraiy bayar,

- Ka pak, dom gah mbaoh tangin salih bruk bayar sraiy meng bruk karei.

- Ka lime, dom gah jeng hu bruk bayar sraiy ngan haong gauk tuk tal harei bayar jien yau gauk, dom gah nan oh daok bruk bayar jien ka gauk saong bruk ini maong yau klaoh blaoh./.