Di harei nyom 3 bilan sa mbang di Mentri Kong an rah tabiak bahrau ini, thuong ta Triệu Mạnh Tùng, phaok akaok Kuk An ninh mang saong pacang cakak kol bleik pandar jamraik ngak kong bahrau glaong – brei thau dalam 6 bilan akaok thun 2025 kapul urang polih kong an hu duah mboh, kham merat langyah 56 janih tal bruk pablei salih chung hukum ka du lieu baoh kadha menuac urang haong labaih 110 bản ghi.

Bruk nan nyu kayua mai meng dom bruk yau ye:

Ka sa di nyu, kayua urak ini hatai caong pabak tal baoh kadha di drei piah duh dom bruk ngak mbang pablei salih lac biak saong kayua hatai caong ini nan rilo kapul, kol bleih salih duah tal baoh kadha piah duh ka bruk karei di drei.

Ka dua di nyu, rilo po dang pasang khik majam khau tin hu ngak bruk pataom, langyah, ngak tal baoh kadha di drei hu rilo bruk oh ka tani tanat dalam jalan ngak, adat pandar tal baoh kadha di drei.

Kayua meng nan ba tal bruk njauk brei ka urang thau tal baoh kadha di drei, njauk kol co klaik lahik, njauk urang pandar chung adat hukum tal baoh kadha di drei atau di jabat, kapul hu jao bruk pasang iek saong dom baoh kadha di tuai damuai di drei njauk co bleik klaik.

Ya Ka klau, urak ini ilamo di rahra dalam bruk pacang khik tal baoh kadha di drei jeng yau ngak dom bruk tal baoh kadha di drei daok biak kurang.

Harei 25-6, Quoc hoi urang vakil lambaok bhap bini nagar hu brei tapa Hukum Pacang khik tal baoh kadha di drei hu ba tame ngak meng harei 1-1-2026.

Hukum Pacang khik du lieu menuac urang hu brei adat ka bruk taong bhat tui jien duah hu ngan haong dom bruk biak trak dalam bruk langyah du lieu menuec urang, ngak chung adat hukum pacang khik tal baoh kadha menuec urang, dalam nan meda njauk taong bhat rilo abih tagok tal 5% jien mek hu di thun anak danak ngan haong dom bruk ngak chung hukum.

Thuong ta Triệu Mạnh Tùng pachreih rahra brei samar drah brei pabak, duah thau dom adat hukum piah thau cambaih laih dom bruk di drei gam saong baoh kadha di drei kayua drei ngak tabiak pandar dom gah langyah, pataom, langyah du lieu di drei piah ngak njauk dom bruk di dom jabat ini.

Dom jabat, kapul hu bruk pataom, langyah baoh kadha di menuac urang jeng brei roh duah saong ngak njauk dom adat di hukum nagar.

Tapa nan khik kajap tal baoh kadha menuac urang di jabat, kapul, di labik drei njauk kol co klaik chung hukum saong meda gaok dom bruk taong bhat biak trak, tuk dom adat du Hukum Pacang khik tal baoh kadha menuac urang, dom harak gar dalam hukum hu ba tabiak, hu ba tame ngak./.