Bahrau meng blaoh, harei 26/7, Polih di xa Thạch Hà, tinh Ha Tinh taduan hu pathau khan di sa baoh sang brei ka sa urang anek lakei ndih tapun thun 2007 tatuak drei lahik mbaok. Dalau di nan, sang gait jeng hu taduan mek hu phone meng di kapul oh krein ieu mai brei thau daok khik kamuan ini jeng ye cap mek baoh sang payua kayu jien 250 trieu dong piah “pabuh manuac”.

Sa harei dalau di nan, krei pandiak laho 25/7, Polih phuong Bạch Mai (Ha Noi) jeng taduon pathau khan di sa urang bhap bini brei thau lac anek lakei di drei ndih tapui manek meng thun 2007 hu urang cap mek. Dom kol nyu khin brei payua jien 150 trieu dong gam saong cap nao tal sa labik jua, blaoh kaoh talei pambuak saong sang nan. Polih drah samar pacang hu dom bruk bleik saleik jeng ye bad om kamuan nyu cap mai sang karo selamat.

Taong tame akaok dom adei oh khin nao atah, dom kol bleik palue dom adei tabiak langiu sang, blaoh apah hotel, sang apah piah khik pandauk mbaok, pa-atah haong sang danaok urang krein bein, piah mbuan sanang roh duah bruk. Hadei di pateik geik gam gam brei kahuac blaoh nyu cap urang pambuak phone saong urang dalam sang atau cap mek angan zalo di urang pambuak saong urang hatian piah cap ndok “mek jien pabuh”. Jeng dreih yau nan nyu mboh tamuh ralo labik ngak ka bhap bini duh hatai.

 Piah caga dom janih kadha palai jamen klah rah tabiak, ong Ngô Minh Hiếu, juru an ninh mang, Akaok Doanh nghiep xa hoi pacang bleik salih brei kakei lac:

“Oh hu jabat karja halei ieu phone atau facetime, video call ka khol drei. Karja jabat ngak bruk ye nyu hu harak gar atau harak da-a tagok phuong, xa piah ngak bruk anak mbaok. Sa jalan oh payua jien ka thei mayah drei ka oh tantu cambaic angan. Thei brei khao tin ka khol drei jeng ye urang hatian krei payua panuac sua tangi nyim jien, sua tangi payua jien atau ngak tui jalan link, jeng ye drei pandar phone bhian pandar di drei pambuak saong nyu di labik mang ye drei njauk tantu thau cambaic lac nyu njauk atau oh meng hu”

 Khan brei ka bruk anek di drei hu polih daong peih palao mai meng bruk cap mek “online”, sa urang ngak amaik ame di tinh Phu Tho khan brei tahau:

“Dahlak magru hu meng kadha bac di anek drei, ngak amaik ame drei njauk pambuak phone di drei saong phone di anek, thau ka labik tantu cambaic piah thau anek hu suak sim suak tabiak ha oh piah tahu tantu cambaic anek drei daok meng di halei. Tuk tagok bac pakat 3, angan tai khoan gilang mbang jien njauk brei angan blaoh amaik ame pambuak nao mai saong anek piah thau jien tame tabiak di anek blaoh pacang caga ka njauk kanyu lagaih dil samu”

Dalam tukvak tukvak ralo kol bleik jamraik ilamo kong nghe glaong dak harei dak sahanak, cap bleik mek “online” nyu yau ye sa janih co klaik bahrau. Caga pacang kon bleih oh lac janih brei ka sa jabat brei tanggung javab, blaoh nyu daok ieu lac bruk njauk pacang caga di yaok urang bhap bini. Hu yau nan meng jeng, “hala pacang” karo kajap di mblang mang bahrau./.