Tui nghệ nhân Đinh Thị Thêu daok di huyện Kim Bôi, tỉnh Hòa Bình ye: Bruk dam dara uranaih oh takre ragu daoh bhap bani ye oh njauk tuh ka gah halei, kasa nan lac kayua dom amuk pato oh ka tal labik tal dhua, anek kamuan nyu njaom mbak nhạc bahrau urak ini. Hip hop bahrau meng daoh tal chat tamia ini diah. Anek kamuan nyu oh ka thau cambaih laih halau gha di drei, ka dua tra nyu oh ka thau hu yaom glaong di ragu daoh bhap bani Mường, nan ye oh lac kayua gah halei, urak ini njauk pambuak bruk haong gauk, anek kamuan njauk kham merat, dom ong muk jeng njauk ndom habar piah ka dom anek kamuan nyu thau hu yaom glaong, thau hu makna di ragu daoh bhap bani Mường, halau gha di drei.

        Min ngak yau habar piah ka dm dara uraniah hu bac, hu daoh ragu daoh di bangsa drei tuk oh hu sang bac halei, tal bac halei pato. Jalan pato ragu daoh bhap bani di nghệ nhân Đinh thị Thêu njauk bac megru tui. Amuk lac: Bhian di nyu amuk ru taco meng sap mường, amuk hu taco nao bac mai blaoh nyu lac amuk leiy amuk juai ndom meyai sap Mường taco oh takre pan, min amuk daoh ru hamiat, ru hamiat meng sap Mường ye urak ini taco nyu lac amuk leiy amuk ru taco meng sap Mường nao. Kadha nan brei mboh dom uraniah livik livik harei nyu njom tame.

      Thau saong iek prong ilamu di bangsa, sa-ai Đinh Kiều Dung jeng lac sa dalam dom urang biak abih hatai haong bruk khik ramik, patagok ragu daoh bhap bani Mường. Lingiu di bruk dang tabiak peih tal pato daoh ragu daoh bhap bani oh mek jien ka uranaih ndih tapui meng thun 2004 tal ini, sa-ai daok pachreih hatai ranam ragu daoh bhap bani  ka pasang likei, anek, kamuan di drei. Sa-ai ndom lac: Tuk daok dalam sang drei ndom biai sap bangsa Mường haong gauk. Anek matau yaom lac urang Yuan min taco dahlak jeng pato nyu ndom sap Mường, nan ye urak ini taco ndom puac nao mai haong ong amuk meng sap Mường, ndom meyai haong amaik ame meng sap phổ thông, taco nao bac nyu ndom sap phổ thông,  nyu ndom biak cambaih, hu amuk pato biai nan ye taco nyu ndom biai biak cambaih.

   Sa-ai Đinh Kiều Dung hadar veik: tuk daok sit, sa-ai bhian hu daok langiu sang mong iek aia bulan saong pang ame daoh dom kadha daoh bhap bani Mường mboh biak bingi pang, dom panuac daoh, sap take Mường yamen bingi njom tame dalam hatai sa-ai mbiah tal harei ini. Tui sa-ai, ragu daoh bhap bani Mường nyu hu pren khang ngak ka anek manuac mboh anit ranam gauk jang.

  Dahlau daih lac sa urang kamei chiến sỹ, ca sỹ ngak bruk dalam bol bala, dalam dom mbang lnao daoh pamere bol lin saong bhap bani, sa-ai Dung kanar hadar di abih nan lac hatai anit ranam di bol lin saong bhap bani brei ka sa-ai hadei di yaok sa kadha daoh, yaok ragu daoh bhap bani Mường hu sa-ai daoh meng taong abih hatai jia brei mboh bruk gheih mekre di ilamo bangsa.

   Ragu daoh bhap bani Mường meng kan biak bingi pang min oh mbuan daoh, piah daoh hu brei thau makna di panuac daoh, tui saai  Dung, njauk ngak ragu ka nyu hu suan yava ragu daoh bhap bani Mường. Dom ragu daoh bhap bani meng kan di urang Mường urak ini daok hu khik veik meng pabah, meng cambuai. Tok hu urang taha meng kanar hadar dom kadha daoh bhap bani meng kan. Piah khik ka dom ragu daoh bhap bani Mường oh lahik nao tui thun bilan, brei hu dom menuac hu hatung hatai yau sa-ai Kiều Dung, gam haong bruk abih hatai di taong abih urang anek bangsa  Mường./.