Kein laba meng kadung jien kayua đồng đội di huyện Cư M’gar, tỉnh Đak Lak

Pathau mikva saong grauk ayut! 4 thun tapa, kadung jien “kayua  đồng đội” di Kapul urang dahlau deih ngak bol lin huyện Cư Mgar, tỉnh Đắk Lắk hu daong ka labaih 700 hội viên kan kandah yam tagok tabiak truh kan kathaot, saong daok hu daong ka yaok rituh hội viên padang ngak saong pasiam veik sang danaok. Dalam tuk pahadar Harei ilamu Kapul urang dahlau daih ngak bol lin Việt Nam, Tuấn Long – urang vak di rayo sap ndom VN daok di  Tây Nguyên hu kadha vak brei thau dom kein laba di Kadung jien “kayua đồng đội" di huyện Cư M'gar, tỉnh Đắk Lắk. Da-a mikva saong grauk ayut tui pang:

  Urang dahlau daih ngak bol lin angan Cao Xuân Lợi daok di palei Hiệp Hưng, xã Quảng Hiệp, huyện Cư M'gar brei thau, palei ong daok di Nam Đàn, Nghệ An; bhian nao mesruh di Quảng Trị, bloh nao padang kinh tế mới di rilo labik, min raidiuk jeng kan kandah. Tame  Đăk Lăk hu labaih 7 thun tapa, ngak bruk glaih glar, raong dom anek nao bac, praong jeng menuac jeng urang, min diuk pasang ong jeng daok dalam baoh sang sit, taik tahak.  Akaok thun ini, sang ong hu Kapul urang dahlau daih ngak bol lin xã daong 40 triệu đồng meng kadung jien “kayua đồng đội" piah ngak sang bahrau. Umo labaih 70 thun meng hu labik daok tani tanat. Ong Cao Xuân Lợi khan lac:  "Sang dahlak daok dalam angan sang kathao 4-5 thun ini mai, puac thun bloh, kapul urang dahlau daih ngak bol lin, lac  đồng đội di dahlak, hu daong ka sang dahlak 40 triệu, sang dahlak buh tabiak hasit tra, bloh ngak hu baoh sang. Dahlak urak ini umo labaih 70 thun meng hu daok dalam baoh sang siam khang kajap yau ini, dahlak uan tabuan lô. Urak ini oh daok huac hajan ngin yau dahlau daih"

Sang di urang dahlau daih ngak bol lin angan Đỗ Văn Giảng daok di palei Hiệp Hưng, xã Quảng Hiệp, huyện Cư M'gar jeng baik kan kandah. Rilo anek, min takik taneh pala drak, oh hu phun jien piah ngak mbang, nan ye sang ong tuk halei jeng kurang anak, kurang likuk. Piah daong ka sang ong hu jalan patagok, Kapul urang dahlau daih ngak bol lin xã hu brei ka sang ong nyim 5 triệu đồng meng kadung jien “Kayua đồng đội” piah blei limo pajaih, piah patagok bruk raong glang saong hu khak piah buh ka phun pala. Tabiak truh hu kan kathaot, ong Giảng bayar veik jien saong hu Kapul urang dahlau daih ngak bol lin xã dang tabiak mesraiy brei hu 30 triệu đồng meng Gilang pariak sarak karja  huyện piah peih praong bruk ngak mbang. "Dua drei limo amaik lac 9 triệu, adei sa-ai dalam puk brei dahlak nyim 4 triệu jeng daok kurang. Tuk nan, dhal kapul brei dahlak mesraiy 5 triệu, dahlak ginup jien blei yau limo. Thun hadei, limo nyu menek, meyah sa thun nyu menek sa mbang, hu sa drei tano ye pablei nao piah blei limo binai mai raong, tal harei ini hu 21 drei paje; khak limo pandar piah buh ka phun amriak kalu, oh abih jien blei khak."

 Ong Vũ Ngọc Nhanh, akaok Kapul urang dahlau daih ngak bol lin xã Quảng Hiệp, huyện Cư M'gar brei thau, Kapul urang dahlau daih ngak bol lin xã hu 218 hội viên. Dahlau di thun 2012, sang kan kathaot di hội hu labaih 16%, 34 hội viên daok dalam sang taik tahak. Tui jalan daong ba gauk, dom dhar kapul hu jhul khang dom bruk yau: khang brah patak pataom,  rik jien kayua đồng đội, kadung jien daong ngak mbang pala drak piah daong ka dom hội viên kan kandah. Tal urak ini, dalam hội pasiam hu 31 baoh sang taik tahak, brei ka dom hội viên sang kan kathaot mesariy labaih 750 triệu đồng oh kuhria laba piah cakrok patagok kinh tế. Ong Vũ Ngọc Nhanh lac: "Hu bruk njauk hatai gauk di mban chấp hành saong di taong abih dom hội viên chi hội, yaok thun yaok hội viên kol dahlak rik tame 1 triệu.  200 hội viên kol dahlak pataom tame ngak ka 2 – baoh sang mboh biak uan tabuan. Taong abih hội viên jeng pachreih tui jalan ngak ini"

        Ong Ksơr Ho, Phó chủ tịch Kapul urang dahlau daih ngak bol lin huyện Cư M'gar brei thau: huyen urak ini hu 3.700 hội viên. Dom thun dahlau daih, sang kan kathaot dalam hội hu labaih 10%. Dom thun tapa, gam saong dom phun jien mesraiy yaom laba lap meng gilang pariak, kadung jien “Kayua đồng đội” hu daong ka dom hội viên kan kathaot yam tapa hu kan kandah; daong bruk raong glang, pala drak, pasiam sang taik tahak. Tal urak ini, tok daok 3,2% hội viên urang dahlau daih ngak bol lin lac sang kan kathaot. Anak tal, hội daok patagok kadung jien ini piah daong ka dom hội viên pasiam sang taik tahak, blei limo pajaih saong pala dom janih phun piah tabiak truh kan kathaot, yam tagok ngak kaya meda. Ong Ksơ Ho lac: "Nhiệm kỳ tal, kol dahlak jeng daok ba tabiak bruk ngak lac, urangKinh 100 ribau, urang bangsa 50 ribau rik tame piah brei mesraiy, piah cakrok patagok kinh tế. Min dom dhar kapul puk palei ye jak ba karei di gauk, xã halei ginup meda ye rik 500 ribau, daok xã halei kan kandah ye rik 100 ribau piah daong dom baoh sang patagok kinh tế, pasiam sang taik tahak, blei meng 1-2 drei limo piah ka dom hội viên raong."

        Tapa labaih 4 thun peih ngak, kadung jien "Kayua đồng đội" di Kapul urang dahlau daih ngak bol lin huyện Cư M'gar, tỉnh Đắk Lắk hu daong ka labaih 700 hội viên mesraiy jien oh mek laba. Kadung jien ini hu daong ka jaik 100 hội viên mesraiy piah ngak bahrau atau pasiam veik sang danaok. Hu bruk pachreih ba di đồng đội, dom hội viên Kapul urang dahlau daih ngak bol lin jeng pandar phun jien njauk bruk ba tabiak, hu kein laba, samar tabiak truh kan kathaot./.