Urak ini, khan ao ngui cuk di urang Brâu hu dom salih bahrau, min jeng daok khik hu dom ilamu meng kan. Khan ao di urang Brâu oh hadah tanjak, bo nyu lai pagam haong langik tasik ceik glai Tây Nguyên. Dalam khan ao ngui cuk meng kan di kamei saong likei, urang Brâu rilo meng pandar 2 sambo màu lac bhong saong jhuk. Gam haong nan, daok hu dom sambo màu yau kanjik katam, hijao, mbong patih, piah ngak bingu la. Yaok sambo màu jeng hu makna karei di nyu. Nghệ nhân Y Dép, urang Brâu daok di palei Đăk Mế (xã Bờ Y, huyện Ngọc Hồi, tỉnh Kon Tum) brei thau: “sambo bhong lac sambo darah, lac sambo jayah, sambo kanjik katam lac sambo di meh pariak, sambo mbong patih lac bingu, sambo hijao lac sambo di phun kayau, sambo jhuk piah ngak nền”.

Urang likei Brâu bhian cuk  ao katut panak rup tapak, 4 meta. Ao urang kamei hu ngak tani tanat jang, hu pabak bingu la biak gheih, mekre.

Urang Brâu saneng lac, bingu la angaok khan ao di urang likei njauk ngak ka nyu khang kadang yau urang likei. Nan ye, bingu la bhian hu ngak yau paga pacang,  yau gai haning. Urang likei cuk khan ao meng kan jeng brei mboh hu rup thaik khang kadang. Daok bingu la angaok khan ao di urang kamei bhian lac baoh bingu, phun kayau, brei mboh bruk gheih mekre, lamin lamuac di urang kamei tuk cuk tame. Urang kamei Brâu bhian cuk gam dom janih pandap piah ngak brei mekre jang yau ye: kaong tangin meng mã não,  parik meng bala lamen, baoh nyuk, balau cim, atau meh, pariak meng kan...

Urang kamei Brâu ngak mekre ka rup drei meng bruk cuk biak rilo kon. Mikva saneng lac, cuk rilo kon ye hu rilo urang likei chreih takre. Hu dom urang daok cuk dom baoh kon di takai, tuk yam takai nao yava sap biak bui tangi.

Dalam sa tukvak biak atah, urang Brâu lahik nao bruk menyim jih dalah meng kan. Urang di palei Đăk Mế njauk nao blei khan ao di bhap bani daok di dom puk palei gah negar Lào. Min labaih 10 thun mai ini, urang Brâu hu pasiam veik bruk menyim jih dalah piah ngak khan ao angui cuk ka rahra dalam palei drei. Bruk pasiam veik bruk menyim jih dalah meng kan hu rik daong khik ramik, saong patagok ilamo meng kan di bangsa Brâu./.

Urang lang: Jasi -17/08/2021