Dalam tukvak ini, dom anek saih gah langiu  brei tut angan pakacah tapak di dom labik kayua Sở Pato megru ba tabiak. Mentri Pato megru tacei lac, dom sang bac phổ thông  brei pabak tai khoan, mat khau ka anek saih daok bac tal 12 saong tacei pato anek saih  ngak ho so piah tut angan pakacah online.

Mintri Lao động thương binh saong xã hội (LĐ-TB-XH), daok mek panuac ka dự thảo Sarak patabiak yaom jien bilan tối thiểu ngan haong urang ngak bruk tui harak pambuak gauk. Tui panuac kakei di Hội đồng jien bilan pakat negar, Mintri LĐ-TB-XH hu ba tabiak jalan ngak lac tagok 6% jien bilan tối thiểu bhum meng harei 1.7, gam haong tukvak ngak pasiam veik jien bilan bhum kanja. Tui tanut jien bilan tối thiểu di rilo bhum palei di TP.HCM, Bình Dương, Đồng Nai tui kuhria tagok tal 280.000 đồng, mek hu jaik 5 triệu đồng sa bilan.

Di tỉnh Tiền Giang saong Bến Tre yaom ikan raong dalam lồng bè  daok trun biar, dalam tuk nan pandap mbang raong ikan daok tagok glong. Ikan  Điêu Hồng pablei tabiak meng 33-34 ribau đồng/kg, min jien raong brei pandap ikan mbang tal 39 ribau đồng/kg. Di palei bè raong  tapen kaoh Phụng, xã Tân Thạch, huyện Châu Thành, tỉnh Bến Tre daok hu bruk ikan mblung ia matai kayua mbak di ia kraong Tiền dak harei dak glaong gam haong pandiak. Tiền Giang saong Bến Tre hu labaih 1.500 lồng bè ikan, ralo meng lac ikan Điêu Hồng. Bruk raong njauk, laik yaom bhian rah tabiak , ngak ka urang raong hu jien mek tame oh tani tanat, gaok mai njauk khat lahik trak yau urak ini.

Piah khik ramik di anak meta dom kapul gilai ikan “3 saoh”, gah ngak nong tỉnh Bà Rịa-Vũng Tàu njauk gauk dalam bruk pabak laik số tạm. Bruk pabak laik số tạm ini meda hu peih ngak dalam bilan 3 ini. Tui Chi cục kaya tasik tỉnh Bà Rịa-Vũng Tàu, bruk pabak laik số tạm oh lac tok daong ka dom bhum palei khik ramik siam dom bruk taong mek kaya tasik, bo daok daong ka dom labik, dom jabat chức năng pasang iek, langyah catang dom bruk ngak suan dalam taong mek kaya tasik suan adat hukum, oh pathau khan, oh tui adat (IUU), taong cap kaya suan bhum, suan labik.

Dom harei tapa, pandiak, ia mbak daok rah tabiak khang di dom tỉnh gah Pei negar. Rilo jalan glut kayua ia mbak, pandiak saong yaok ribau hecta padai khut trak. Sở Ngak nong saong Patagok palei pala tỉnh Cà Mau ba tabiak jalan likau daong samar chip jaik 40 tỉ đồng piah buh tame ngak dom labik padang ia saong pambuak atah jaln ba ia, ramik pasiam dom balai pabak ia ka bhap bini. Meyah hu buh jien tame ngak, Cà Mau brei 758 bồn ia ka  1.344 baoh sang bhap bini daok atah, oh hu pandap padang ia, ngak 46 labik pabak ia praong.

Dom giáo sư y khoa di rilo sang bac đại học pak Hàn Quốc daok nop harak likau padeih ngak saong trun maong ngak bruk piah pachreih tui dom bác sĩ pasram bruk. Tapa nan brei mboh bruk catang tagok di gah y te daok dui atah labaih sa bilan tapa di Hàn Quốc ka oh mboh trun, yaom lac gah Rajaei daok kham marat ieu ginum biai. Bruk ngak nan di dom giáo sư y khoa ngak ka manuac sia huac lac meda ngak trak damak jang dom jit vu sangka prein yava di dalam taneh ia.

Kayua bruk ndih tapui gam gam trun nan ye dalam 2 thun tapa dom sang bac mau giao di Trung Quốc trun labaih 20.000 sang bac. Dom uranaih bac mau giao jeng trun tal 11,55% dut saong thun dahlau. Anak tal, bruk palih ruak anek saih di dom sang bac  nan  mboh dahlau lac meda dak harei dak kan kandah tuk bhap bini di Trung Quốc trun gam gam. Bruk takik ndih tapui ba tal rilo labik di dom tỉnh yau  Chiết Giang, Sơn Đông di bhum Timun; Giang Tây, Quảng Đông, Phúc Kiến khan lac padeih dom jit vu ndih tapui dalam dom bilan tapa.

 Harei 25/3, Gah Y tế dunya (WHO) ndom lac bruk sarau kadau y te daok dak harei dak trak damak di Yemen, jaik 18 triệu menuac di negar ini, dalam nan sa mateh lac ranaih, daok caong hu daong y te samar drah dalam tuk gaok rilo jit ruak tamuh tabiak gilac. Bruk mesuh gauk dui atah jaik piluh thun pak Yemen  ngak ka y te di negar ini laik tame bruk cuang kandah biak khang. Prein yava di rahra dak harei dak oh khik hu siam makre, salamat dalam tuk dom labik sang danaok njauk ngak tayaih tayaic, ngak ka yaok trieu rahra pak Yemen caong hu daong brei yaok harei./.