Tỉnh Sóc Trăng hu ieu pataom 80 nghệ nhân saong urang daoh tamia di kapul daoh tamia Khmer parang me-in dom dom kadha ilamu, nghệ thuật di dom dân tộc Kinh, Hoa, Khmer yau ye bruk pakacah gom di urang bangsa Low, daoh tamia sân khấu Rô băm, phleing ngũ âm di urang Khmer, đờn ca tài tử Nam bộ; gam haong nan, yaih khan tal tuai damuai bruk ngak ahar Pía, bruk pak yot meng kan, ngak dom janih pandap mbang huak di bhap bini dom bangsa daok dalam tỉnh...

Đảng bộ, kanja huyện Krông Pa, tỉnh Gia Lai bahrau taduan harak dak labik dang inem krung sajarah pakat negar Labik mesuh Cư Jũ - Dliê Ya di tuk pahadar 45 thun harei padang huyện. Dalam 2 mbang mesuh metak, Cư Jŭ - Dliê Ya lac labik di cách mạng dua tỉnh Gia Lai saong Đắk Lắk, hu mboh rilo jak jeng di Đảng bộ saong rahra. Yaom lac di bhum kan kandah di tỉnh Gia Lai min thun 2023, Krông Pa hu jien mek tame tui kuhria yaok tui akaok manuac lac 44 triệu đồng, raidiuk di rahra dak harei dak cak rok patagok, bruk saron mbon dalam rahra jeng hu khik catang. Huyện hu 3/15 xã mek hu tanut chuan palei pala bahrau, dom sang kan kathaot dalam huyen hu trun 3,5% yaok thun.

Dalam bilan dam dara thun ini, dam dara tỉnh Đắk Lắk hu ngak yaok ratuh bruk di dam dara haong yaom jien abih tih labaih 4 tỷ đồng, yam tapa biak rilo jang duk haong bruk ba tabiak. Patui jak jeng ini, dam dara Đắk Lắk daok peih ngak bruk dam dara halan hatian bilan hè thun 2024, rik prein ranaih tame daong ka bhap bini saong jhul patagok KTXH. Bruk ngak ini hu peih tabiak meng bilan 4 tal abih bilan 8 tal dii 15 huyện, ban dalam tỉnh haong 17 kadha praong.

Meng akaok thun tal urak ini, dalam taneh ia hu labaih 13.700 urang ruak tangin takai cambuai, tagok 2 mbang mateh dut saong tukvak ini thun blaoh, ka oh mboh urang halei metai kayua ruak tangin takai cambuai. Dom urang ruak mboh rilo abih di dom labik pato mầm non, tuk hu labaih 90% ranaih mala 5 thun gaok ruak. Ruak ini njom pambak rilo meng lac tapa jalan tung pruac meng ia pabah, ndaih baoh ia saong aih di uranaih. Tuk mboh uranaih njauk ruak, sang njauk ba ranaih nao tal labik y te piah hu langyah jalan sangka, duah mboh dom janih ruak trak, meng nan samar drah taong ruak.

Thun ini, tuk lễ 30/4 – 1/5 hu padeih rilo harei nan ye puk palei, doanh nghiệp, labik me-in bui sambai di tỉnh Bà Rịa - Vũng Tàu hu caga ngak rilo bruk daoh tamia, mbang huak, me-in thể thao… piah dui pachreih tuai damuai. Tal urak ini, dom labik du lịch, Resort, hotel dalam tinh, tuai kakei bilik daok hu labaih 90%. Dalam huyện Xuyên Mộc hu bruk Charm Fantasea 2024 dui atah dalam 5 harei (meng harei 27/4 tal harei 1/5) dii Charm Resort Hồ Tràm. Tuai hu tame pabah mbang oh mek jien, hu maong iek, hu ba drei tame rilo bruk ngak chreih chrai, yau ye: vah ghe patei, Jetski, parang me-in carnival, cih rup cih, pakacah par kalang takai tasik, dit blong, mbang huak… Tuk mon 7 malam 30/4, di pak ini hu danak dak daoh tamia hu padang ngak praong, hu mbaok dom showbiz Việt hu angan.

Tổng Cục du lịch Thái Lan (TAT) kuhria lac dom tuai mai tal Thái Lan meda tagok samar dalam tuk padeih le dui atah meng harei 26/4 tal harei 5/5 anak tal di dom taneh ia châu Á, abih di nyu nan lac Trung Quốc saong Nhật Bản. Dalam tukvak padeih ameh ini, taneh ia paha ameh kuhria meda raok jaik 90.000 mbang tuai negar langiu yaok harei, glaong jang 10% dut saong tanut kuhria, mek tame labaih 32 tỷ baht (870 triệu USD) jien mek tame meng du lịch. Taphia di nan dom sarak oh thị thực saong bruk pambuak peih gilac dom mbang par dunya, dom jabat di TAT pak Nhật Bản saong Trung Quốc hu ba tabiak danak dak mayaih khan piah jhul samar darak pasa dalam tuk padeih le jaik tal. 

Jabat khik caga adat hukum di Australia daok ieu bruk pa,mbuak gauk siam saong khang kajap jang di dom Cty công nghệ dalam kham merat pacang cakak saong duah thau dom bruk ngak suan adat hukum. Taong Yam ndok Jabat Tình báo Australia Mike Burgess khan lac, taphia dom siam lagaih, ye internet jeng daok jeng labik pabam chủ nghĩa cực đoan angaok dunya. Dalam nan, oh klaak tapa hu bruk pandar trí tuệ nhân tạo hu kol kanjah jhak pandar piah ngak dom bruk suan adat hukum atau công nghệ mã hóa kaok ku, ngak ka bruk pacang cakak saong duah thau dak jeng kan kandah jang.

Jabat rami ramik dom bruk ngak pahla (OCHA) di Liên Hợp Quốc hu likau paok daong tagok tal labaih 10 triệu đô la piah pacang caga mbang tamuh tabiak jit aih traoh biak trak damak bahrau di Somalia. Tui khau tin gah dịch tễ học brei mboh, tui kuhria hu labaih 1,2 triệu urang Somalia mbuan gaok ruak aih traoh dalam thun ini. Bilan hajan jaik tal, tui kuhria meda ngak trak damak jang mbang tamuh tabiak jit ruak, yau hu brei thau lac biak glaong di dom labik pandiak di taneh ia ini. Makna ba tal tamuh tabiak jit ruak lac kayua bruk khik hacih haat daok bier saong bruk pambuak haong ia hacih daok patakik.