Phường An Điền, An Tây hu padang tui taneh praong di 2 xã sa angan haong gauk. Ban Bến Cát hu padang tamo meng ban sit Bến Cát ngan haong taneh praong labaih 234 km², bhap bini labaih 364.000 bhap bini. Hadei tuk padang ngak, Ban raya Bến Cát hu 7 phường saong 1 xã. Tukvak tapa, Bến Cát jhul pakhang bruk patagok kong nghiep, dalam Ban hu 8 KCN, 1 khu ngak tabiak pandap pataom sa labik, ba bruk ngak ka 180.000 urang ngak. Mbiah tal ini, tỉnh Bình Dương hu 5 Ban nan lac: Bến Cát, Tân Uyên, Thuận An, Dĩ An, Thủ Dầu Một, lac sa tỉnh ban hu rilo ban di abih dalam negar.

Tỉnh Đồng Tháp hu labaih 450 pandap OCOP hu pok brei angan lac 3 patuk, 4 patuk, 5 patuk – dang akaok di bhum ĐBSCL. Dom pandap OCOP hu daong patagok dom yaom glaong di bruk ngak kaya nong, kinh te palei pala, rik tame biak glaong di kim ngạch pablei tabiak kaya nong. Piah patagok dom prein khang meng pandap OCOP, thun ini Đồng Tháp kham marat hu labaih 30 pandap OCOP hu pok brei angan bahrau. Gam tui di nan, khik tani tanat, pabak patagok dom pandap mek hu harak pok brei angan meng 3 tal 5 patuk OCOP.

Dom harei tapa, rilo mbang radaih pajeng ba anit ranam bol lin-bhap bini hu pajeng ia hacih kayua dom urang jakar, urang lin Bol lin Bien phong tỉnh Long An samar pajeng ba mai daong mikva bhap bini bhum pandiak bhang tua riya di 2 huyện Cần Giuộc saong Cần Đước. Dalam mbang ini, đơn vị hu pajeng ba saong pabah 3.000 lít ia menyum saong 3.000 lít ia pandar ka bhap bini dom bhum palei. Tukvak anak tal, Bol lin Bien phong tỉnh Long An patui peih ngak rilo mbang pajeng ba ia menyum saong ia pandar, sumu daong bhap bini dalam bilan pandiak bhang, ia mbak ini.

Sư cô Thích Nữ Như Học, Akaok Mban ngak pagla giáo hội Phật giáo huyện Tánh Linh, tỉnh Bình Thuận bahrau ba urang taha, urang gaok kan kandah di pak ini nao iek ruak, taong ruak ka mata di Pasak mata Trưng Vương, TP. Hồ Chí Minh. Di pak ini, dom y, bác sỹ hu iek ruak, langyah saong peih bruk blaic raih ka 237 mikva gaok dom ruak ka mata ngan haong abih tih paok jien lac labaih 400 triệu đồng kayua Kapul ngak pahla Tâm An saong dom urang ngak pahla daong ba, daong rilo urang hu mata hadah hadai jang, lagaih dalam bruk raidiuk yaok harei.

Kong an TPHCM birau chap hu bruk taong mbai saong ma-in mbia kayua Tăng Khải Văn ndih apui thun 1988, daok Quận 10, TP.HCM pan akaok. Di jabat kong an, dom urang brei thau, thun 2021, Tăng Khải Văn hu pandar 3 tài khoản tame blah web "ibet888" ngan haong tanut 1 trieu, kuhria sumu tui jien 6 tỷ đồng blaoh jao veik ka Trần Quang Quy, ndih tapui thun 1986, daok di Quận 10 piah peih bruk ma- in mbia mbang jien. Camereip, kuhria taong abih jien cá độ dalam kapol nyaom ma- in mbia saong taong mbai nan labaih 100 tỷ đồng. Kong an TPHCM ba tabiak kaoh tui hukum, brei adat chap mek kareik 12 urang piah duah thau.

Jaik 2/3 mbang par di France meda njauk brei pandar padeih dalam harei ini kayua danak dak padeih ngak di dom urang ngak pasang iek không lưu, yaom lac dua gah hu sanya blaoh ka jien bilan saong pasiam veik kein laba ngak bruk. Di Ban ine Paris, 55% dom mbang par di mblang kapar praong abih di France lac Charles de Gaulle meda brei padeih saong paka ini meda daok tagok tal 75% di mblang kapar Orly. Dom mbang par meda brei padeih di ban Marseille praong ka 2 di France lac 65%, dalam tuk nan rilo ban praong karei yau ye Toulouse, Bordeaux, Nice atau Lyon jeng tagok tal jaik 50%.

Tui Kong ty Điện lực tỉnh Okinawa, Nhật Bản kuhria meng labaih 3 mon page ini tui tuvak pak nan, bruk lahik điện ralo labik rah tabiak jaik abih labik dalam ban Miyakojima, tỉnh Okinawa ba tal labaih 25.000 baoh sang lahik điện. Urak ini, oh ka thau kayua bruk halei ba tal, dalam tuk bruk pasang iek daok hu dom jabat chức năng di bhum palei peih ngak. Gah cảnh sát bhum palei pasang iek di dom jalan dalam ban piah padar urang peih radaih khik brei salamat kayua jaik abih gom jalan di pasak Miyakojima padam.

Nghị viện Châu Âu hu brei tapa dom adat pakauk pablei, blei tame saong pablei tabiak pandap panda hu ngak tabiak meng bruk kateik greik ba tame Liên minh châu Âu (EU). Mbang pasang iek camriep abih meda hu ngak salah dalam 30 harei ngak bruk. Mayah sa pandap njauk brei thau lac pandap ngak meng jalan pandar urang ngak kateik greik, pandap panda nan meda oh hu pablei di darak pasa EU saong dom lô pandap meda njauk pacang chip meng bhum labik tapen negar gah ini.