Jalan nao “Điện Biên Phủ - Caong khin di taneh ia” kayua Kapol dam dara CSHCM pakat negar peih ngak meng harei ini tal harei 27/4/2024 ngan haong dom bruk rivang sirah, alin pandap, hadar dhar phol dom baoh sang  urang lin chien si Điện Biên, baoh sang urang hu buh prein yawa ka cách mạng, Amaik VNAH, cuh gilau hadar dhar phol dom AHLS. Abih tih dom yaom jien daong ka tỉnh  Điện Biên saong dom puk palei dalam dom bruk ngak di danak dak jalan nao nan, lac labaih 7,6 tỷ đồng.

Salam uan 49 thun Harei peih paha gah maraong negar yasa taneh ia (30/4/1975 - 30/4/2024) Kapul urang dahlau daih ngak bol lin tỉnh Bến Tre peih bruk jao 8 baoh sang “anit ranam ayut sahabat” ka dom urang dalam kapul daok gaok kan kandah ka labik daok; dalam nan huyện Giồng Trôm hu 6 baoh sang, huyện Mỏ Cày Nam 2 baoh. Yaom yaok baoh sang meng 70-80 triệu đồng, po sang rik tame takik di nyu 30 triệu đồng sa baoh. Tapa jaik 10 thun peih ngak danak dak “anit ranam ayut sahabat” tal urak ini dom pakat kapul urang dahlau daih ngak bol lin tỉnh Bến Tre hu jak ba phun jien meng dom doanh nghiệp, urang ngak pahla atah jaik padang ngak 3.285 baoh sang ka dom urang dalam kapul kan kathaot.

Bruk palih ruah anek saih tal bac 10 chuyen meng thun bac 2024-2025 di TP.HCM hu dom kadha birau, dalam nan lac pakacah tame tal bac 10 chuyen Anh. Tui nan, thun bac anak tal, dua sang bac THPT lac chuyen Lê Hồng Phong saong snag bac  THPT chuyên Trần Đại Nghĩa brei padeih palih ruah anek saih bac tal 10 oh chuyen. Langiu di nan, sang bac THPT chuyen Trần Đại Nghĩa meda brei pabak 2 mon chuyen lac lich su saong dia ly. Dom tal bac chuyen dalam sang bac THPT Nguyễn Thượng Hiền, Nguyễn Hữu Huân, Gia Định, Mạc Đĩnh Chi palih ruah anek saih tal abih thun bac 2024 -2025…

Tỉnh Bình Thuận hu 47 xã, phường, ban sit daok rahtabiak bruk kurang ia taba pandar saong mbuan kurang ia pandar dalam tukvak anak tal mayah langik oh hu hajan, ngak kan kandah tal raidiuk di labaih 33.000 baoh sang, jaik 100.000 urang. Tỉnh Bình Thuận likau po buh jien tame padang ngak dom danak dak pabak ia taba pandar di dalam ban jhul samar bruk padang ngak dom danak dak pabak ia taba pandar, samar ba tame pandar, samar pabak ia pandar ka rahra.

Meng tuk rah tabiak bruk kurang ia pandar di bilan thu, Bol lin Bien phong Tiền Giang brei pambuak haong karja, kapol nyaom dom xã taphia negar tasik jak ba , daong pajneg jaik 1.400 met khoi ia hacih, alin brei 880 can nhua janih praong 30 lít, jaik 2.000 thung ia hacih janih praong 20 lit saong 2.000 block klaok ia brei saoh ka bhap bini di bhum taphia negar tasik di huyện Gò Công Đông saong Tâh Phú Đông. Bol lin  Bien phong Tiền Giang daok pandar radaih  patuh, radaih cơ giới karei pajang ia  mai tal yaok baoh sang.

Tui Đài KBS, di maong 7, 32 minit dah page harei ini, Hàn Quốc hu cuh vệ tinh quan trắc baoh taneh biak sit ka 1 (NEONSAT-1), meng mblang kapar vũ trụ Mahia di kaoh pulao gah barak di New Zealand. Vệ tinh nano ka 1 bo Hàn Quốc cuh mbang ini kayua Viện ilamo saong kong nghe bahrau Hàn Quốc cak rok patagok, trak labaih 100 kg, meda par di quỹ đạo ia harei atah baoh taneh 500 km, pasang iek baoh taneh meng camera quang học điện tử hu tanut phân giải 4m sambo mau saong 1m mbong jhuk. Ini lac vệ tinh camriep dalam danak dak cuh cụm 11 vệ tinh "NEONSAT", cụm vệ tinh pasang iek baoh taneh dalam langik bahrau.

Cục Cảnh sát jalan mbak Lào brei thau, dalam 7 harei  padeih raok thun birau Bounpimay meng blaoh, negar ini hu 319 mbang bala angaok jalan mbak, trun 26 mbang dut saong thun blaoh. Dom mbang bala angaok jalan mbak rah tabiak dalam tuk padeih le ini ngak brei 33 urang matai saong  594 urang njauk rambuac.  Đại tá Khamsone Sidavong, Pho Akok Cục Cảnh sát jalan mbak Lào brei thau, bruk menyum alak tapai  tuk peih radaih angaok jalan mbak lac makna ba tal dom bala, patui di nan lac dom mbang peih radaih  samar, oh njuak tui hukum.

Rilo bhum palei di Philippines daok gaok langik pandiak biak khang saong negar ini jeng hu dom urang metai dalam tuk langik biak kanjak jhak. Langik pandiak khang meng 42 độ C tal 46 độ C rah atah di 25 bhum palei di Philippines, dalam nan hu Bhum đô thị Manila, ban hu rilo rahra abih Quezon; dom ban di tỉnh Tây Mindoro, tỉnh Palawan, Iloilo, Bắc saong Đông Samar... Yaok rabau tal bac di grauk labik di negar Philippines daok brei kareik pabah mbang, salih tapa bac online piah khik caga prein yava di anek saih saong gru pato.