Harei kabroi, Pho Thu tuong Trần Lưu Quang mbaoh tangin tame Harak brei angan Ban Vũng Tàu, tỉnh Bà Rịa - Vũng Tàu, ngak salah bruk padang ngak palei pala birau thun 2023. Pho Thu tuong jao UB bhap bini tỉnh Bà Rịa - Vũng Tàu dang tabiak khan brei thau saong pok meyaom tui sarak ba tabiak; tacei pato UB bhap bini Ban Vũng Tàu patui khik dom bruk ngak hu saong paglong dom tanut chuan, iek praong tanut quy hoạch saong moi truong piah khik hu khang kajap dalam bruk padang ngak palei pala birau. Mbiah tal ini, di ban Vũng Tàu oh daok kandong sre padang ngak dom bruk di Danak dak pakat negar ka bruk padang ngak palei pala birau.  

UBND tỉnh Vĩnh Long bahrau brei buh jien tame padang ngak jalan plaih jalan roya 57 (jalan tagok tatua Đình Khao), atah abih tih 7km, haong yaom jien buh tame ngak abih tih labaih 1.200 tỷ đồng. Jalan plaih hu padang tabiak, nyu daong jhul patagok KTXH, khik kajap quốc phòng, an ninh suai lavik di bhum taneran kraong Cửu Long, ngak jeng bruk pambuak bhum di Vĩnh Long haong dom tỉnh tapen tasik gah pai bhum taneran kraong Cửu Long nao ban raya Hồ Chí Minh, trun bruk gar radaih saong patakik bala angaok jalan dalam ban Vĩnh Long saong dalam bhum.

Huyện Chư Prông, tỉnh Gia Lai lac sa dalam dom bhum ceik, hu ralo bhap bini bangsa takik, jalan sahaneng di bhap bini ka bruk sumu gauk daok biar. Kayua yau nan ye, bruk paglong prein khang peih ngak brei likei kumei sumu gauk ka urang taha palei, akaok mbon, urang hu angan je hu huyen Chư Prông thau lac bruk praong. Tapa nan, brei salih birau khang kadang dalam bruk sahaneng saong peih ngak dom bruk pambuak tal likei kumei samu gauk jeng yau langyah dom bruk njauk samar drah ngan haong urang kumei saong uranaih.

UBND tỉnh Kon Tum bahrau brei thau bruk taong yaom, dak labik dang di pandap dalam danak dak yaok xã sa pandap (ieu katut lac OCOP) pakat tỉnh thun ini, dalam nan dua pandap mek hu tanut 5 patuk lac Alak Sâm Ngọc Linh K5 Premium saong Alak Quốc tửu K5 di Cty Vingin. Gam haong dua pandap nan, 6 pandap karei jeng hu pok brei angan lac ginup prein piah mek hu angan pandap OCOP 4 patuk lac Alak Thảo Mộc PyLo Măng Đen 18, Alak Thảo Mộc PyLo Măng Đen 12; Vang Sim rừng Măng Đen 1, Vang Sim rừng Măng Đen; Patei bluh thu Joy, Panat bluh thu OHJOY.

Meng akok thun tal ini, UB bhap bini Ban Cần Thơ hu daong labaih 460 trieu dong ka bhap bini gaok kan kandah kayua glut jaleih takai kraong di dom quận, huyen nan lac: Bình Thủy, Vĩnh Thạnh, Cái Răng, Thới Lai, Phong Điền, Thốt Nốt. Gam haong bruk glut jaleih takai kraong, dom bilan akaok thun di ban Cần Thơ jeng hu hajan khang ngak jaleih, par tabung rilo baoh sang. Dalam nan hu mboh di huyện Cơ Đỏ, hajan khang gam hu ia patau ngak brei 6 baoh sang glut jaleih abih, 35 baoh sang par tabung saong rilo bein phun mbang baoh di bhap bini jaoh, jaleih.

Nerak không khí lac bruk ba tal 33.000 urang Ấn Độ metai yaok thun. Min bruk njauk menyai nan lac dom menuac matai kayua nerak không khí daok tagok di dom ban praong di Ấn Độ bhian hu maong lac hu không khí hacih. Tapa nan brei mboh lac bruk nerak không khí daok yam tabiak truh dom ban praong abih di taneh ia rilo menuac abih di dunya. Dom urang roh duah hu mboh lac, bruk taom gaok haong dom asar hu nồng độ glaong dalam tukvak katut panak dalam 48 mon meda ngak brei umo thun katut panak veik di rilo menuac

Mentri Tư pháp Mỹ birau ini hu mek duas jaik 200 urang pambuak tal bruk bleik saleik dalam dom danak dak iek glang prein yawa di negar, haong pok jien meblah mek tagok tal 2,7 tỷ đôla. Bleik saleik dalam bruk iek glang prein yawa hu jeng bruk kan kandah praong ngan haong dom rajaei di dunya, ngak jhak tal taong abih urang, dalam nan hu dom urang saong D.N. Bruk nan meda ngak patagok jien BHYT saong ngak tagok naong trak gah jien padai. Karja hu mek veik labaih 230 trieu dola jien mbaok, o to chiat jien saong dom drap ar karei di dom urang pambuak tal.

Piah khik kandauk abih ka dom khau tin di rajaei, Australia bahrau brei buh tabiak 2 tỷ đô la Australia piah padang ngak pasak dữ liệu di rajaei di sa labik kandauk abih di taneh ia ini. Pasak ini hu padang ngak piah daong dom jabat tình báo saong quốc phòng Australia khik piah hu salamat dom “thông tin nhạy cảm”. Gam haong nan, meda ngak brei siam veik prein klah rabha saong langyah “dữ liệu mật” di tanut glaong dalam salamat tui jalan ngak samar drah saong praong abih. Tui kuhria, pasak ini hu ba tabiak 2.000 bruk ngak ka rahra Australia./.