Piah sangka iek glang Tet 2025 ka urang ngak, Tong Lien doan Lao đong Viet Nam, Cong doan Viet Nam meda peih ngak Danak dak “Tet Jum pataom – Akaok thun bahrau ein ngai Ndang” pambuak pagam haong dom bruk ngak hu mboh di meta yau Peih pakak danak “Darak Tet Cong doan thun 2025,” peih ngak danak dak “Sruh radaih Cong doan - thun bahrau 2025,” “Sruh radaih apui Cong doan - thun bahrau 2025”…  Gam haong nan peih ngak danak dak “Sruh radaih apui Cong doan - thun bahrau 2025” daong jaik 2.000 harak radaih apui dua gah, daong jaik 400 harak kapal haok sa gah ka doan vien, urang ngak daok ngak bruk di dom puk palei gah meraong mai palei mbang Tet di dom tinh, ban gah Barak…

Tui Mentri Pato megru saka pakacah anek saih naih jioi pakat negar thun ini ngan hoang anek saih tal bac 12 akaok camereip bac tui danak Pato megru pho thong 2018 meda rah tabiak di harei 25-26/12. Mbang pakacah thun bac 2023-2024, dalam negar hu labaih 5.800 anek saih hu mbaok tame pakacah. Dalam nan, Ha Noi saong Ban raya Ho Chi Minh meda hu brei rilo abih 20 anek saih nao pakacah yaok mon, dom jabat karei hu 10 anek saih.

Jalan metro ka 1 (Ben Thanh – Suoi Tien) hu ba tame pandar meng di harei 1/10, hadei di sa vaktu pato tacei harak gar saong pandar ngak biak ka urang ngak di Cong ty TNHH MTV Jalan pasei do thi ka 1. Bruk pandar ngak iek hu peih ngak meng ini tal harei 17/11 ngan haong 47 bruk ngak karei di gauk di dom labik angaok jalan metro ka 1. Tui kuhria dalam bilan 12 ini jalan metro ini meda ba tame pandar.  

Harei 2/10, yaok ribau bhap bani Cam saong tuai damuai atah jaik mai pataom mbaok di bimong Po Klong Garai, Ban Phan Rang - Thap Cham, tinh Ninh Thuan saong bimong Po Sah Ine, Ban Phan Thiet, tinh Binh Thuan piah mong iek Kate thun 2024. Di tinh Ninh Thuan, dom halau janeng Cam Ahier ba akaok nyaom urang raok kieu ba khan ao Po Klaong Garai (urang patao hu rilo rik daong brei ka bhap bani Cam) meng palei Mblang Kacak, Phước Đồng xã Phước Hậu, huyện Ninh Phước tagok bimong Po Klong Garai. Dom halau janeng gah Ahier ngak adat peih pabah mbang bimong, menei ka rup patau, angui cuk khan ao ka rup patau, srah aia tagok rup patau Siva… brei mboh hatung hatai kanal hadar, thau dhal phol tal dom Po yang, ong akaok ong kei brei angin siam hajan lagaih, ngak mbang ginup meda, rai diuk trei sir.

Tanut aia sua dalam taneran di Bhum Taneran kraong Cuu Long dalam bilan 10 tui kuhria di tanut biar angaok akaok halau; glaong di bhum kreh saong bhum tapen tasik. Yau nan, ngan haong tanut aia sua hu brei thau dahlau dalam bilan 10, ye mong rah tapa jalan ribaong kraong di bhum gah angak halau Bhum taneran Cuu Long jeng daok peih ngak hu bruk pala drak. Yau nan min, kayua aia ndik hu kahria dahlau di tanut biak glaong pambuak haong hajan prong yau nan ye meda ba tal bruk aia duak di dom puk palei nan lac oh plaih hu.

Piah pacang cakak bruk padam trun akaok bol, Hy Lạp hu danak bruk buh tabiak labaih 20 ty euro, samu 22 ty dolla My piah brei peih ngak dahlau dom phun jien daong saong patrun jien je. Tui Mentri baoh sang saong Xa hoi Hy Lạp, danak bruk ini piah ngak brei patrun pambak di bruk padam trun ty le caih menek saong rilo manuac urang taha ngan haong bruk khang kajap di gah jien padai, bruk meriak gauk suai lavik saong bruk pambuak pagam dalam rahra. Dalam nan, jalan ngak puac abih di danak bruk nan lac pasiam veik rai diuk di bhap bani. Hy Lạp, nan lac taneh aia hu bruk caih menek bỉa di abih dalam thun 2022.

Dom roh duah di Australia hu brei mboh 3 angaok 4 urang njauk ciuk bao luc tinh duc kayua pandar dom nen tang pagun gaok gauk. Saong kadha ini oh lac tok nghiem trong di ta-eng Australia. Kayua yau nan ye dom ứng dụng pagun gaok hu njauk hatai haong bo quy tac ung xu kayua rajaei Australia ba tabiak, hu peih pandar meng harei 1/10/2024. Bo Quy tac ung xu di Australia caong khin dom nen tang duah mboh dom kadha kanjah jhak, saong pandar brei padaih tai khoan di urang ngak suan.

Tui Mentri Noi vu Nepal, takik abih 218 urang metai dalam mbang aia sua meng blaoh, 27 urang karei jeng oh ka duah mboh saong labaih 4.000 urang hu daong veih. Jabat langik tasik Nepal brei thau hu brei mboh jalan prong ngan haong halau aia tagok tal 240 mm hu pruh trun gam gam dalam harei 28/9. Ini lac mbang hajan prong di abih dalam harei di labaih 20 thun tapa. Meng akaok thun tal ini taneh aia ini hu labaih 300 urang matai lahik dalam dom bala pambuak pagam tal ribuk aia sua.