Mentri Pato megru daok ngak dự thảo Thong tu ramik pasiam, pabak Quy chế palih ruah anek saih THCS saong palih ruah THPT salih ka thong tu daok pandar yau urak ini. Tui nan, jalan palih ruah  anek saih tame tal bac 10 THPT, Mentri Pato megru ba tabiak 2 jalan lac palih ruah saong pakacah. Ngan haong jalan palih ruah brei pasang iek tui bruk bac da-a dom thun bac danak dak pho thong palat THCS atau danak dak pato pakai thuong xuyen pakat THCS. Daok jalan pakacah ye: brei pakacah klau mon, nan lac: toán, ngữ văn saongsa mon pakacah kayua Sở pato megru suak sam.

Di mbang nyaom biai di Mban Chap hanh Ndang bo mbang ka 19 di huyen uy Can Gio – Ban raya HCM, Akaok UB Bhap bini Ban raya HCM Phan Văn Mãi pandar Can Gio jhul samar drah bruk salih bahrau hanh chinh, karja số piah mikva dalam huyen oh daok tagok nao tal pasak Ban raya, lahik rilo tukvak…Akaok UB Bhap bini Ban raya HCM caong takre tal tukvak 50 thun peih paha bhum Meraong, yasa taneh ia, rahra Can Gio meda hu mboh, taduan hu dom jak jeng meng bebat, yasa, patagok. Tal abih bilan 9, huyen Can Gio hu dui pachreih labaih 3,5 trieu mbang tuai damuai mai ravang me-in, jien laba hu jaik 3.000 ti dong, tagok 20% dut haong tukvak ini.

Peih ngak Adit Ilamo - Yulit  saong Le hoi Ok Om Bok thun 2024 di tỉnh Trà Vinh meda peih ngak meng harei 9-15/11 di Labik Ilamo - Yulit hlung ia Bà Om, phường 8, Ban Trà Vinh. Bruk ngak tuk peih pakak lac parang iek dom pandap nda kaya kan gheih takre di bhap bini urang Khmer, parang bruk ngak, ngui cuk khan ao bangsa Khmer, melam Le hoi Ok Om Bok. Tui UBND tỉnh Trà Vinh, kuhria abih tih jien peih ngak Adit Ilamu - Yu lit saong Le hoi Ok Om Bok thun 2024 tui kuhria mboh dahlau labaih 6,4 tỷ đồng.

Dalam 5 thun tapa, tinh Ba Ria – Vung Tau hu buh jien tabiak labaih 780 ty dong piah ngak yaok rituh danak dak ka rahra, an sinh xa hoi piah patagok kinh te bhum mikva bangsa takik. Langiu di bruk buh jien ka cong trinh rahra, dom sarak daok ka mikva bangsa takik kathaot, hu sang kan kandah ye tinh jeng daong tapuk siphau, tapuk bac megru ka anek kamuan bangsa takik mai tal sang bac.; daong ka dom harei rija roya meng kal, bruk mbang daok me-in bol bhap, piah khik ramik saong patagok dom yaom glaong bol bhap siam gheih di dom bangsa adei sa-ai dalam tinh. Meng nan, tal abih thun 2023 lac daok tok 78 baoh sang urang bangsa takik kathaot.

Kong an tỉnh Bình Dương birau peih bruk pathau khan hukum ka jalan mbak jalan ia dalam bhum ka rahra daok di tapen kraong ia Sài Gòn, nao tapa  phường Phú Thọ, ban Thủ Dầu Một. Tui Kong an tỉnh Bình Dương, bruk pathau khan dom quy dinh di hukum ka bruk jalan ia dalam tinh lac makna biak paraong. Tapa nan, piah paglong jalan sahaneng di bhap bini ka bruk ngak tui hukum  saong khik brei salamat tuk nao tui jalan ia. Tukvak anak tal, đơn vị brei peih dom mbang pathau khan ka bhap  bini daok diukrai di tapen dom kraong Sài Gòn, Đồng Nai saong Thị Tính.

Campuchia hu “ngak ky luc” ka dom urang duas hu mek hu saong dom jru phil hu mek khik. Tui nan dalam 9 bilan tapa hu mek kareik 19.655 urang hu sahneng pambuak tal jru phil. Abih tih hu labaih 6 tấn jru phil rilo janih hu mek khik. Bruk duah mek urang pablei jru phil hu jhul khang di Campuchia kuhria meng bilan 8 thun dahlau, hadei di Thu tuong bahrau Hun Manet tagok ngak.

Ribuk Krathon tuh tame Đài Loan (Trung Quốc) ba tal takik abih lac 2 urang, 219  urang njauk rambuac. Yaok rituh mbang kapan haok saong radaih brei padeih. Taong abih 22 huyen saong ban di Đài Loan brei kareih pabah mbang sang bac saong labik ngak bruk dalam dua harei. Dalam tuk nan, apui khuah rah tabiak di sa sang iek ruak di gah Meraong kaoh pulao ngak 9 urang metai. Apui khuah  rah tabiak tuk Đài Loan daok gaok ribuk Krathon ba tal bruk panduan ba urang ruak gaok rilo kan kandah.

Dom urang siam hatai di Lien hop quoc brei thau, labaih 5 trieu urang di 16 negar Tây saong Trung Phi gaok khut tayah khat lahik kayua ia sua dalam thun ini. Urak ini hu labaih 1.000 urang metai saong takik abih 740.000 urang brei taduan. Langiu di nan, yaok rituh ribau baoh sang, labaih 100 sang bac saong yaok pluh labik y tế gaok khut tayah. Jaik 500.000 mẫu taneh pala drak jeng gaok pambuak jhak. Jabat Điều phối dom bruk siam hatai di LHQ hu ndom khang lac, meyah oh daong ginup, ia sua nyu ngak kandah ka bruk peih pabah mbang dom sang bac dalam tuk jaik tame  thun bac bahrau ini./.