Drap ar Linga ameh di tỉnh Bình Thuận birau hu Thu tuong Rajaei taduan lac drap ar pakat negar. Drap ar pakat negar Linga ameh  tỉnh Bình Thuận  hu meng abap VIII – IX, lac pandap tamo tok hasa ta-eng, gireih, hu thaok thaok biak karei hu makna ka sajarah dak rai, ilamo, thẩm mỹ. Urak ini, Linga ameh di bimon Po Dam xã Phú Lạc, huyện Tuy Phong lac tư lieu ilamo hu makna praong dalam oh lac gah roh duah bo daok hu makna  praong ngan haong bruk roh duah sajarah dakrai, ilamo, mỹ thuật, agama, bruk ngak ameh di bhap bini Cam meng kan.

Harei Kate thun 2024 ini, kapol urang jakar di Mban Ton giao Rajaei hu mai rivang, alin pandap ka Hoi dong Hahlau janeng Cam Balamon di Labik ngak bruk di Hoi dong di  palei Mblang Kacah -Phước Đồng 2 thuộc xã Phước Hậu, huyện Ninh Phước, tỉnh Ninh Thuận. Ong Adhia brei panuac thau dhar phol  Đảng, Karja, dom urang jakar, dom gah pakat negar, urang ngak  praong di bhum palei brei hu sangka kuhria buh jien tame ngak rilo danak dak, sarak  daong bhap bini Cam dak harei dak trei sir, palei pala kaya meda, anek taco bac da-a naih joi. Hoi dong Hahlau janeng Cam Balamon tacei pato mikva peih ngak Kate brei patak pataom, saim mekre, piah jien padai ngak mbang, raong anek bik nao bac da-a tal labik tal dhua.

Sen Đôn Ta di bhap bini Khmer daok peih ngak di dom tỉnh gah Meraong negar dalam chreih chrai saong anit ranam, jum pataom gauk. Đại đức Danh Thanh- Hội Phó Thường trực Kapol jum pataom sư sãi anit ranam taneh ia tỉnh Hậu Giang-Trụ trì baha Sasanarăngsây di ban Vị Thanh khan lac, mikva parabha jeng rilo nyaom yaok harei mai ngak adat di baha le Phat, pok lisei ka dom sư sãi, likau brei ka urang lot diah hu siam mekre, yau brei mboh bruk thau dhar phol ngan haong muk kei di drei, hadar tal dhar phol  urang dahlau diah hu daong ka bhum palei. Tukvak tapa, Hậu Giang peih ngak dom sarak di Karja, rik daong ngak brei salih birau patagok mboh di meta dalam raidiuk jeng yau jalan sahaneng  di bhap bini bnagsa, dalam nan hu bol bhap bangsa Khmer.

Jalan Tân Thới Hiệp 21 lac jalan pabah mbang pambuak jalan roya  praong haong dom gah Tay Nam di Ban raya HCM birau hu Ban raya mbaoh harak brei peih praong  ngan haong phun jien buh tame ngak labaih 1.300 tỷ dong. Ini lac danak dak  hu pambak tal biak praong tal bruk quy haoch jalan mbak di Ban raya  piah trun takik gar jalan, langyah bruk duak ia saong ramik pasiam đô thị. Danak dak kuhria caga peih ngak di bilan 4 thun 2025 saong salah dalam thun 2026.

Di Labik rivang ma-in Vườn Xoài, tỉnh Đồng Nai hu 17 drei rimong Bengal, di nyaom athur daok biak takik saong sa drei mbao metai kayua njom ruak kum A/H5N1. Urak ini, Chi cục Thú y Vùng VI hu brei pasang iek, mek mau piah khan brei Mentri Y te thau. Dahlau di nan, hadei tuk duah mboh taphon rimong metai, jabat thu y mek mau, ba nai dut iek di sa kong ty hu xet nghiem, camereip medil lac taphon rimong  saong mbao njom ruak kayua mbang rilo manuk. Tukvak tapa, bruk blei rilo manuk meng negar mai  meda hu ba tui ruak tame.

Yaok rituh urang lin daong padam khuah Hy Lạp daok kham merat padam apui daok khuah di bhum Corinthia, ba tal 2 urang metai saong yaok pluh urang karei njauk rambuac di Dom taneh ia dalam Lien minh chau Au brei sanya daong anak bruk kan kandah bika trak kayua apui mbang glai. Dalam 24 tuk tapa, taneh ia ini hu abih tih 41 mbang apui khuah glai. Hy Lạp  bhian njauk palai pajua kayua rilo mbang apui khuah glai meng bruk baoh taneh pandiak tagok. Kuhia dalam dom bilan tapa, gah daong padam apui khuah di taneh ia ini brei caga labaih 4.500 mbang apui khuah glai.

Meng harei 1 bilan 10, urang kumei di Anh brei alin baoh anek meda taduan hu 985 bảng, sumu 1.300 dola My. Dalam tuk nan, likei alin brei tinh trung jeng hu taduan 45 bảng. Tui Jabat Thụ tinh saong Phôi học Người di Anh, yaok 170 uranaih hu ndih tapui di Anh ye hu labaih 1 uranaih metian tapa bruk alin brei  baoh anek atau tinh trùng. Uranaih di Anh hu ndih tapui tabiak tapa bruk alin brei baoh atau tinh trùng meda hu duah thau khaw tin ka urang hu lain brei tuk umo 18 thun.  

New Zealand birau padang tanut glong abih di dunya ka urang parang iek Haka, sa ragu chat tamia meng kan di urang Maori di taneh ia ini. Mbang parang iek hu peih ngak di Mblang bein Auckland ngan haong 6.531 urang hu mbaok tame, yam tapa kỷ lục  urak ini lac 4.028 urang. Ragam tamia Haka lac sa binah  hu makna praong dalam ilamo di New Zealand saong bruk mek hu ky luc dunya meng bhum taneh hu meng akaok meti di nyu hu makna biak praong./.