Pahadar 93 thun harei padang Kapul dam dara CS HCM(26/3/1931 - 26/3/2024), page ini, di Ha Noi, Thủ tướng Phạm Minh Chính taom mbaok saong ndem meyai nao mai haong dam dara ngan saong kadha “Patagok bruk ba akaok nao dahlau di dam dara dalam bruk salih số negar”. Danak dak  ndem meyai pataom tame dom nyaom asar  kadha praong, lac: dom jalan ngak, sarak di Karja ka bruk salih so negar; patagok bruk ngak di dam dara dalam salih so negar…Dalam danak dak, Thu tuong taom mbaok saong pok meyaom dom Dam dara Viet Nam naih gheih saong Dam dara Viet Nam daok patagok thun 2023.

Tui Kuhria mboh dahlau di gah chức năng tỉnh Hậu Giang, langiu di bruk njom ia mbak meng ia tagok di tasik biển Tây, meng urak ini tal puac bilan 3, ia njom mbak tui ia tagok di tasik biển Đông di kraong Hậu jeng  meda rahtabiak sarau kadau. Jalan ia nduac meng kraong Hậu tame oh ginup pabak ia taba piah pandar saong ngak mbang, pala drak, bruk kurang ia rahtabiak di dom bhum palei. Kayua yau nan ye, UBND tỉnh ieu kakei dom bhum palei pataom prein tame pathau khan jak ba rahra ngak yaok jalan langyah, pandap panda khik piah ia taba, tani tanat ginup ia pandar dalam raidiuk dalam bilan pandiak, njom ia mbak ini.

Meng akaok thun mbiah tal ini, dalam tỉnh Tiền Giang hu 2 bruk mblung ia, ngak brei 3 adei metai. Makna ba tal bala lac kayua tỉnh hu rilo kraong, ribaong; uranaih kurang bruk tui iek di amaik ame, urang iek glang…Langiu di nan, ralo uranaih oh ka hu pato bruk khik brei salamat dalam ia, jalan sahaneng ngak habar tuk laik trun ia. Nan ye, piah pacang caga  bruk mblung ia di uranaih hu siam, Tiền Giang  njauk brei peih ngak rilo jalan, dalam nan, pataom tame paglong jalan sahaneng pacang caga mblung ia saong pato pasram pacang mblung ia ka bhap bini, uranaih.  

Jit cum manuk ada jeng daok hu sit sot di tapon manuk ada di rilo tỉnh, ban. Meng akaok thun tal urak ini, hu 6 sruh jit cum manuk ada di 6 tinh ban lac: Bắc Ninh, Ninh Bình, Khánh Hòa, Bà Rịa - Vũng Tàu, Long An, Tiền Giang. Tukvak ini daok lac tukvak salih bilan, langik hu rilo salih  karei lagaih ka virus cum manuk ada tamuh tabiak. Piah pacang caga jit cum A/H5N1 njom pambak meng manuk ada tapa manuac, rahra njauk peih ngak siam dom jalan langyah: oh mbang ralaow manuk ada, dom janih ralaow pandap njauk ruak kik, metai saong oh thau asal di nyu; mbang pandap mbang tathak, manyum ia pandiak; rao tangin meng xa phon dahlau di tuk mbang.

Bilan 4 ini di Palei Ilamo – Dulich dom bangsa Viet Nam, Đồng Mô, Sơn Tây, Hà Nội hu peih ngak Harei Ilamo dom bangsa Viet Nam. Thun ini, tui kuhria  hu mbaok tame di labaih 300 urang, 54 bangsa di 63 tỉnh, ban mai. Di harei pataom nan hu peih ngak dom bruk yau: meyaom taha kaok palei, akok mbon, urang hu angan je hu ngak rilo bruk rik tame khik ramik, patagok  ilamo bangsa di puk palei. 

Urang dang akaok kanja quân sự Myanmar, Tướng Min Aung Hlaing brei thau lac negar ini daok kuhria peih sa mbang pilih ruah hadei di tuk negar ini mek hu bruk saron mbon saong tani tanat, siam makre, min bruk pilih ruah meda oh peih tabiak di abih labik dalam taneh ia. Hadei di 3 thun pan quyen, kanja quân sự Myanmar daok gaok cuang kandah biak praong, meng bruk brok tagok ngak jeng bruk mesuh gauk  dalam taneh ia.

Tui kuhria, khat lahik kayua khung bo di sang daok Crocus jaih ban ine Mosow, Nga meda tagok tal 10 tỷ Ruble (labaih 109 triệu USD). Kong ty Ingosstrakh lac doanh nghiep bao hiem di sang daoh nan khan lac brei ngak dom bruk di drei tui harak mbuak bruk blei bao hiem. Urak ini, dom urang metai tagok tal 137 urang saong 182 urang njauk rambuac. Rilo urang jakar di Nga  iew brei pandar veik hukum tử hình, hadei di bruk cuh phao ini saong kol khung bo ini, njauk ba tabiak truh raidiuk, tabiak truh dunya ini.

Hội đồng Bảo an Liên hợp quốc hu brei tapa Sarak ieu padeih cuh chip di Israel saong Hamas jang yau palao chip dom urang njauk cap khik. Sarak di Hội đồng Bảo an jeng “ndom tal bruk njauk peih praong dom bruk daong pahla saong paglaong bruk khik ka rahra dalam Dải Gaza saong ndom veik bruk ieu yah klaak yaok paga pacang ngan haong bruk daong pahla praong."