Pho Thu tuong Trần Lưu Quang birau mbaoh tangin tame harak brei angan huyen Châu Thành, tỉnh Đồng Tháp mek hu tanut palei pala birau thun 2023. Pho Thu tuong jao UB bhap bini tỉnh Đồng Tháp khan brei thau saong pok meyaom tui hukum, tacei pato UB bhap bini huyen Châu Thành patui khik saong paglong asar dom tanut chuan, brei caik hatai ka bruk ngak mbang pala drak saong alam moi truong piah khik brei khang kajap dalam bruk padang ngak palei pala birau.

Kapul pasang iek di TW ka duah thau, pataom mek khau tin ka bruk KTXH di 53 bangsa takik thun 2024 bahrau mai pasang iek bruk ini di tỉnh Bạc Liêu. Di UBND xã Hưng Hội, huyện Vĩnh Lợi (labik hu jaik 70% urang bangsa Khmer), urang dang akaok xã hu pathau khan katut panak ka bruk cakrok KTXH, bruk duah thau, pataom mek khau tin ka cakrok KTXH 53 bangsa takik dom harei camereip duah thau, pataom mek. Bạc Liêu hu 152 labik haong 78 urang pasang iek duah thau. Abih tih dom sang hu harak pasang iek duah thau tuk camereip lac 4.657 sang urang dom bangsa takik. 

Urang ngak nong pala njam patam di tỉnh Trà Vinh urak ini daok hu jien mek tame biak glong, meng rilo janih njam patam daok tagok yaom meng 3.000 - 10.000 đồng sa kilo dut saong 10 harei dahlau. Ngan haong dom baoh sang urang ngak nong hu ngak sang pacang halam nyol piah pala njam patam hu laba glong jang 1 mbang meteh tal 2 mbang dut saong baoh sang pala njam patam yau dahlau daih. Tui ong Lê Văn Đông, Pho Yam ndoc So Ngak nong saong Patagok palei pala tỉnh Trà Vinh, gah ngak nong daok pachreih urang ngak nong salih tapa pala njam patam; abih di nyu lac palih ruah bruk palan njam patam dalam sang pacang halam nyol, brei pandap hacih sa-at pabak bruk pandar di urang blei saong paglong jien mek tame ka urang ngak nong.

Tui panuac khan di dom sang raong hadang di tỉnh Bà Rịa-Vũng Tàu, meng hadei Tết Nguyên đán tal harei ini, yaom hadang laik trun gam gam. Urak ini, yaom hadang lac 120 rabau đồng/kg (janih 35 drei sa kg), min jien sahui bo urang raong buh tabiak jeng lac 120 nghìn đồng sa kg, nan ye tui yaom pablei yau urak ini, urang raong oh hu laba, meyah yaom trun jang, urang raong khat trak. Bruk raong hadang dahlau di nan gaok langik pandiak khang, urak ini daok tame bilan hajan nan ye hadang mbuan njauk ruak, suai praong, tui nan jien sahui raong tagok glaong jang, yaom pablei lap ngak ka rilo urang raong khat trak, hu sang brei padeih raong.

Tui UB bhap bini tỉnh Cà Mau, bruk glut jaleih takai kraong, takai tasik di tỉnh rah tabiak dak harei dak trak. Tỉnh daok hu 187 dalam 254 km takai tasik glut jaleih. Dalam 10 thun ini mai, jaleih takai tasik ngak lahik labaih 5.250 ha taneh glai. Urak ini, hu labaih 425 km takai kraong, ribaong glut jaleih saong jaik si jaleih praong sit karei di gauk. Langiu di nan, tỉnh jeng daok gaok kan kandah ka halau ia taba. Tuk pandiak tua riya ye kurang ia taba ngak glut jaleih taneh rah tabiak trak damak jang. Ta-eng bilan thu meng blaoh, labik ngak brei taba ia mbak Cà Mau njauk glut jaleih labaih 700 labik, ngak khut jaik 20km jalan nao mai.

Nhật Bản daok rah tapa dom harei pandiak khang tuk rilo labik langik pandiak tal 38 độ C, hu tuk, hu labik meda glong jang. Gah Khí tượng saong Mintri Môi trường Nhật Bản hu ba tabiak panuac brei thau ka bruk “mbuan njauk mebuk pandiak” di dom labik saong hu panuac kakei bhap bini takik tabiak langiu, brei pabak ginup ia ka rup pabhap, menyum rilo ia yaom lac oh mehu piah khik ka rup hu salamat.

Rajaei Colombia brei thau, urang jakar mek hu abih tih 196 tấn cocaine, 112 gilai pajeng pandap, 9 gilai nduac ala ia, 5 kapal haok saong pagui mek kuhria abih tih 744 urang pablei salih matuy dalam mbang pagui mek matuy tapa rilo taneh ia hu peih ngak meng harei 15/5 tal harei 30/6 meng blaoh. Ini lac sa binah dalam dom bruk praong pacang caga pablei salih padauk matuy praong lac “Orion 13” kayua hải quân taneh ia ini tacei ba, hu mbaoh tame di dom gah pacang caga matuy mai meng 62 taneh ia châu Mỹ saong châu Âu.

Jaik 30 rabau menuac njauk plaih nao daok di labik karei kayua khuah glai daok mbaak praong di Bắc California, Mỹ. Labaih 1.400 menuac padam khuah hu pataom mai piah pacang pui daok mbang tabiak 1.400 ha jaik ban Oroville. Thống đốc bang hu tabiak bruk samar drah piah pacang pui khuah saong piah pasiam dom khut khat kayua pui khuah. Kayua halei ba tal khuah jeng daok hu pasang iek, duah thau./.