Sở Ilamo - The thao saong Dulich Bình Thuận hu patabiak jalan ngak Kate thun ini, di bimon Pô Sah Inư. Tui nan, Kate hu peih ngak meng harei 1 - 2/10, hu binah ngak adat saong bruk main bui sambai. Dalam nan, adat ngak yang di bimon praong likau brei siam mekre, adat tamia raok da-a po yang, kayua dom halau janeng Cam Bini saong Cam Balamon huyen Hàm Thuận Bắc peih ngak. Dalam mbang Kate thun ini meda hu khan brei thau Sarak brei angan Drap ar negar ngan haong Linga ameh di urang Cam hu duah mboh di thun 2013, di dom bimon Po Dam di xã Phú Lạc, huyện Tuy Phong, tỉnh Bình Thuận.  

Ngak tui bruk ba tabiak di Nyaom roya dom bangsa takik mbang ka III, huyện Krông Ana, tỉnh Đắk Lắk brei peih ngak dahlau bruk pato bruk ngak, ba brei bruk ngak, patagok jien mek tame ka mikva. Meng hu bac bruk ngak, pato pasram paglaong tangin gheih ngak, rilo urang bangsa takik dalam huyện hu jien mek tame tani tanat, paglaong raidiuk.. Huyện Krông Ana hu 30 bangsa, dalam nan urang bangsa takik hu jaik 24%. Tal urak ini, dom sang kathaot dalam huyện trun daok 808 baoh, dalam nan daok 483 baoh sang kathaot lac bangsa takik.

Kong an tỉnh Kiên Giang birau pataom iek 10 thun peih ngak sarak di Mentri Kong an “ Jhul pasamar bruk jak ba taong abih bhap bini khik caga taneh ia dalam bhap bini dom agama”. 10 thun tapa, dom pakat ủy Đảng, karja tỉnh Kiên Giang hu peih bruk pathau khan, jhul pakhang bruk taong abih bhap bini khik caga Taneh ia dalam bhap bini dom agama haong labaih 10.000 mbang ngan haong labaih 323.000 mbang urang hu mbaok tame. Tapa nan, bhap bini kham merat jang dalam dom bruk jak ba taong abih bhap bini khik caga ANTQ, rik tame khik taneh ia, sron mbon palei negar tani tanat raidiuk.

Di xã Đăk Kôi, huyện Kon Rẫy, tỉnh Kon Tum, Tỉnh đoàn Kon Tum pambuak haong Tỉnh đoàn Đồng Nai peih bruk tabiak mbaok ngak danak dak halan hatian mbang padeih hồng thun 2024. Tapa nan, dam dara 2 tỉnh Kon Tum saong Đồng Nai hu alin hadiah 400 pok pandap brei ka dom adei sit di xã Đăk Kôi, huyện Kon Rẫy haong yaom jien abih tih lac 100 triệu đồng; alin 100 bộ khan ao saong 50 pok jien bac, yaok pok yaom 500 rabau đồng brei ka anek saih sang kan kandah.

Tui So Ilamo - The thao saong Dulich Đồng Tháp, hadei di 5 thun peih ngak Danak dak patagok dulich hu rik tame padang ngak thaot binguk saong bruk dulich tỉnh Đồng Tháp dalam bhum Taneran kraong Cuu Long saong salam negar. Đồng Tháp urak ini hu 72 labik rivang ma-in bhap bini, dulich ngak nong, dalam nan hu 11 labik dulich hu tanut chuan; 53 labik dulich ngak nong, dulich bhap bini hu brei sarak adat duh ka tuai damuai rivang ma-in. Abih di nyu, hu 7 labik rivang ma-in ngak nong hu brei OCOP nyaom Dulich bhap bini, Dulich sinh thái saong Labik dulich.

Hu yaih khan mbang camereip di thun 1959 di New York, Mỹ, búp bê Barbie hu jeng sa dalam dom janih pandap me-in pablei nduac abih di angaok dunya saong lac sa kadha brei mboh ka ilamu. Di tuk uan búp bê Barbie ginup 65 thun umo, sa var parang iek chreih chrai ka bruk cakrok di Barbie hu peih tabiak di ban ine Luân Đôn, negar Anh meng harei 5/7 tal abih harei 23/2/2025. Tui kuhria, hu labaih 250 pandap meng Barbie hu parang iek, meng phiên bản camereip abih di “anai” Barbie tabiak mbaok di thun 1959 haong mbuk kanyik katam dalam bộ pandap caluai ia jhuk mbong saong dua asar mata hadah tanyak.

Yaok rituh urang khik iek quyền urang ruak Hàn Quốc trun jalan di ban ine Seoul, iew dom bác sĩ brei padeih bruk trun jalan dui atah nga jhak tal dom jit vụ y te bhap bini di taneh ia ini. Urang trun jalan jeng hu iew brei tabiak hukum pacang dom bruk dreih yau nan rah tabiak veik, ngak jhak tal prein yawa saong bruk diuk metai di urang ruak. Rajaei Hàn Quốc brei patagok bruk palih ruak labaih 1.500 anek saih dom sang bac y khoa thun 2025, piah lang talaih bruk kurang bac si saong bhap bini umo taha samar.

Gah tui iek bruk langik tasik Trung Quốc bahrau hu panuac brei thau dahlau lac langik meda pandiak glaong di jaik abih dom labik di taneh ia ini dalam dom bilan tal, brei mboh lac sa bilan hè pandiak khang ka 2 gam gam. Bilan hè thun blaoh, dom ban gah brak di Trung Quốc njauk rilo mbang pandiak khang. Dom harei ini, Trung Quốc daok njauk pandiak khang, nhiệt độ glaong abih meng kan mai oh ka bhian mboh di rilo labik gah brak saong gah kreih negar./.