Nyaom biai piah taong yaom bruk KT-XH quý I, bruk praong di quý II saong tukvak daok veik di thun; pasang iek brei panuac  ka dom asar kadha hu makna praong saong dom bruk urang jakar jeng yau sap pagap bruk ka Nyaom biai Đảng bộ TPHCM mbang XII. Brei panuac  peih mbaok nyaom biai, Bí thư Thành ủy TP.HCM Nguyễn Văn Nên caong lac bruk pan akaok ba jalan tacei pato jeng brei pasang iek veik, ngak habar piah ba dom asar kadha di bruk ngak tame raidiuk siam lagaih, ngak brei salih birau, pabak prein khang patagok di quy II meng meda ngak hu dom bruk ba tabiak dalam thun.

Dah page ini (27/3) Sở Ngak nong saong patagok palei pala An Giang pambuak haong UBND huyện An Phú pablei tabiak lô pa-aok keo camriep di huyen tapa darak pasa Hàn Quốc. Tui ong Trang Công Cường, akaok UBND huyện An Phú, meng jak jeng di bruk ba pa-aok keo pablei tabiak negar langiu, huyen brei jhul khang bruk daong ka doanh nghiep, urang ngak nong padang ngak bhum pandap panda tani tanat, cak rok patagok pambuak gauk di chuoi gia tri hu yaom glaong khang kajap, jhul samar bruk pabak mã số dom bhum pala pa-aok daok veik piah patagok parilo pa-aok pablei tabiak negar langiu.

Urak ini, urang ngak nong di dom bhum pala phun durian Tiền Giang bui sambai lo kayua yaom tagok glong abih kuhria meng dahlau mai. Di huyện Cai Lậy, durian Mon Thong meng 200.000 - 230.000 đồng/kg daok durian  pajaih  Ri6 jeng hu yaom meng 130.000 tal 145.000 đồng/kg, ini lac yaom glong abih kuhria meng dahlau mai. Yaom nan, yaok ha durian urang pala laba hu labaih 1,5 tỷ đồng. Di Tiền Giang, urang pala durian bhian pandar ilamu ky thuat pala parai tabiak piah paik baoh dua mbang: sa mbang paik baoh dahlau bilan Tet nguyen dan saong mbang hadei paik baoh di bilan 3, bilan 4 saka ia bulan thun hadei.

Bhum kreh Bein negar U Minh Thượng, tỉnh Kiên Giang praong jaik 20.000 ha, lac labik pabak yaok ribau tấn njam patam baoh karaoh dom janih piah pabak ka darak pasa dalam taneh ia saong langiu negar. Piah ka dom bruk pala ngak ba mai kein laba khang kajap, taphia di bruk ba brei ilamo ky thuat bahrau; tacei pato daong ka urang nong ilamo sangka, pacang cakak halak halieng… gah ngak nong huyen daok bhian ba  tabiak jalan ngak ka dom so, dom gah dalam tinh duah dom doanh nghiep mai blei, pambuak bruk sanya blei abih kaya nong di urang ngak nong.

Bhum taneran kraong Cuu Long daok dang anak bruk pandiak bhang, ia mbak biak khang. Kuhria meng puac thun 2015 mbiah tal ini, hu 11/13 tỉnh, ban brei thau ka bala meng langik pandiak, njom ia mbak. Tui Pasak kuhria mboh dahlau bruk Langik tasik pakat negar, meng meteh bilan 12 thun dahlau mbiah tal ini, di bhum taneran kraong Cuu Long oh hu hajan. Gam haong nan hu rilo mbang njom ia mbak, tabung glong lac bilan 3 ini, ia mbak 4‰, dalam meng 40 - 66 km. Urak ini, ia mbak njaom tame di Sóc Trăng, Long An, Trà Vinh, Tiền Giang glong jang tanut yaok thun, jaik sumu thun 2016 nan lac  sa dalam dom thun pandiak bhang, njom ia mbak glong abih di bhum taneran kraong Cuu Long.

Việt Nam, Malaysia, Singapore daok dang anak bruk gaok pandiak bhang biak khang dalam bilan pandiak ini. Malaysia daok ba tabiak dom jalan ngak samar drah piah pacang caga haong mbang pandiak dak harei dak trak damak jang hadei di tuk nhiet do tagok tal jaik 40 độ C, ngak kan kandah tal nang suat phun pala. Daok di Singapore, rahra jeng daok havieng akaok di langik pandiak, ngan haong nhiệt độ 36,3 độ C. Jabat Kuhria mboh dahlau bruk langik tasik Singapore brei thau, ini lac thun pandiak ka 4 dalam sajarah di negar ini kuhria meng di tuk dữ liệu hu mboh di thun 1929.

Jabat yaok pataom pakat negar Italia brei thau, 5 trieu 750 rabau urang Italia, sumu 9,8% bhap bini, daok dalam “kathaot rambah, eik lipa”, oh hu jien blei pandap saong dom bruk sit abih ka raidiuk yaok harei. Dom menuac daok dalam kan kathaot eik lipa di Italia  tagok glong abih dalam pluh thun, yaom lac hu bruk pasiam veik kinh te hadei di tuk dom bruk takik brtei ngak kayua jit praong COVID-19 hu talaih pacadu.

Hải quan Negar Malaysia duah mboh 380kg jru phin hu padauk melam dom paok cea jru tavao di Trung Quốc. Tapa duah thau tuk camriep mboh lac, dom jru phin ini meda hu asal lac meng bhum Tam giác vàng, hu pajeng meng jalan radaih meng bang Penang tal mblang kapar haok Kuala Lumpur saong labik nao tal lac Sydney, Australia. Hu thau, pandap hu cap mek meng sa Kong ty pak Kulim, bang Kedah, min gah cảnh sát medil lac cty ini njauk kol pablei salih jru phil pambak tame./.