Malam kabroi, di tinh Dak Lak, Mentri Ilamo, Pahat Padhih saong Jirah rivang pambuak haong UB Bhap bini tinh Dak Lak peih pakak Raya Urang Jakar gilang tapuk dalam negar thun 2025 hu angan “Ragu ragam taneh ia”. Rah tabiak meng ini tal harei 30/5, Raya Urang Jakar gilang tapuk dalam negar thun ini hu labaih 1.000 urang lambaok vakil lac dom urang ngak bruk dalam gilang tapuk di 63 tinh, ban saong gilang tapuk bol lin pan phao karaong. Di raya peih pakak, gah padang peih ngak hu jao alin tapuk saong jien daong padang gilang tapuk di labik piah daong ka mikva bangsa takik di tinh Dak Lak saong dom gilang tapuk di tinh, ban. Taong abih yaom kaom tapuk daong lac 280 trieu dong.

Bi thu Tinh uy An Giang Le Hong Quang, Akok Mban tacei ba jalan peih ngak danak dak jalan peih drah samar  Châu Đốc - Cần Thơ - Sóc Trăng nao tapa labik tinh An Giang iew dom po thau patui veik brei ba ralo manuac ngak jeng yau mac jamaraih pambuak tani tanat haong karja bhum palei saong dom gah pambuak tal piah jhul pasamar bruk ngak. Peih ngak samar min brei khang kajap, ilamo ky thuat, patak pataom, siam mekre saong hacih sa-at, ngak salah danak dak dahlau harei 30/06/2026, tui tacei ba di Thu tuong Rajaei.

Thun 2025, kuhria taong abih kadung jien karja buh tabiak di tinh Soc Trang hu Trung uong jao jaik 8.960 ty dong. Tal ini, tinh hu rabha cambaih laih ngak hu jaik 99,5% jalan ngak hu jao. Min, tal abih bilan 4/2025, yaom kaom ngak bahrau mek hu 12% taong abih phun jien hu jao saong suai dut haong kuhria dahlau. Akaok UB Bhap bini tinh Soc Trang Trần Văn Lâu bahrau ini hu ngak bruk pasang iek, taong yaom tapak di dom danak dak saong pato tacei, pajrak dom labik pasang iek, gah dang ngak samar chip jang bruk padang ngak tui panuac pandar.

Thanh Ndoan Can Tho harei kabroi jak gauk tabiak ngak bruk Chien dich Dam dara halan hatian bilan he thun 2025. Hu 22 kapol  Ndoan di Ban saong labaih 700 urang ndoan dam dara naih gheih. Chien dich pataom tame 12 bruk praong, camereip brei ngak danak dak “ Daong prein ka bilan pakacah”. Piah ngak salah bruk nan, Ban Ndoan Can Tho tabiak 10 kapol nyaom hu mbaok di dom tinh, ban dalam bhum taneran kraong Cuu Long, Tây Nguyên saong 2 Kaoh pula Dam dara Thổ Chu saong Hòn Chuối, hu labaih 30.000 mbang dam dara, urang hoi, saih bac hu mbaok tame.

Daok di Thao Cam Vien, Ban raya Ho Chi Minh, di bingun harei Uranaih Dunya 1/6 hu peih pakak Raya “Uan Tet Doan Ngo, ma-in sambai Tet Uranaih” piah iek praong yaom kaom ilamo saong pachreih jalan sahaneng hadah krah ka uranaih. Hu labaih 50 kadai kuan pandap mbang menyum, pandap pak gak saong kadha me-in bhap bini, harei raya pamedeih veik dom labik hu thaik thaot ilamo bangsa meng kal biak siam mekre, labik uranaih meda hu mbaok tame ngak lan Bat Trang, ngak tapei racam, pak kataok ngak meng hala kreim, ngak tapang den mbau pahe.

Saudi Arabia duh ka tuai damuai mai bilan Haji 2025, sa dalam dom adat cambat agama praong abih di dunya, hu labaih 1 trieu tuai damuai nao haji hu mbaok di taneh ia ini. Adat nao rukun Haji thun ini kuhria peih ngak di bilan 6, tukvak  ngak adat  kayua Ủy ban Tui iek ia bulan di Saudi Arabia. Akok mentri Truyen thong Salaman Al Dosari khan lac, taneh ia ini hu peih ngak dom bruk paglong jalan sahaneng ka adat nao rukun Haji meng 50 panuac ndem karei di gauk. Labaih 10.000 hu peih Wifi di dom labik kakuh sampahyang piah pambuak dom urang nao Haji.

Mentri Jien padai Thai Lan bahrau ba tabiak jalan ngak pataom drap ar ky thuat so (dalam nan hu jien ma hoa) tame the bayar jien, brei kein lagaih piah ka tuai damuai langiu negar hu blei ndap nda di Thai Lan. Mentri Jien padai Thai Lan brei thau rilo negar di dalam dunya hu ngak jak jeng jalan langyah pataom jien ma hoa tame the gilang pariak. Tui nan, he thong brei ta-eng ngak dom thuat toan salih meng jien ma hoa tapa jien dalam negar. Urang pandar ngak dom bruk yaoyit pablei salih bhian pandar the bayar jien.

Gah meraong Trung Quoc meng harei ini tal harei 29 bilan 5 hu sa mbang hajan praong mbuan rah tabiak ia ribuk sua, glut jaleih taneh. Tui kuhria, dom tinh meng Qúy Châu tal Giang Nam saong ralo gah Meraong Trung Quoc hu hajan praong, hu labik hajan biak praong, gam hu hangin khang. Hadei mbang hajan praong nan, meng harei 31/5 tal harei 3/6, Trung Quoc meda hu hajan veik di ralo labik saong pambak praong tabiak gah barak negar./.