

Rajaei bahrau mbaoh tangin pasiam dom asal kadha di Danak dak jalan ngak pakat negar ka bruk patagok kinh te - xa hoi bhum mikva urang bangsa takik saong bhum ceik. Tui nan, dalam danak dak hu xa, palei bhum mikva urang bangsa takik saong bhum ceik; baoh sang rahra, urang menuac bangsa Kinh hu sang kathaot, jaik kathaot diuk rai di xa, palei biak kan kandah; gah ngak mbang pablei salih, hop tac xa, kapul pambuak hop tac xa, dom kapul kinh te ngak mbang di dom labik xa, palei biak kan kandah.
Tinh Vinh Long birau ngak brei salah danak dak ngak brei oh daok baoh sang taik tahak hu 1.328 baoh sang, kuhria abih tih jien buh tame labaih 86 ti dong. Bingun ini, Bi thu Tinh uy Vinh Long, ong Trần Tiến Dũng caong khin, abih pakat chinh tri di tinh Vinh Long kham merat duah bruk ngak, piah bhap bini hu jien mek tame rilo jang, jhul khang bruk iek glang prein yava, pato pakai, piah bhap bini hu mbang tui dom sarak siam gheih di Ndang saong Karja.
Bahrau ini, So Padang tinh Dong Nai hu mboh rilo bruk ngak suam hukum ka bruk pandar sang daok rahra di Ban Biên Hòa. Cambaih laih lac, yaok pluh bruk pandar oh njauk urang atau klak saoh dom baoh sang. Bruk ini brei mboh sarak anit ranam ka sang danaok daok njauk ngak karei, duah kein laba. UB Bhap bini tinh Dong Nai brei thau lac hu ngak catang bruk pasang iek, pilih ruah harak gar, urang blei, pah sang daok rahra piah pacang cakak dom bruk pambak tame dom bruk karei di sarak piah duah kein laba ka drei.
So Y te Ban raya HCM khan lac, meng kreh bilan 4 mbiah tal ini, dom urang ruak COVID-19 di Ban raya HCM daok hu mboh veik. Kuhria tal ini, hu 40 mbang COVID-19 hu taong ruak di dom sang iek ruak di Ban raya HCM. Kuhria meng harei 5 tal harei 11/5, hu 16 urang njom ruak birau. Yau nan min, Ban raya HCM urak ini oh ka mboh jit ruak COVID-19 dalam bhap bini. Dalam negar, meng akaok thun mbiah tal ini, Viet Nam hu 148 urang njom ruak COVID -19 di 27 tinh, ban.
Kong an ban sit Ma Lâm, huyen Hàm Thuận Bắc, tinh Binh Thuan hu duah mboh saong daong urang payua meluk paok jien labaih 100 trieu dong hu mek gilac tui njauk jalan hukum. Dahlau nan, di harei 9/4, amuk Trần Thị Dung daok di ban sit Buôn Hồ, tinh Dak Lak payua maluk paok jien labaih 100 trieu dong tame tai khoan hu angan Nguyễn Văn Năng. Tuk thau ka bruk payua meluk, amuk Dung hu nao pathau khan haong jabat kong an, hadei nan, Kong an ban sit Ma Lâm hu samar drah brei mboh saong pathau khan tal urang njauk payua meluk.
Campuchia saong My tamat blaoh bruk ginum biai akaok meti ka bruk tagok jien je di karja My. Tui urang Akok Jabat pablei salih di My pak Campuchia Casey Barnett, meyah oh plaik nyiak jien je 49% di karja My, Campuchia kan pablei ndap nda tapa darak pasar negar My saong labaih 100.000 urang ngak gaok kan kandah. My urak ini lac darak pasar bo Campuchia pablei kaya ndap tabiak ralo abih.
Dom labik gah Meraong negar Trung Quoc kuhria mboh dahlau hajan praong dui atah bahrau meng harei ini 17/5, dalam tuk gah Barak brei ciuk pandiak glaong, hu labik meda tagok tapa 40 do C dalam adit anak tal. Di dom tinh gah Meraong hu tagok tanut kakei dahlau ka hajan praong meng sambo bar cam tagok sambo bar bhong meraih, lac tanut kakei caga khang abih. Rilo labik karei jeng hu hajan biak praong. Dalam tuk nan rilo tinh gah Kreh negar jeng sa bhum hu langik pandiak glaong, labik bo pandiak glaong abih meda tagok tal atau tapa 40 do C.
Ralo njec tasik sargassum praong atah tal 5.500 dặm (8.800 km) daok theik ndong di tasik Dai Tay Duong, ngak jhal tal dom ar tasik di bang Florida (My) tal labik Caribbean. Tui dom urang ilamo, khoi tảo nan oh lac meta mong mboh huac bo daok ngak kan kandah tal he sinh thai tasik saong gah yulit. Oh lac ngak njom nerak, tảo daok ngak trun takik oxy dalam ia, mbuan ngak metai dom karang, hareik tasik jeng yau dom janih iakn hadang tapen tasik./.
Viết bình luận