Rajaei birau ba tabiak Sarak piah lang talaih dom tavak tavaiy hukum di danak dak praong pacang caga ia dauk 10.000 ti dong di TPHCM. Tui Sarak, dom bruk tavak tavaiy praong abih ka jalan bayar jien ka po buh jien tame ngak hu langyah meng bruk brei adat ka UBND TPHCM pandar kadung jien taneh piah bayar. Rajaei hu jao ka UBND TPHCM bruk ngak po saong taduan abih bruk ngak tui dom sarak di drei piah padang danak dak.

Hadei pagam tame, Cuc Yaok kuhria khan ka taong abih jien mek tame meng ndap nda ngak tabiak dalam tinh Ca Mau dalam 6 bilan  tagok 7,09%. Piah ngak hu bruk cakrok dalam thun 8% tagok, ye 6 bilan puac thun, Cà Mau ngak bahu tagok samar 8,8%. Yau nan ye, Bi thu Tinh uy Ca Mau caong khin karja palei dua pakat kham ngak catang oh brei klaik klaoh langyah harak gal hanh chinh ka bhap bini, doanh nghiep hu samar siam. 

Dom po buh jien tame padang ngak daok jhul pasamar bruk peih ngak danak dak tatua Rạch Miễu 2, tapa kraong Tiền, pambuak tinh Dong Thap haong Vinh Long ba tame pandar di bilan 9 anak tal. Yau nan min, dalam tuk ngak jalan tagok tatua nan di tinh Dong Thap daok gaok rilo kan kandah, ngak dauk ia, ia tame sang bhap bini, ngak khat lahik tral tal bruk ngak mbang pala drak, raidiuk mbang ngui di rilo bhap bini. Tui mikva daok labik ini lac, njauk brei buh brong tathuak  hajan tapen ia jalan meng pasiam hu bruk dauk ia. 

Anak dom bruk rah tabiak sraw kadau di ribuk ka 3, urang jakar ngak praong di TPHCM caong khin dom don vi pambuak tal brei samar peih ngak sumu gauk rilo jalan pacang caga bala meng langik tasik, oh brei bhap bini kurang ndap mbang, ia menyum tuk ribuk tame. Hangin khang gam hajan praong di harei 20 bilan 7 ngak par tabung 49 baoh sang, glut jaleih 1 baoh sang, 73 phun kayau jaleih, ngak khut tayak 2 sruh radaih o to saong 1 sruh radaih patuh. Urak ini, gah bol lin Ban raya HCM patui pambuak bruk gam haong bhap bini pasang iek kaya kan, ngak kajap ar binek ribong, dom labik binek mbuan talah, daong dom baoh sang gaok kan kandah.

Tha urang kumei daok di Lam Dong biak gheih dalam bruk bayar veik taong abih drap ar dalam nan hu ameh saong harak gal kuhria tui jien jaik 200 trieu dong ka urang ngak laih lahik. Tui nan, biar harei 19/7, tuk daok di sang, sa-ai Châu Thị Ngọc Lộc (umo 40 thun, daok di xã Phan Rí Cửa, tỉnh Lâm Đồng) duah mboh sa baoh balo jhuk var tapen sang drei. Peih tabiak, sa-ai Lộc mboh dalam nan hu rilo drap ar. Sa-ai ba balo nan bayar ka Kong an xã Phan Rí Cửa piah bayar ka jabat kong an duah urang ngak lahik bayar veik. 

Takik abih 19 urang metai saong labaih 70 urang njauk rambuac tuk kapal haok kalin di Bol lin kapal haok  Bangladesh dalam tuk pasram par ginuk tame sa sang bac di ban ine Dhaka biar harei 21/7. Rajaei Bangladesh peih ngak dom jalan piah daong taong abih dom urang gaok bala saong baoh sang di dom urang nan. Bala ini rah tabiak hadei sa bilan bala trak gah kapal haok di An Do, tuk sa kapal haok laik trun ky tuc xa sang bac y ngak 241 urang dalam ahaok saong 19 urang di mbaok taneh metai abih.

Bruk taong paoh gauk kayua bangsa agama di gah Meraong Syria ba tal labaih 1.260 urang metai, dahlau tuk padeih cuh birau ini. Dalam nan, rajaei Syria daok panduan ba yaok rituh baoh sang urang Bedouin daok gal tavak di Sweida, labik brei padeih patuh phao daok hu peih ngak. Dalam labaih sa adit tapa, bruk taong paoh gauk kayua bangsa agama catang di gah Meraong negar Syria meda taong tayak bruk salih rajaei Syria birau hu padang tagok.

Dalam dua harei tapa, dom labik di ban ine Moscow, Liên bang Nga dut kuhria mboh ia hajan sumu sa bilan. Rilo labik hajan tagok tal 91 mm, dalam tuk hajan dalam bilan lac 85 mm. Tui kuhria iek langik tasik mboh hajan praong saong hangin khang daok rah tabiak veik. Karja ban Moscow jak ba bol lin sang mac jam raih piah ngak brei tathuak ia, piah khik brei salamat jalan mbak saong raidiuk di rahra./.