Tui Mentri Bangsa saong Agama, birau hu veik tinh Ca Mau khan brei thau ngak salah blaoh danak dak abih baoh sang oh daok taik tahak. Yau nan, dalam negar  hu 19 dalam 34 bhum palei ngak hu salah blaoh danak dak abih baoh sang oh daok taik tahak ka klau njaom urang nan lac: Daong sang daok ka urang cach mang jaman mesruh metak dahlau diah; daong sang daok di dua Danak dak pakat negar saong daong  sang daok tui Danak dak abih baoh sang oh daok taik tahak. Patui bruk kham merat nan birau hu Thu tuong Rajaei ba tabiak lac ngak brei blaoh danak dak abih baoh sang oh daok taik tahak dalam negar dahlau harei 31 bilan 8 anak tal, aval jang 2 bilan dut saong bruk kuhria dahlau.

Harei kabroi, kapol urang ngak bruk di Mban Noi chinh Pakat negar hu alin brei 10 baoh sang anit ranam ka dom baoh sang liet si, thuong binh saong urang ngak bruk cach mang di tỉnh Vĩnh Long. Yaok baoh sang yaom 70 trieu dong. Di var alin brei baoh sang, ong Võ Văn Dũng, Pho akaok ban thuong truc Mban Noi chinh Pakat negar khan lac, bruk daong padang ngak sang anit ranam brei mboh bruk sangka kuhria daong di gah Noi chinh di Dang dalam tuk peih ngak dom sarak bayar dhar phol, daong tani tanat raidiuk piah dom baoh sang urang kham merat yam tapa dom kan kandah, patagok bruk ngak mbang.

Dom sang iek ruak di Ban raya HCM peih ngak sumu gauk rilo bruk ngak piah pahadar dhar phol dom baoh sang urang dalam sarak karja, urang ngak bruk cach mang. Sang iek ruak meta TPHCM pambuak haong UB bhap bini phuong Xuan Hoa peih ngak danak dak iek ruak camereip saong blaic raih  meta ( Phaco) oh mek jien ka dom urang lin, thuong binh ruak saong urang ngak bruk cach mang di Ban raya. Sang iek ruak Thủ Đức jeng hu padang kapol nyaom nao rivang, alin pandap ka 4 Amaik VNAH; gam haong nan peih var taom mbaok hadar dhar phol saong alin pandap tal urang ngak lac anek di baoh sang urang thuong binh, liet si…

Urang ngak nong pala amriak di tinh Dong Thap biak uan tabuan kayua pala amriak bilan akaok brei rilo baoh, pablei hu rilo jien. Yaom amriak meng 30.000 – 32.000 đồng sa kilo yau urak ini, urang ngak nong hu laba labaih 15.000 dong sa kilo. Oh lac pablei hu jien bo bilan ini piak hu rilo labaih 20 tan sa hecta, takik ruak kik. Dut saong dom thun dahlau, amriak thun ini di tinh Dong Thap biak mbuan lagaih, tuvak dui atah saong saong rilo urang caong blei. Phun amriak ba mai kein laba glong, kuhria rah tapa yaok bilan hu labaih 200 trieu dong sa hecta, yau nan ye mikva urang ngak nong pak ini biak uan tabuan, bui sambai.

UBND xã Khánh Bình, tỉnh Cà Mau, khan lac chap mek hu dua drei ikan baya gah langiu di palei Kinh Hội. Hadei tuk taduan panuac khan nan, urang jakar  samar peih ngak dom jalan duah saong chap mek. Xã Khánh Bình caong khin dom palei  brei pambuak haong gah chuc nang samar pasang iek dom baoh sang hu raong baya pak ini piah hu jalan tui iek tani tanat, plaik njiak dom bruk suak var ro tabiak gah langiu.

Dalam mbang ndem biai nao mai harei kabroi, Tong thong My Donad Trump caong khin Thai Lan saong Campuchia njauk gauk brei padeih cuh chip piah la-ar hatai bruk kandah gauk catang yau urak ini. Quyen Thủ tướng Thái Lan Phumtham caong khin Tong thong Donad Trump payua dom panuac nan tal Campuchia, Thái Lan tuk halei jeng caga kuhria piah ndem biai dua gah dak aval dak siam piah njauk gauk ka dom jalan ngak cambaic laic saong harak adat brei padeih cuh, pamong tal dom jalan ba sron mbon saong karo kajap. 

Trung Quoc daok dang anak mbang langik hajan praong di ralo labik gam ia ribuk sua trak, ngak jhak tal rilo bhum palei gah Barak saong Tay Nam negar ini. Pasak Kuria iek langik tasik pakat negar Trung Quoc brei panuac kakei pakat samo kanyik katam ka hajan praong di ralo labik. Tui kuhria mboh dahlau, hajan praong  daok rah tabiak veik di rilo tinh ban, dalam nan hu Nội Mông, Thiểm Tây, Sơn Tây, Hà Bắc, Bắc Kinh, Thiên Tân, Liêu Ninh, Vân Nam…Trung Quoc jeng kakei bhap bini rahra brei patui iek tani tanat langik tasik, takik nao mai di dom labik hu hajan praong.

Isarael harei kabroi khan lac brei bol lin padeih ngak bruk di klau labik hu ba tabiak di Gaza, hadei tuk peih ngak dom bruk piah piah “ngak ladam trun”bruk kandah kurang daong pahala di bhum taneh ini. Bol lin Israel jeng khan lac patui veik bruk daong dom gah ngak pahala gam dom bruk ba saong patuh phao mesruh daok rah tabiak pacang dom kapol nyaom kalin kan di Dải Gaza, piah khik pacang bhap bini Israel./.