Page ini, Thanh uy – HĐ Bhap bini – UB Bhap bini – Uy mban Mat tran Negar Viet Nam Ban raya Can Tho peih peih bruk mbaoh tangin brei angan poak meyaom di karja “Amaik Viet Nam anh hung”. Di var raya, gah lambaok So Noi vu ban raya Can Tho brei thau bruk mbaoh tangin di Chu tich ka bruk brei angan pok meyaom Amaik Viet Nam anh hung ngan haong 7 amaik, dalam nan hu: brei angan ka amaik Lâm Thị Chính saong alin ka dom amaik Lâm Thị Loi, Đỗ Thị Thơm, Trần Thị Sáu, Trần Thị Sửu, Nguyễn Thị Tốt, Lê Thị Tuyết. Ini lac dom amaik hu rilo bruk daong katmang, halan tian klak rup drei ka bruk peih paha taneh ia, padang saong pacang khik Negar.

Melam kabroi, labaih 1.000 urang ndoan, dam dara tinh Dong Thap hu mbaok truac pangdien, cuh gilau thau dhar phol dom Anh hung liet si jaik tal harei pahadar 78 thun Harei Thuong binh - Liet si (27/7) di Kubo liet si di tinh saong Kubo liet si bhum taphia negar Tam Nông. Dalam tuk gandi gandang, dom urang jakar pok bingu, kakuh saong cuh gilau di Labik Pahadar. Dom urang ngak praong saong urang dalam sang liet si mai cuh gilau di kubo, thau dhar phol praong glong di dom anh hung liet si var klak rup drei jaman mesruh metak peih paha bangsa saong yasa taneh ia.

Danak dak jalan peih samar Ban raya Ho Chi Minh - Mộc Bài hu taong abih phun jien jaik 20.000 ty dong bahrau hu mbaoh tangin danak dak banah hu makna abih hu yaom labaih 10.400 ty dong. Dom banah akaok meti di abih jalan hu kuhria brei ba tame padang dalam bilan 8 anak tal. Piag peih danak dak, bruk peih paha mbaok taneh lac banah praong hu taong abih labaih 6.550 ty dong di Ban raya Ho Chi Minh saong tinh Tay Ninh, dalam nan kuhria hu tal jaik 2.200 baoh sang rahra di Ban raya Ho Chi Minh hu labik daok dalam danak dak.

Dac khu Phu Quoc, tinh An Giang urak ini hu pabah tathik, tapen tathik biak praong, hu Tapen gilai kapal ka Tuai damuai dunya. Urang jakar tinh An Giang brei peih ngak rilo tapen tathik di kaoh pulao Phu Quoc piah ngak mbang suai lavik saong patagok gah kinh te hu makna praong di dac khu, jhul pakhang bruk pablei salih saong sirah rivang ma-in, abih di nyu lac bruk taduan raok kapal gilai praong negar langiu, peih tabiak jalan cak rok patagok bruk sirah ravang ma-in tasik pakat glong saong pambuak dunya; pambuak kaoh pulao saong taneh, pakhang bruk pajeng ba tui jalan tasik piah ngak brei cakrok patagok kinh te - xa hoi.

UB Bhap bini tinh Lam Dong bahrau hu harak gar payua ka Mentri Padang, Mentri Kong an likau buh jien tame ngak ndap nda kaya khik kajap salamat jalan mbak di jalan peih samar Vĩnh Hảo - Phan Thiết. Tui nan, tinh Lam Dong likau Mentri Padang maong iek piah buh jien tame padang jalan dang samar chip gam gam di jalan peih samar Vĩnh Hảo – Phan Thiết, atah labaih 100km. Urak ini, jalan peih drah samar ini oh ka hu jalan dang gam gam, tok caga dom labik dang samar chip atah gauk labaih 5km.

Urang dang akaok ASEAN thun 2025, Thủ tướng Malaysia Anwar Ibrahim khan lac huac kanda ka bruk mesruh metak rah tabiak di bhum taphia negar Thai Lan – Campuchia, tui nan hu panuac iek praong bruk salamat sron mbon “ jalan palih ruah” dalam tuk bruk cuang kandah gauk daok catang. Ong Anwar Ibrahim  khan lac hu iew phone meyai tapak haong Thủ tướng Campuchia Hun Manet gam Quyền Thủ tướng Thái Lan Phumtham Wechayachai, piah jhul pakhang bruk kham merat ndem biai haong gauk. Ong Anwar mboh lac Malaysia, lac Akok ASEAN thun 2025, meda jhul pakhang bruk pambuak ba siam.

Jitvu Internet ve tinh Starlink của SpaceX harei kabroi hu gaok kan kandah lac lahik mạng di rilo labik, ngak kan kandah tal yaok rituh ribau urang dalam dunya. Di nen tang X, Starlink pathau khan gaok kan knadah mạng saong brei thau daok samar chip peih ngak jalan langyah pasiam. Urang kaya meda Elon Musk, urang dang akaok SpaceX ndom lac, jitvu brei samar drah hu pasiam saong brei thau, dom bruk kan kandah mai meng halei brei hu langyah piah plaih rah tabiak veik.

Ribuk Cỏ May page ini tuh tame gah pei kaoh pulao Luzon, gah barak Philippines, ngak glut jaleih taneh saong ribuk ia sua, yaok ribau rahra brei panduan ba nao labik karei. Jabat gah kapal ahaok  pajeng rahra  Philippines khan lac labaih 70 mbang par dalam negar saong dunya brei padeih kayua ribuk. Dom tal bac di kaoh pulao Luzon daok padeih veik tal abih harei ini. Kuhria tal page ini, hajan praong gam gam ngak 19 urang metai saong 11 urang ahik di taneh ia kaoh pulao ini./.