Dalam tuk chreih chrai pahadar 80 thun Harei padang Bol lin Kong an bhap bini, page ini 19 bilan 8, Kong an TPHCM peih bruk meyaom 80 urang naih gheih di taong abih gah, vaktu 2020-2025. 80 urang hu meyaom harei ini lac yau dom baoh bingu chroh nerang mekre hu palih ruah meng jaik 500 urang naih gheih dalam taong abih bruk ngak di Kong an TPHCM dalam 5 thun tapa. Ini lac dom urang hu mbaok dalam bruk kham merat ba abih hatai ka bruk ngak, hadah krah di urang lin kong an.  

Nyaom roya Dang bo Phuong Hòa Thành, tỉnh Cà Mau mbang I, vaktu 2025-2030 birau peih ngak dalam praong prang hu mbaok di 110 urang lambaok vakil. Njauk ndem tal, nyaom roya peih ngak tui jalan “ oh hu harak ba-ar”, brei mboh bruk ngak tui jalan birau dalam salih pandar taka so di bhum palei pala. Oh padeih di bruk peih ngak nyaom roya, Phuong Hòa Thành daok ba kong nghe tame duh ka bhap bini. Phuong hu peih ngak mini app di Zalo piah bhap bini tui iek bruk tacei ba, sarak, payua panuac saong taduan panuac samar drah.

Harei ini di 34 tinh, ban dalam negar sumu gauk peih ngak, saong ba tame pandar 250 danak dak kuhria jien buh tame ngak 1trieu 280 ribau ti dong. Di tinh Dong Nai hu 8 danak hu padang ngak, ba tame pandar kuhria jien buh tame ngak labaih 50.000 ti dong. Dalam nan hu 3 danak dak jalan peih drah samar hu makna praong dalam di bhum Dong Nam Bo. Bruk buh jien tame ngak jalan mbak tatua, abih di nyu lac jalan nao mai dalam tinh Dong Nai piah dak harei dak ngak siam jalan pambuak tame mblang kapal haok Long Thanh, rik tame ngak brei cakrok patagok kinh te - xa hoi di tinh saong bhum Dong Nam Bo.

TPHCM daok peih bruk parang iek thaot binguk pahadar 80 thun Cach mang bilan 8 saong Harei negar CHXHCN Viet Nam. Parang iek thaot binguk ngan haong kadha “ Meng samar bebat doc lap, yasa taneh ia tal samar uak drei patagok di bangsa” di klau labik: jalan nao tabak Nguyễn Huệ, jalan Đồng Khởi( anak Sở Ilamo – Padhih the thao saong anak Mblang bein Chi Lăng). Peih ngak tal harei 5 bilan 9.

Mentri Ngak nong saong Moi truong kakei dahlau, ia ndik di Bhum taneran kraong Cuu Long meda tagok samar, glong jang ralo dut saong tukvak ini thun dahlau. Bruk ini kayua ia ndik tagok gam ia hajan saong ia tathik ndik. Bruk nan ngak kan kandah tal dom labik ngak padai He Thu di Bhum taneran kraong Cuu Long, abih di nyu lac di dom tinh Tay Ninh, Dong Thap saong An Giang. Yau nan ye dom bhum palei brei pasang iek, ngak kajap dom jalan pacang mbuan glut jaleih, kuhria caga dahlau dom jalan pacang khik ka phun pala, bruk ngak mbang pala drak hu salamat ka bhap bini.

Indonesia sanya peih ngak dom jalan cambaic laic piah cakak hu bruk njom nerak katak nhựa, yaom lac dom mbang nyaom biai ka Hiep uoc pacang hareik katak nhựa di dunya oh hu njauk gauk yau hatai caong khin. Bruk kham merat Rajaei Indonesia khik hu taong abih hareik harom di thun 2029, gam brei mboh Indonesia meda kham merat piah hu jeng taneh ia dang akaok di dunya dalam bruk pacang hu hareik katak nhựa.

Labaih meteh dom urang ngak di Han Quoc hu pandar tri tue nhan tao AI di labik drei ngak bruk, dalam nan 17% khan lac bhian pandar, dom urang pandar glong jaik dua mbang  dut saong My. Tui bruk roh duah ye AI daong tame ngak brei patak pataom hu 1tuk meteh dalam 40 tuk ngak bruk yaok adit, dalam tuk nan bac si saong luat su lac dom bruk ngak hu pandar AI ralo abih, hu tal 69%, hadei di nan tal dom urang khik iek saong urang ngak bruk di jabat hu 63%.

Apui khuah glai khang  di Tay Ban Nha saong rilo bhum taneh karei di chau Au kayua pandiak dui atah, ba tal takik abih 7 urang metai saong yaok pluh ribau urang panduan nao labik karei. Meng kaok thun tal ini, di chau Au hu labaih 6.200 km vuong taneh glai apui khuah mbang, dalam nan Tay Ban Nha lac labaih 1.500 km vuong, glong 3 mbang kuhria yaok thun. UB chau Au ba kapal haok mai padam apui saong mac jamraih daong padam pui  di dom labik apui mbang glai, hu rilo taneh ia mai daong./.