Dang akaok Nyaom biai mbang ka 25 di Mban Tacei ba pakat Negar pacang caga bruk taong chap kaya ikan suan hukum, oh khan brei thau tui hukum IUU, Thu tuong Phạm Minh Chính caong khin pataom tame padang harak pathau khan tui di EC, meyah khan oh ka jeng brei iek veik, hu labik cambaic laic, parabha cambaic laic. Brei thau dom bruk ngak suai atau drah, thei ngak, ngak yau halei, ba tabiak bruk ngak tal puac thun 2025 lac lang talaih pakat the kanjik IUU. Tui nan, Thu tuong khan brei thau ka bruk lang talaih  “pakat the kanjik” di EC bo bruk praong jang  lac patagok khang kajap di gah kaya tathik Viet Nam; khik iek bruk  ngak chap mek kaya ia tathik, brei thau hu meng halei mai, khik hu halau kaya ia, taong abih daong ka taneh ia, daong ka bangsa, daong kein lagaih ka bhap bini.  

Ban raya HCM langyah bruk paglong dua mbang jien mesre laba lap ka baoh sang kathaot. UBNDTP khan lac, bruk ramik pasiam sarak jien mesre dalam tuk jien mbang huak cai pandar di ban raya dak harei dak tagok, dalam tuk nan dom jien mesre  urak ini oh daok sumu haong raidiuk bhap bini, njauk ndem tal lac dom baoh sang kathaot, jaik kathaot saong baoh sang birau tapa truh kathaot. Bruk salih birau ralo tagok phun jien mesre tal 200 trieu dong sa baoh sang, dua mbang jien mesre laba lap yau urak ini lac 0,5% sa bilan.

Mbang ginum biai ka 7, Hoi bhap bini ban Can Tho mbang 10, vaktu meng thun 2021 -2026, ong Đồng Văn Thanh, Pho Bi thu Thường trực Thành ủy, Akok Hội đồng bhap bini ban Cần Thơ caong khin brei pasang iek, ramik veik dom urang jakar kong chuc di dom xa, phuong piah khik hu lagaih haong bruk ngak. Ba urang jakar nao ngak bruk salih gauk pak dom  xa, phuong tuk bruk njauk brei hu manuac, brei peih bruk palih ruah, pasram patra ilamo bruk ngak gah kong nghe khaw tin piah paglong ilamo ngak bruk ka urang jakar.

Piah pamong tal jalan patagok bruk raong aring di Ca Mau, UBND tỉnh Cà Mau tacei ba jalan ngak nong tui rilo jalan sumu gauk piah patagok gah Aring Ca Mau, yau: tanut chuan, paglong ndap ndam, raong tui tanut chuan, ngak pajaih siam; peih praong bruk raong  aring; parilo darak pasar saong pablei tabiak negar langiu tui sarak pambuak bruk; daong ilamu ky thuat, khoa hoc kong nghe saong khik iek alam moi truong; padang ngak saong khik angan “Aring Cà Mau”…Tỉnh Cà Mau hu labaih 364.000 ha danao raong aring, mek hu labaih 36.000 tấn sa thun, dang kaok dalam negar.

UBND tinh Khanh Hoa birau jao ka Kong an tinh pasang duah bruk peih karik  dom binek ia hadei hajan ribuk dui atah meng kreh bilan 11. Gah karja brei thau tuk vak peih tathuak ia njauk tukvak, njauk jalan hu mbaoh harak; ngak bruk njauk tukvak; lagaih  haong bruk rah tabiak di gah ala binek. Meyah urang halei, kapol njom jabat halei ngak oh njauk brei langyah. Bala ia dauk ngak khat lahik abih taih tal labaih  5.700 ti dong.

Tong thong My Donald Trump khan lac, Nga daok lagaih ginum biai dalam salamat saong Ucraina njauk brei ladam trun rilo bruk. Langiu  di nan, urang dang akaok Nha Trang khan lac, bruk mesruh metak di Ukraine lac bruk praong ngan haong chau Au saong dom taneh ia chau Au daok lang talaih dom bruk oh lagaih. Urak ini bruk birau abih ba ngak siam hu dom urang jakar payua tal Tong tong Ukraine tui nan sahaneng lac Ukraine brei kadun veik.

Sa pluh nen tang praong nan lac TikTok, YouTube, Instagram saong Facebook brei pacang cakak uranaih sit, meyah oh ngak yau nan meda taong phat tagok tal jaik 50 trieu dola Australia. Yau nan Australia lac taneh ia akaok meti di dunya brei pakauk uranaih umo ala 16 thun pandar mang xa hoi. Dalam panuac payua tal anek saih, Thu tuong Anthony Albanese iew da-a dom adei saih bac “tukvak padeih padei brei me-in padhih pasram rup pabhap, bac alat ragam, iek tapuk saong caik tukvak ma-in haong urang dalam sang, ayut sahabat”.

Kadung  jien Uranaih LHQ (UNICEF) khan lac, yaok ribau uranaih di Gaza brei tame sang iek ruak kayua lavang lavaih kuhria meng tuk padeih cuh phao di bilan 10, caong khin peih tabiak jalan daong ngak pahala praong ralo. Tui UNICEF, jien daong hu ba tame Gaza dut saong bruk ginum biai di harei 10/10, min rilo bruk daok kandah, dalam bruk ndap nda dang veik suai atau atah klak dom labik nao tapa, kareik jalan saong bruk khik salamat. Urak ini, bruk iek lipa daok ngak jhak tal labaih 500 ribau urang sumu 1/4 bhap bini Gaza./.