Meng thun 2026, Dai hoc Pakat negar TPHCM njauk hatai peih ngak tui jalan palih ruah tich hop, dalam nan taong yaom prein rik daong di bruk praong. Jalan tich hop tui klauk nyaom bruk nan lac pakacah THPT, Taong yaom prein bac saong saong tapa dom thun bac THPT. Bruk pambuak dom tanut chuan hu kuhria iek tui du lieu dalam klau thun bac jaik abih. Langiu di nan brei palih ruah meneing tui tame tapak tui asar kadha di Mentri Pato megru.

Tinh Cà Mau mboh lac, Danak dak “ Yaok xã sa pandap - OCOP” lac jalan peih ngak hu makna praong. Piah paglong dom siam lagaih di dom kaya bhum palei, dalam nan aring tathik lac sa dalam dom kaya  praong pataom tame patagok khang kajap abih dalam kaya ia. Mbiah tal ini, Ca Mau hu labaih 10 kaya OCOP meng aring tathik, 3 patuk, 4 patuk pakat tinh.

Jaik ini, rilo jalan mbak nao mai dalam tinh Dong Thap khut tayak bka trak ba tal rah bala jalan mbak, rilo jalan ia kraong glut jaleih di dua ar. UBND tinh Dong Thap brei sarak buh tabiak 242 ti dong piah ngak pasiam veik dom jalan mbak khut tayak. Bhap bini pak ini  caong khin dom jabat chuc nang samar peih ngak pasiam veik dom jalan khut tayakk trak piah duh ka bruk nao mai jeng pajeng ba ndap nda tuk Tet thun birau 2026.

Kadung jien bac Vừ A Dính – Kalup kapol “Daong ka Hoàng sa – Trường sa anit ranam” birau peih bruk alin paok jien bac ka 135 anek saih lac urang bangsa takik, anek saih bhum kaoh pulao kan kandah saong anek kamuan di Bol lin Bien phong di ban Can Tho yam tapa kan kandah, bac da-a naih joi. Danak danak alin jien bac jeng bruk ngak yaok thun, rik tame klak rabha kan kandah, pabak prein khang saong pambak praong bruk takre bac da-a tal rilo urang karei.

Mban peih bruk pakacah cih vak kadha ka bruk ngak saong palei ngak meng kan di TPHCM thun 2025 hu alin brei yai ka dom urang cuh vak kadha gheih, yiah khan ilamo meng kan, sajarah dak rai di labik ini. Mbang pakacah pachreih hu labaih 150 kadha di dom urang cih vak mai meng TPHCM saong dom tinh, ban dalam negar. Mbang pakacah meyaom, yaih khan, pambak praong kaya jeng yau roh duah, khik ramik saong patagok dom palei ngak, bruk ngak meng kan di TPHCM. 

Anak bruk mesruh kalin kan di labik taphia negar Thai Lan saong Campuchia, Mentri Ngoai giao kakei bhap bini Viet Nam daok jaik labik taphia negar Thai Lan -  Campuchia brei tabiak ytruh dahlau kalin kan rah tabiak nao labik hu salamat, khik ka manuac saong drap ar hu salamat. Juai nao mai atau nao tapa dom labik daok rah tabiak  kalin kan di jaik tapen negar Thái Lan - Campuchia. Tui iek bruk rah tabiak yau khaw tin kakei dahlau di Mentri Ngoại giao, bhian pambuak haong dom Jabat  lambaok Viet Nam di Thái Lan saong Campuchia.

Mentri An ninh negar Mỹ mbaoh harak jaik 140 trieu USD piah blei 6 sruh kapal ahaok Boeing 737 piah pajeng dom urang negar karei nao sang. Kuhria meng tuk tagok rai tal puac bilan 10, karja Tong tong Trump peih ngak hu labaih 1.700 mbang ahaok pajeng urang nao tal 77 taneh ia. Dalam tuk nan, dom urang jaik ini mboh dom urang tame negar oh hagait jhak biak ralo urang daok dom labik dalam negar My.

 Gah y te di Anh kakei dahlau dom sang iek ruak di taneh ia ini dang anak “ bruk biak jhak” hu rilo urang ruak kum, tuk dom urang nan tame sang iek ruak kum tagok tal 55% dalam sa adit. Dom urang jakar y te kakei bhap bini brei cuk pataik pacang idung pabah tuk  tabiak jalan labik hu rilo manuac, tame dom sang iek ruak. Dak harei dak hu rilo manuac brei tame dut iek caga ruak kum tuk rilo mbang ruak kum rah tabiak dalam negar./.