Viet Nam hu labaih 900.000 urang ngak bruk di negar langiu tui dom jalan karei di gauk. Ta-eng dalam 3 thun jiak ini kuhria rah tapa yaok thun hu labaih 150.000 urang ngak bruk di negar langiu. Cuc khik iek urang ngak negar langiu, Mentri Noi vu daok pagam ung dung ngak di negar langiu. Kuhria mbiah tal ini, hu 27.000 mbang urang ngak saong doanh nghiep, dalam nan hu labaih 400 mbang tuk angan ngak bruk. Tuk urang ngak salah tui harak pambuak bruk di Nhat Ban gilac veik mai, ung dung hu daong duah bruk ngak dalam negar.

Bao hiem xa hoi Viet Nam peih ngak danak dak alin the BHYT ka urang raidiuk kan kandah. Di tinh Gia Lai, hu 2.000 the BHYT alin ka uranhg kathaot, jaik kathaot, urang birau tabiak truh kathaot saong dom baoh sang gaok kan kandah kayua ribuk ia sua, kuhria tui jien daong labaih 1,2 ti dong. Ta-eng xã Phù Mỹ Bắc, hu 110 the BYHT hu jao brei hu alin tal tangin milkva, gam daong 50 trieu dong jien mbaok piah rilk daong tamik pasiam kan kandah ka dom baoh sang. 

Tukvak tapa tinh Dong Thap hu buh tabiak padang ngak rilo brong ba ia pacang ia mbak, khik ia taba, pacag ia ndik. Urak ini, dom danak dak nan brei ngak siam, daong bhap bini caga hu siam bala kayua langik tathik oh lagaih. Yau ye brong ba ia ribong Nguyễn Tất Thành padang ngak abih labaih 518 ti dong piah padang ia taba ngak mbang pala drak ka yaok pluh ribau baoh sang di tinh Dong Thap saong Tay Ninh.

Dalam thun ini tinh An Giang rah tabiak 106 mbang glut jaleih, talah ar kraong ribaong ngak khat lahik 12 ti dong. Bruk glut jaleih ngak jhak tal 72 baoh sang brei panduan ba nao labik karei, dalam nan, 9 baoh sang  glut abih saong 13 baoh sang jaleih meteh ar kraong, ribaong bariat.  Piah caga, pasiam dom khut khat, gah ngak nong  hu tacei pato UBND tinh An Giang ba tabaik bruk Mentri Ngak nong saong Alam dunya  buh jien tame ngak ar pacang glut jaleih dom ribaong, bariat di dom labik mbuan rah tabiak bala, samar dalam tinh.

Urak ini, ban Can Tho hu labaih 80 rija roya meng kan, dalam nan hu labaih 20 roja roya meng kan bhian peih ngak yaok thun pachreih hu rilo tuai damuai. Mong tapa, rija roya peih ngak di dom inem krung dak rai sajarah - ilamo, abih di nyu lac dom rija roya hu karja pak ini peih ngak piah ka bhap bini khik ramik, patagok ilamo meng kan di bhap bini, tapa nan cak veik dalam hatai urang dom ilamo siam gheih, the thao saong yulit jeng anek manuac Can Tho.

Thuong vien Mexico brei khan tap hukum paglong jien je ngan haong kaya kan di negar An Do tagok tal 50%, piah khik dom gah kong nghiep dalam negar. Langiu di nan, Trung Quoc, Hàn Quốc, Thái Lan saong Indonesia jeng daok dalam sarak kak jien je birau. Tui hukum, jalan pacang caga bruk pablei salih di Mexico hu ba tame pandar meng harei 1/1/2026 saong kak jien je ngan hoang dom janih yau ye radaih o to, ndap nda ngak radaih o to, jhik menyim, khan ao nhua katak saong thép.

Canh sat Han Quoc birau chap mek 4 urang tavak dom video di urang karei oh likau adat, blaoh ramik veik dom asar kadha piah pablei di angaok mang. Dom urang  tavak video hadei tuk tame 120.000 camera an ninh meng dom baoh sang  saong doanh nghiep di taneh ia ini. Dom urang nan khan lac bruk ngak suan hukum pacang caga, pablei salih harak tai lieu kanjiak. Ini lac bruk birau abih dalam dom mbang tame camera hu pambuak internet bo dom baoh sang bhian pagam piah pasang iek uranaih saong athur raong dalam sang.

Akok Hoi dong saong dom urang lambaok Nghi vien chau Au ginum biai piah ngak patrun hu 90% athak nerak sang camin di thun 2040. Tui ginum biai, meng thun 2036, EU brei adat pandar tin chi carbon dunya asar siam  piah daong ka bruk patrun nyaom nerak. Ginum biai pamong tal bruk atah klak carbon suai lavik tapa jalan Meyao meyit EU. Ini lac bruk hu makna praong, piah pamong tal bruk suai lavik di EU yawa langik hu hacih di thun 2050./.