Di Mbang nyaom ka 6, HĐND TPHCM mbang X, vaktu meng 2021-2026 daok rah tabiak, ong Nguyễn Văn Được - Akok UBND TP.HCM brei thau, Ban raya palih ruak kadha thun 2026 lac “ Peih ngak sarak, peih brei phun jien, patagok ha tang, paglong bruk ngak saong ngak brei cakrok patagok di ban raya hadei pagam tinh, ban”. Karja ban raya  ba tabiak 5 nyaom hu 26 tanut tui rilo gah kinh te, ilamo, xa hoi, patagok lam moi truong, salih birau harak gal, quoc phong - an ninh. Sa dalam dom jalan ngak hu makna praong di Ban raya HCM lac bruk ramik veik gah kinh te pandar taka so, ilamo kong  nghe, salih birau hadah hadei.

Hoi dong bhap bini tinh Dong Nai mbang X khan tapa Sarak praong, nan lac sarak daong ba urang jakar, panduan salih, ba urang jakar mai ngak bruk. Tui rilo urang jakar ngak bruk atah sang, hu panduan salih, ba urang jakar hu daong jien pah sang, jien mbang huak, jien radaih trun tagok…urang jakar atah sang 150 km meda hu veik 10 trieu dong yaok bilan. Dom sarak daong sang daok, jien radaih nao mai, daong ka urang kajar  sahanang hatai  ngak bruk, tani tanat raidiuk, patagok bruk khik iek di karja.

Hadei 10 harei peih ngak “Danak dak Quang Trung”, tinh Gia Lai padang ngak hu salah 70% kuhria abih tih 674 baoh sang glut jaleih abih, tui nan jhul pakhang bruk ramik pasiam dom baoh sang khut tayak. Jien daong ka urang saong jaleih, ba theik  lac 60 trieu dong sa baoh sang. Njauk caik hatai, tinh Gia Lai oh likau daong jien meng Karja negar bo brei kuhria caga ta-eng tapa sarak daong saong jien bhap bini daong tame. Dom don vi bol lin daong yah sang, ngak sumu taneh, padang gai, ramik pasiam sang danaok di dom bhum palei khut tayak trak, tui nan brei hu labik daok ka bhap bini di anak meta dalam doanh trai. 

Kadung jien bac Vừ A Dính saong Kalup kapol “ Daong ka Hoàng Sa – Trường Sa anit ranam” alin brei 185 paok jien bac kuhria taong abih tih yaom 185 trieu dong ka anek saih tinh Vĩnh Long. Dom paok jien bac oh lac hu jien bo daok pabak prein merat bac di dom adei tui hatai caong takre. Meng thun 2010 mbiah tal ini, hu labaih 1.700 anek saih  di Vĩnh Long ( dalam nan hu Trà Vinh saong Bến Tre dahlau diah) saong taduan hu jien bac,  kuhria abih tih jien labaih 1,7 ti dong; ralo lac urang bangsa Khmer saong bhap bini dom xa tapen tathik.

Nyaom darak pasar OCOP bhum taphia negar Viet Nam - Campuchia daok peih ngak di Tịnh Biên, tỉnh An Giang. Nyaom darak pasar lac bruk pambuak ngak mbang  di dom gah, dom bhum palei dalam negar, pambuak bruk ngak saong daong piah patagok, rik tame paglong prein ngak mbang pablei salih saong bruk meriak gauk dalam samar yam tame ngak mbang haong dunya. Ini lac bruk lagaih  di dom doanh nghiep Viet Nam saong doanh nghiep Campuchia hu taom gaok, bac megru, pambuak bruk pablei salih, peih praong darak pasar, pakhang bruk pachreih urang blei pandar.

Dahlau tuk mesruh metak kan kandah, bhap bini dunya gam gam iew Thai Lan - Campuchia cadu trun saong pambuak bruk ndem meyai plaik njiak bruk  panjiak hatai.  Adat panduan ba rahra hu Thái Lan saong Campuchia ban tabiak dalam tuk mesruh metak tapa harei ka 3. Campuchia brei ba mai veik negar dom kapol nyaom urang pakacah Nyaom roya The thao Dong Nam A (SEA Games) mbang ka 33 daok rah tabiak di Thái Lan. Dalam tuk nan, Thái Lan atah klaak bruk taneh ia karei tame ngak bruk langyah ba siam haong Campuchia.

Tui ilamo meng kan, le jao yai Nobel 2025 dalam dom gah Y sinh, Vật lý, Hóa học, Văn học saong Kinh tế hu peih ngak praong prang di ban ine Stockholm, Thụy Điển harei 10/12. Po di dom yai Nobel dalam dom gah hu jao brei harak chung nhan, huy chung gam alin jien. Nobel lac dom yai meyaom hu jao brei  ka dom urang saong kapol nyaom ngak hu bruk jak jeng siam mekre hu kein laba ka dunya manuac sia. Ta-eng harei alin yai Nobel Hòa bình peih ngak di Oslo, Na Uy.

Tui yaok kuhria birau ini, hu takik abih lac 22 urang metai dalam mbang glut jaleih dua baoh sang glong rilo tal di Maroc. Sa baoh sang oh hu thei daok, baoh sang ka dua hu biak ralo manuac daok ngak adat  Aqiqah- lac sa adat hukum di urang Islam. Dom urang khan lac dom baoh sang nan hu ra-ai talah meng dahlau min oh pasiam atau brei thau caga dahlau. Njauk caik hatai, dua bilan dahlau hu urang jak gauk trun jalan pandiak hatai ka bruk takik kuhria daong bhap bini diuk rai rambah rambeik saong sang daok khut tayak./.