Patui veik mbang  nyaom Quoc hoi, dalam harei ini, bruk hu rilo urang Quoc hoi caok hatai sangka lac dom jalan langyah piah pacang caga tham nhung hu siam lagaih jang dalam tukvak anak tal. Dom urang jakar mboh lac, thun 2025, bruk pacang caga tham nhũng ngak hu siam. Bruk duah mboh saong langyah tham nhung, tapa pasang iek duah thau, kuhria iek jien padai hu ngak pasiam. Rilo bruk tham nhũng praong, ngak khat lahik trak daok hu langyah; ngak suan, di rilo urang jakar, kong chuc, ngak brei cambaic laic. Bruk chap mek veik drap ar tham nhũng dalam vaktu pasang iek hu lagaih.

Tui harak pathau khan di Cục Lam nghiep - Khik iek glai, dalam 5 thun tapa, 21 tỉnh, ban raya tapen tathik dalam negar hu peih bruk khik iek siam labaih 281.000 ha glai. Kuhria taong abih tih taneh pala glai birau tapen tathik dalam negar hu labaih 11.600 ha, dalam nan hu labaih 7.700 ha glai ia mbak saong labaih 4.100 ha glai pacang hangin, pacang cuah. Dalam nan, tinh Ca Mau hu taneh glai tapen tathik praong abih hu labaih 57.000 ha. Yaom lac kham merat khik siam glai min bruk glut jaleih ar tathik  daok rah tabiak kan thau dahlau, kuhria rah tapa yaok thun Ca Mau lahik labaih 300 ha glai tapen tathik.

Uan raok thun birau 2026 di TPHCM meda hu rilo bruk ngak biak chreih chrai. Dalam nan siam abih lac danak dak cuh phao bingu pakat glong di klau labik. TPHCM hu peih Danak dak uan raok thun birau di melam 31/12/2025 di jalan raya Nguyễn Huệ. Gam haong dom bruk rah tabiak di dom phuong, xa; dom sang bac dai hoc, cao dang; dom labik che xuat, KCN…Bingun ini, rilo bruk pakacah padhih the thao hu peih ngak yau ye Giải Marathon TP.HCM mbang XII; Yai Viet dã salam uan thun birau 2026; Pakacah ndik ceik Dinh…

Thun 2025, gah rivang yulit tinh An Giang uan raok labaih 24 trieu tuai damuai, jien mek tame kuhria taong abih cih hu jaik 68.000 ti dong; khan brei thau ka gah kinh te praong di bruk ngak mbang, raidiuk manuac sia dalam tinh. Bruk duh ka tuai damuai dak harei  dak sahanang, gam haong bruk paglong jalan sahaneng ka yulit dalam bhap bini.  Ong Lê Văn Phước, Pho akaok UBND tỉnh An Giang mboh lac tukvak tapa gaok rilo kan kandah min gah yulit kham merat ngak siam piah ba gah yulit dak harei dak cakrok patagok.  

Kong an xa Phong Mỹ, tỉnh Đồng Tháp daok ngak salah harak ho so lanyah 3 urang taong chap kaya ikan suan hukum, mbuan ngak khat lahik kaya dalam ia, ngak palai dom janih di alam dunya. Tukvak tapa, di tinh Dong Thap hu rilo bhap bini pandar ndien piah taong mek ikan tuk melam; dalam nan hu oh lac takik mek ikan pablei. Bruk ini oh lac suan hukum bo daok ngak jhak tal prein yawa urang pandar ndap nda nan.

Kuhria tal biar harei 8/12, labaih 8.000 baoh sang urang Campuchia di bhum taneh jiak negar Thai Lan hu panduan ba  nao labik karei salamat. Bruk ba tal labik tapen negar nan dak harei dak cuang kandah meng harei 7 bilan 12, bhap bini jaik taphia negar duah labik daok kandauk. Mbiah tal ini, kuhria abih tih hu 377 sang bac jaik taphia negar Campuchia-Thái Lan kareik pabah mbang ngak kan kandah tal jaik 3.200 gru pato  saong 78.580 anek saih.

Bhum taneh Kashmir kayua Ấn Độ khik iek daok dauk dalam ia kakuan sup kalup, yawa langik oh siam. Ini lac bruk dak harei dak bhian rah tabiak di labik ini dalam dom thun jaik ini, njauk ndem tal bilan la-ar tuk langik biak la-ar. Tui dom urang ilamo, langik la-ar gam hangin yuh saong rilo radaih kayua bilan nao ma-in yulit ba tal yawa langik di Kashmir tagok biak huac.

Sa mbang tayun megei baoh taneh khang 7,6 di tathik gah Barak negar Nhat Ban di biar harei 8/12. Hadei tuk megei baoh taneh rah tabiak, Rajaei Nhat Ban kakei ka bruk riyak song than di rilo bhum palei; kakei bhap bini samar  tabiak truh dom ar tathik  piah hu salamat. Piah pacang caga bruk tayun megei baoh taneh, Mentri Quoc phong Nhat Ban  jeng hu pandar rilo kapal ahaok  piah duah thau khaw tin. Jabat Khik iek Hat nhan Nhat Ban khan lac oh ka bruk hagait karei rah tabiak di sang mac dien hat nhan Tomari di Hokkaido./.