Ngan haong jaik 500.000 harei ngak bruk saong jien labaih 350 ty dong hu jak ba, kapul ndoan saong dam dara dalam negar hu daong padang bahrau, pasiam 14.640 baoh sang, truh tapa rilo jalan kuhria dahlau lac 5.000 baoh sang dalam danak dak thun ini. Meng dom baoh sang praong laneing lanoi saong anit ranam ini, daok brei kein lagaih piah ka rilo baoh sang kan kandah uak drei tagok padang raidiuk trei sir, haniem phol. Piah ngak hu dom jak jeng siam gheih ini, T.Ư Ndoan hu pato tacei dom tinh, ban Ndoan peih bruk pasang iek, tut angan baoh sang njauk daong saong padang tabiak jalan ngak tantu cambaih laih, njauk haong bruk daok rah tabiak dalam bhum palei.

Harei 23 bilan 8 anak tal, Mblang kapal ahaok Long Thành hu peih ngak harei bruk ngak, palih ruah tame hu labaih 3.000 bruk ngak. Rilo labik oh cang ilamo ngak bruk, hu pato pasram bruk ngak dahlau, dalam nan hu ky thuat, drap ar, langyah bruk ndap nda, harak gal, ramik hacih, kaya mbang angaok ahaok, pablei kaya alin …Tui ong Vũ Thế Phiệt, Akok Hội đồng quản trị Tong kong ty Mblang kapal ahaok, don vi brei palih ruah bhap bini Dong Nai, njauk ndem tal dom baoh sang hu kaoh taneh brei ngak danak dak mblang kapal ahaok.

Sa bruk pato pakai peih radaih oto pagam tri tue nhan tao (AI), ngak yau biak, ilamo kong nghe mo phong saong du lieu praong bahrau hu yaih khan di Ban raya Ho Chi Minh caong takre, meng bruk ini, Ban raya Ho Chi Minh brei patui veik ngak dom bruk salih lek taka so saong pandar AI njauk pakat dunya, daong paglaong ialmo dom urang peih nduac radaih saong khik kajap bruk karo salamat jalan mbak.

Tinh Dong Nai daok dang anak bruk jit ta pabui chau Phi rah tabiak sraw kadau tuk hu 24 kabik hu jit ruak di 20 xã, ba nao am cuh klak labaih 4.000 drei pabui.  Njauk ndem tal, dom drei pabui ba am cuh klak tagok tal labaih 7 mbang dut saong tukvak ini thun dahlau. Bruk kan kadhah lac vaccine pacang jit ruak abui chau Phi yaom lac hu bloh min oh hu angan dalam jru brei klauk caga. Rilo urang raong glang daok huac kanda, oh ka jia tame vaccine pacang hu ruak, ba tal bruk klauk jru daok takik.

Rilo ralo pabui daok dalam Danak dak tani tanat darak pasar di Ban raya Ho Chi Minh hu patrun yaom meng 1.000-10.000 dong/kg. Bruk pasiam yaom pablei hu pandar ka dom ndap nda ralo pabui daok dalam darak pasar thun 2025 saong Tet thun Asaih Wao 2026. Yaom patrun ini samu haong 1-7% dut haong yaom tani tanat daok brei ngak. Urak ini, ralo pabui di darak bhap bini jeng trun yaom labaih 5.000 dong/ky, yaok janih.

Tong thong My Donald Trump khan ka dom bruk ginum biai pakat glong jaik peih tabiak haong Tong thong Nga Vladimir Putin, dalam nan ong saheneng lac oh brei urang ngak drei sahaneng karei tapa mbang taom gaok ini, tui nan brei mboh  Ukraine hu mbaik tame ginum biai ka harei anak tal di Kiev. Tong thong My sahaneng lac mbang taom gaok ini hu siam 75%, makna di nyu ba siam sron mbon ka bruk mesruh metak di Ukraine dalam samar anak tal. 

Hadei sa pluh thun rahra hu patakik gam gam, urak ini dom urang ngak bruk negar langiu hu tagok labaih pak mbang di 7 tinh di Japon. Urang ngak bruk negar langiu hu taong yaom lac urak ini hu makna dalam rilo gah di chuoi pabak urang ngak, meng ngak tabiak ndap nda tal bruk pajeng ba, pablei salih sit saong sangka tuai pandar di Japon. Rajaei Japon tagok jalan kuhria taduan 820.000 urang ngak bruk negar langiu hu ilamo glaong piah langyah hu bruk kurang urang ngak bruk kayua menuac taha rilo saong bruk ndih tapui menek takik.

Tui Vien Tội phạm học di Australia, dalam sa thun tapa hu tal 47% dom urang pandar internet di negar ini lac urang gaok kol jhak pachot. Dom bruk kol duis ngak biak rilo jalan taong tame dom ma doc, blaik saleik, pachot pagat atau dom bruk pambuak tal tavak klaik angan je atau ja angen je urang. Dalam nan, pambak tame saong ngak sraw kadau kol duis angaok mang mboh ralo abih. Tui nan, 25% dom urang khan lac du lieu di drei njauk urang karei tame.