Tui bruk kuhria dahlau, harei 19.8, danak dak peih drah samar Dầu Giây - Tân Phú, jalan peih drah samar Gia Nghĩa - Chơn Thành (di Bình Phước dahlau diah, urak ini lac tỉnh Đồng Nai) saong peih praong jalan drah samar TP.HCM - Long Thành hu padang ngak. Dalam nan, Danak dak peih praong jalan drah samar  TPHCM - Long Thành kuhria ngak salah di thun 2026, daong trun takik bruk radaih gal jalan, abih di nyu lac tuk mblang kapal ahaok Long Thanh ba tame ngak bruk. Ini lac dom danak dak hu makna praong bo Dong Nai palih ruah padang ngak, blaoh ba tame pandar tuk pahadar 80 thun Harei negar harei 2 bilan 9 di tỉnh.

Tatua Rạch Miễu 2, pambuak 2 tỉnh Đồng Tháp saong Vĩnh Long hu ngak salah blaoh ba tame pandar di harei paguh hadei labaih 3 thun padang ngak, blaoh dahlau 5 bilan dut saong bruk ba tabiak tuk camereip. Kuhria jien buh tame jaik 6.810 ti dong, danak dak tatua  Rạch Miễu 2 hu padang ngak oh lac langyah bruk radaih gal jalan samar bo daok lac gai radak kandeik khang, jhul khang bruk patagok kinh te, yulit saong paglong raidiuk ka bhap bini di bhum taneh ini.

Tui khaw tin meng Hoi Chu thap do Viet Nam, kuhria tal mon 18 tuk, harei 17 bilan 8, danak dak jak ba urang rik jien daong bhap bini Cuba ngan haong kadha “ 65 thun anit ranam Viet Nam - Cuba” hu labaih 310 ti dong gam haong labaih 1 trieu 580 ribau mbang urang pachreih tui. Jien nan ralo jang jien kuhria dahlau lac 65 ti dong luac tukvak jak ba bhap bini, mek hu 400% hadei 5 harei peih ngak. Harei  2/12/1960 brei mboh bruk ngak dalam sajarah dakrai di Cuba pambuak talei rohim haong Viet Nam. Dalam 65 thun, dua bangsa tuk halei daong ka gauk, klak rabha dom gheih ghang anit ranam, ba gauk merat khik caga bebat doc lap saong daong gauk dak padang, khik caga Taneh ia XHCN.

TPHCM kuhria padang 4 labik palei salih tui hatai caong khin nan lac: Labik Cần Giờ, labik Cái Mép Hạ gam tapen tasik (di Bà Rịa - Vũng Tàu klak), labik Bình An, labik Bàu Bàng. Dom labik pablei salih rik tame jhul pakhang bruk ngak mbang kinh te saong paglong labik dang di ban raya dalam bruk ngak mbang pablei salih di dunya. So Kong thuong TPHCM likau Rajaei padang sarak daong tui jalan peih, sami samar, rilo pabak prein khang pachreih urang buh jien tame ngak mbang sang kein laba dalam bruk ngak mbang pablei salih.

Tabung glong bruk pacang taong chap ikan suan hukum, oh khan brei thau saong oh tui hukum (IUU), pamong tal bruk lang talaih pakat “the kanyik katam” di UB chau Au (EC) di Cần Thơ peih ngak tal bilan 9. Yau nan ye, harei ini Mban tacei ba Bol lin Bien phong Can Tho peih ngak catang bruk pacang taong chap kaya kan suan hukum. Dalam nan, dom don vi pambuak bruk  haong dom gah, karja bhum palei pacang cakak abih dom gilai taong chap ikan suan hukum IUU, njauk ndem tal lac yam tapa labik di urang taong chap kaya ikan suan hukum di bhum tasik negar langiu.

Tong thong Hàn Quốc Lee Jae Myung iew brei peih ngak dom bruk ginum biai pambuak Trieu Tien yau urak ini. Tong thong Han Quoc khan lac, salamat daok dalam bruk khik brei salamat sron mbon. Bruk Han Quoc urak ini lac khang hatai tui ngak dom bruk piah trun bruk kandah mesruh metak dalam tuk khik hu kajap bruk pacang caga. Yau nan ye, Tong thong eiw dom mentri ramik caga bruk ngak tui tukvak ginum biai pamuak Trieu Tien hu ngak blaoh.

Meng harei 1 bilan 10 anak tal, Thái Lan daok pablei harak ve 10 Bath sumu labaih 0,62 USD ka taong abih dom radaih dien. Rajaei Thai Lan mbaoh harak brei buh jien jaik 8 ti Baht, sumu 250 trieu USD, piah daong yaom harak ve dalam thun akaok meti. Bruk nan lac meneing dalam dom bruk ngak di rajaei Thai Lan piah trun jien cai pandar di bhap bini, dalam nan cakak trun jien ndik radaih jeng yau nang luong.

Jabat ngak drah samar  Nigeria khan lac, sa sruh gilai pajeng 50 urang tableih di bang Sokoto, gah barak taneh ia ini ba tal labaih 40 urang lahik. Klau adit dahlau, sa bala rah tabiak di jalan kraong ia  dreih yau nan di bhum kreh negar taneh ia ini ngak takik abih 13 metai saong yaok pluh urang lahik tuk sa sruh gilai pajeng labaih 100 urang tableih trun ia.