Page ini (16/8), Tinh uy Ca Mau peih danak dak “Daong Viet Nam yam tagok” di Mblang bein Thanh Nien, Phuong Tân Thành. Gah peih ngak jak ba meng 5.000 tal 6.000 urang hu mbaok tame nao takai meng 2.000-3.000m. Danak dak “Daong Viet Nam yam tagok”, hu kadha siam brei payua lac “1 ty yam takai tame jaman bahrau”, kayua Harak mbao Nhan Dan pambuak haong Mentri Kong an peih ngak. Ini jeng lac sa dalam dom bruk ngak lagaih daong jum tangin gam haong negar patakik tathuak nerak carbon saong pamaong tal Net Zero.

So Noi vu Ban Can Tho caong khin pasang iek, taong yaom, kuhria hadom urang, urang halei cambaic laic brei nao tal bhum  palei ngak bruk njauk tui sarak. Tui jabat, don vi karja pakat ban brei urang jakar, vien chuc hu ba nao ngak bruk di bhum palei hu mbang jien bilan, jien phu cap, gam hu daong jien 10 bilan jien bilan co so di labik taduan bruk ngak. Hadei ngak salah bruk gilac veik mai jabat ngak bruk dahlau hu parabha bruk njuak lagaih oh biar jang bruk ngak dahlau tuk nao bhum palei.

Di Ban raya Ho Chi Minh, anek saih bac tal 1, tal 9 saong 12 hu nao bac samar drah abih di harei 25/8, dom tal bac karei nao bac di harei 25/8 tui jalan kuhria di thun bac 2025-2026. Harei peih pakak hu peih ngak di harei 5/9, tukvak bac ka 1 hu tame bac meng harei 5/9, tukvak bac ka 2 hu tame bac meng harei 19/1/2026, tamat thun bac di harei 31/5/2026. Thun bac ini Ban raya Ho Chi Minh hu labaih 2,5 trieu anek saih (tagok labaih 39.600 anek saih). Thun ini tui kuhria di Mentri Pato Megru, anek saih tal bac 12 hu kacah tamat THPT samar drah 2 adit, rah tabiak dalam 2 harei lac 11-12/6.

Lam Dong urak ini hu 16.000 ha taneh pala phun mac ca, meblah 34% kuhria abih taneh pala mac ca dalam negar, kuhria thun ini hu labaih 13.700 tấn, kein laba kuhria rah tapa hu meng 100 tal 300 trieu dong sa hecta sa thun tui jalan pala drak. Lam Dong  daok quy hoach bhum pala, ba taneh pala mac ca dalam tinh tal thun 2030 tagok 37.000 ha. Piah ngak hu bruk ba tabiak nan, langiu paglong asar phun pajaih, tỉnh brei caik hatai tal bruk cakrok patagok tui jalan ngak pala drak pandar kong nghe glong saong pandar kong nghe ngak tabiak kaya kan, daong urang ngak nong pala drak tui jalan khang kajap.

Pasak Duah bruk ngak Ban raya Ho Chi Minh bahrau peih ngak harei duah bruk ngak tapak, online mbang ka 6 thun 2025, di pasak saong dom labik taduan bao hiem oh ka hu bruk ngak. Urak ini hu 63 gah ngak mbang pablei salih hu mbaok tame hu labaih 5.300 labik bruk ngak ka urang ngak bruk. Pasak daok hu labaih 19 ribau labik bruk ngak ka urang ngak bruk pho thong, jhik menyim - kalik takhaok, khan ao, pablei salih - pablei ndap nda - ngak ndap nda - pagam ndap nda. Meng akaok thun tal ini, Pasak hu peih ngak 43 mbang meyao meyit bruk ngak, langyah bruk ngak ka labaih 141.000 urang.

Campuchia njauk hatai padang Nyaom pasang iek ASEAN mbang ka 4 tagok jalan taphia negar Thai Lan piah duah thau bruk padeih patuh phao di dua taneh ia. Nyaom pasang iek ASEAN dahlau (IOT) mbang ini hu lambaok gah quoc phong di Campuchia mai meng 7 taneh ia dalam ASEAN lac Malaysia, Brunay, Indonesia, Laos, Myanmar, Philippines saong Việt Nam. Peih ngak mbang ini, nyaom urang jakan nao rivang dom tinh piah taong yaom  ka bruk khut tayak kayua mesruh metak di puac bian 7 meng blaoh.

Hajan praong ba tui ia sua trak di dom labik di gah Barak An Do, ngak kan kandah trak tal raidiuk di rilo rahra negar ini. Hajan praong ngak ia sua thek bah di Kashmir ngak ka 34 urang metai, ngak khut tayah ha tang saong ngak kan kandah ka kapul daong bruk di labik bhum ceik atah bayah. Hajan praong ngak khut tayah jalan mbak, ngak ka bruk daong urang gaok kan kandah. Thu tuong An Do Narendra Modi hu pagun sanya pabak taong abih bruk daong njauk lagaih ka rahra di labik gaok kan kandah.

Nepal brei oh mek jien ngak harak gal ndik ceik ka 97 tabung ceik, piah pachreih tuai damuai mai rivang iek dom labik daok takik thei thau tal saong jhul pakhang bruk ngak mbang kinh te di dom labik atah bayah. Nepal  lac bhum palei ka 8 dalam 10 tabung ceik glong abih di dunya, taduan raok yaok rituh urang ndik ceik yaok thun dalam dua bilan lac bilan Bingu pataih saong bilan Thu. Meng bilan Bingu pataih thun 2026, jien ngak harak gal ndih tagok tabung ceik Everest meng 11.000 USD tagok 15.000 USD, piah rik daong tame langyah bruk nyaom nerak saong salamat. /.