Pahadar 80 thun CM bilan 8 saong Harei negar harei 2 bilan 9, page ini 19/8 di 34 tinh, ban dalam negar padang ngak, ba tame pandar 250 danak dak kuhria abih tih jien buh tame ngak 1 trieu 280 ribau tỷ đồng. Akaok meti njauk ndem tal bruk ngak salah blaoh Pasak Parang iek Viet Nam praong abih di bhum Dong Nam A, dang dalam 10 Pasak parang iek praong abih di dunya. Langiu di nan, daok ngak blaoh saong ba tame pandar 88 danak dak dalam nan hu: Jalan peih drah samar Bac - Nam jalan nao Vũng Áng – Bùng saong jalan Vạn Ninh - Cam Lộ; Danak dak tatua Rạch Miễu 2; Danak dak binah ka 1 di danak dak Tân Vạn - Nhơn Trạch vaktu ka 1; Jalan vanh dai 3 TPHCM…

Mentri Bangsa saong Agama khan lac, hu taong abih 34 bhum palei ngak bruk danak dak abih baoh sang oh daok taik tahak. Kuhria tal harei 17 bilan 8, dalam negar hu daong abih tih labaih 334 ribau baoh sang ka urang dalam sarak karja saong baoh sang gaok kan kandah ka sang daok. Bruk jak ba “ Grauk labik dalam negar daong gauk ngak brei abih baoh sang oh daok taik tahak” kayua Thu tuong Rajaei peih ngak mek hu rilo jak jeng siam mekre, pabak prein khang ka dom bhum palei ngak brei abih baoh sang oh daok taik tahak dahlau harei 31 bilan 8.

Dang bo dac khu Kiên Hải, tỉnh An Giang birau peih Nyaom roya mbang ka sa, vaktu 2025-2030. Dalam vaktu birau ini, Dang bo dac khu Kien Hai ba tabiak klau bruk patagok piah tal thun 2030 padang dac khu Kien Hai cakrok patagok gah yulit, jitvu saong raong kaya ia tasik, patagok bruk ngak mbang di tasik; hu jeng medil ve tinh di Rạch Giá, rik tame bruk padang labik kinh te tathik gah Pei gam patagok do thi, jitvu, yulit, raong glang saong taong mek kaya ikan tathik.

So Y te TPHCM padang tabiak saong ba tame ngak bruk 2 Balai jru ruak samar ve tinh 115 di Sang iek Đa khoa Bà Rịa saong Sang iek ruak Đa khoa Vũng Tàu, parilo hu 49 balai iek ruak. Dahlau di nan, di bhum Bình Duong, So Y te TPHCM padang hu 2 balai iek ruak drah samar ve tinh 115 di Sang iek ruak  Đa khoa Bình Dương saong  Sang iek ruak Quân y 4. Puac thun ini, gah ye te ban raya padang birau pasak Iek ruak 115 di Cum y te Tân Kiên, caong khin ini lac sa Pasak iek ruak siam pandar ilamo birau mek hu tanut chuan dunya.

Danak dak ngak tatua Rạch Miễu 2 hu ba tame pandar brei peih radaih tapa, min tapen kapal gilai ngak dahlau tatua Rạch Miễu piah ka urang tapa kraong Tien meng tinh Vĩnh Long - Đồng Tháp daok ngak bruk bhian harei, oh ka thau tuk halei  padeih. Meng harei 30 bilan 8 tal harei 2 bilan 9 anak tal, tapen kapal gilai Rạch Miễu hu peih 3 kapal gilai prein pajeng trak 100 tấn ngak bruk. Tapen gilai Rạch Miễu hu padang ngak abih tih jien labaih 100 ti dong, tame ngak bruk meng thun 2021 piah plaik njiak bruk radaih gal jalan  ka tatua Rạch Miễu 1 bhian rah tabiak gal jalan.

Tong thong My Donald Trump khan lac jaik ba tabiak sarak brei padeih bruk buh phieu tapa harak thư saong mac buh phieu dien tu dahlau mbang palih ruah  kreh vaktu thun 2026. Ong Trump khan lac ba kaok bruk atah klak  dua jalan ngak yau angaok nan bo ong lac “oh njauk, khat lahik jien padai saong ngak kamelah gauk trak”. Bruk nan hu mboh anak meta meda gaok rilo kan kandah ka hukum saong adat lien bang.

Yaok rituh ribau urang Isarael  jak gauk mai Mblang bein Con tin di pasak Tel Aviv piah iew likau rajaei padeih mesruh metak di Dải Gaza. Kapol urang nan prew khang: “ Brei ka taong abih urang gilac mai sang! Padeih mesruh metak!” – ngak Mblang bein Con tin, meda lac labik pataom gauk di bruk jak ba cagar veik luac jaik 2 thun tapa, ngak jeng labik njauk caik hatai. Tui Mentri Y te Gaza, bruk mesruh metak bol lin Israel ba tal takik 61.000 urang Palestine metai, ralo lac bhap bini.

Nha tho Kiruna, sa dalam dom thaok binguk kien truc danei angan gheih abih di Thụy Điển brei ramik panduan nao labik birau dalam dua harei, atah labik klak 5 km. Piah pambuan sa baoh sang praonh kien truc trak 600 tấn nan, dom ky su pandar mac pagam rơ- moóc biak praong, yaok yau baoh radaih, panduan lih hasit hasit 500 met sa mon. Nha tho Kiruna lac sa dalam dom danak danak panduan ba di ban raya kuhria mboh dahlau dui atah labaih 30 thun. Hu labaih 3.000 baoh sang saong 6.000 bhap bini brei panduan ba./.